Sala Zinaweza Kukusaidiaje?

Pamela aliyekuwa na ugonjwa wa kansa alitafuta matibabu. Hata hivyo, alisali pia kwa Mungu ili ampe nguvu za kuvumilia ugonjwa huo. Je, kusali kwa Mungu kulimsaidia?

Pamela anasema: “Nilipokuwa nikipata matibabu ya kansa, mara nyingi niliogopa sana. Lakini niliposali kwa Yehova Mungu, nilihisi utulivu na nikaanza kufikiria mambo kwa njia nzuri. Bado ninapata maumivu makali sana lakini sala inanisaidia kudumisha mtazamo unaofaa. Watu wanaponiuliza ninahisije, ninawaambia, ‘Bado nina maumivu, lakini nina furaha!’”

Bila shaka, hatuhitaji kusubiri hadi tuwe na tatizo kubwa la afya au matatizo mengine ili tusali. Sisi sote tunakabili changamoto, kubwa na ndogo, na mara nyingi tunahisi tunahitaji msaada ili kukabiliana nazo. Je, sala zinaweza kutusaidia?

Biblia inasema: “Mtupie Yehova mzigo wako, naye atakutegemeza. Hataruhusu kamwe mwadilifu aanguke.” (Zaburi 55:22) Maneno hayo yanafariji sana. Hivyo, sala zinaweza kukusaidia kwa njia gani? Unaposali kwa Mungu kwa njia inayofaa, atakupatia kile unachohitaji ili ukabiliane na changamoto ulizo nazo.—Ona sanduku “Unaweza Kunufaikaje kwa Kusali?”

Unaweza Kunufaikaje Kwa Kusali?

Amani ya akili

“Mjulisheni Mungu maombi yenu; na amani ya Mungu inayozidi uelewaji wote itailinda mioyo yenu na nguvu zenu za akili kupitia Kristo Yesu.” (Wafilipi 4:6, 7) Ukimweleza Mungu mahangaiko yako, atakusaidia kuwa na utulivu na kutenda kwa busara hata unapokuwa na mkazo.

Hekima kutoka kwa Mungu

“Ikiwa yeyote kati yenu anakosa hekima, na aendelee kumwomba Mungu, kwa maana yeye huwapa wote kwa ukarimu na bila kushutumu; naye atapewa hiyo.” (Yakobo 1:5) Mara nyingi hatufanyi maamuzi mazuri tunapokuwa na mkazo. Ukimwomba Mungu akupe hekima, atakukumbusha kanuni nyingi zinazopatikana katika Neno Lake Biblia zinazoweza kukusaidia.

Nguvu na faraja

“Kwa mambo yote nina nguvu kupitia yule anayenipa nguvu.” (Wafilipi 4:13) Akiwa Mungu mweza-yote, Yehova anaweza kukupa nguvu unazohitaji ili kukabiliana na changamoto zako au kuvumilia majaribu unayopitia. (Isaya 40:29) Vilevile, Biblia inamwita Yehova, “Mungu wa faraja yote.” Anaweza kutufariji “katika majaribu yetu yote.”—2 Wakorintho 1:3, 4.