Rekodi za Kusikiliza—Jinsi ya Kuzitumia

1. Ni uandalizi gani mwingine tulio nao zaidi ya machapisho yetu?

¹ Wengi wanafurahia kutumia Tovuti yetu ya jw.org kusoma maneno yenye kupendeza na sahihi ya kweli. (Mhu. 12:10) Lakini, je, wewe husikiliza rekodi kwenye Tovuti yetu? Rekodi hizo hutuwezesha kusikiliza habari nyingi. Tunapata faida gani kwa kuzisikiliza?

2. Tunawezaje kutumia rekodi za kusikiliza katika funzo la kibinafsi au la familia?

² Katika Funzo la Kibinafsi au la Familia: Kusikiliza rekodi za Biblia, magazeti, au chapisho lingine tunaposafiri au tunapofanya shughuli za kila siku kutatusaidia kutumia wakati vizuri. (Efe. 5:15, 16) Tunaweza kufanya ibada ya familia iwe yenye kufurahisha kwa kusikiliza usomaji wa habari tunayosoma. Kusikiliza rekodi wakati wa funzo la kibinafsi kunaweza kutusaidia sana kuboresha usomaji wetu na kutusaidia tunapojifunza lugha nyingine.

3. Ni nani katika eneo letu wanaoweza kufaidika na rekodi za kusikiliza?

³ Katika Huduma ya Shambani: Kuna watu katika eneo letu wanaohisi kwamba wana shughuli nyingi sana hivi kwamba hawawezi kusoma, lakini huenda wakasikiliza rekodi zetu. Au, tunaweza kukutana na watu wanaozungumza lugha nyingine na ambao huenda wakapendezwa ikiwa watasikia ujumbe wa Ufalme katika ‘lugha yao wenyewe.’ (Mdo. 2:6-8) Katika maeneo fulani, kusikiliza ni sehemu muhimu ya utamaduni. Kwa mfano, katika utamaduni wa Hmong, vijana husimuliwa mambo ya zamani na wanakumbuka vizuri habari hizo. Katika tamaduni nyingi za Afrika watu hufurahia kujifunza kwa kusikiliza hadithi.

4. Ni maswali gani tunayoweza kujiuliza ili kuwasaidia watu walio katika eneo letu?

⁴ Je, katika eneo lenu itafaa kusikiliza rekodi fulani pamoja na mwenye nyumba katika lugha yake? Je, tunaweza kumtumia mtu fulani rekodi ya kusikiliza kupitia barua pepe? Je, tunaweza kupakua rekodi ya kusikiliza na kumpa mtu anayependezwa, na ikiwezekana umpe pamoja na chapisho lenye habari hizo? Kila mara unapompa mtu chapisho la kielektroniki kama vile kitabu, broshua, au gazeti zima, unaweza kuandika katika ripoti yako ya utumishi wa shambani. Rekodi za kusikiliza zimekusudiwa kwa ajili ya funzo letu la kibinafsi na pia kupanda mbegu za kweli za Ufalme.—1 Kor. 3:6.