Kubali Msamaha wa Yehova

1-2. Watenda dhambi wanaweza kupata kitulizo gani? (Tazama pia picha.)

MFALME Daudi alijua jinsi inavyokuwa mtu anapohisi hatia kwa sababu ya dhambi alizofanya zamani. (Zab. 40:12; 51:3; utangulizi) Alitenda dhambi fulani nzito maishani. Hata hivyo, alionyesha toba ya kweli, na Yehova alimsamehe. (2 Sam. 12:13) Matokeo ni kwamba Daudi alielewa pia kitulizo anachopata mtu anaposamehewa na Yehova.—Zab. 32:1.

² Kama Daudi, tunaweza kupata kitulizo kinachotokana na kupokea rehema za Yehova. Tunafarijika sana kujua kwamba Yehova yuko tayari kusamehe dhambi zetu—hata dhambi nzito—ikiwa tutatubu kikweli, tutaungama dhambi zetu, na kufanya yote tuwezayo ili kutorudia makosa yetu! (Met. 28:13; Mdo. 26:20; 1 Yoh. 1:9) Na inafariji sana kujua kwamba anatusamehe kabisa kana kwamba hatukutenda dhambi hiyo!—Eze. 33:16.

3-4. Dada mmoja alihisije baada ya kubatizwa, na tutazungumzia nini katika makala hii?

³ Hata hivyo, nyakati nyingine inaweza kuwa vigumu kwa wengine kukubali msamaha wa Yehova. Fikiria mfano wa Jennifer, aliyelelewa katika kweli. Alipokuwa tineja, alijihusisha katika mwenendo usiofaa na aliishi maisha maradufu. Miaka mingi baadaye, alimrudia Yehova na hatimaye alistahili kubatizwa. Anasema hivi: “Katika maisha yangu ya zamani nilifuatilia vitu vya kimwili kupita kiasi, nilifanya uasherati, nilitumia kileo kupita kiasi, na nilikuwa mwenye hasira sana. Akilini mwangu nilijua kwamba baada ya kuomba msamaha na kutubu, dhabihu ya Kristo ilinisafisha. Lakini sikuweza kuuhakikishia moyo wangu kwamba nilikuwa nimesamehewa.”

⁴ Je, nyakati nyingine inakuwa vigumu kwako kuuhakikishia moyo wako kwamba Yehova amekusamehe makosa yako ya zamani? Yehova anataka tuhisi kwamba ametusamehe kabisa, kama Daudi alivyohisi. Katika makala hii, tutazungumzia kwa nini tunahitaji kukubali msamaha wa Yehova na ni nini kinachoweza kutusaidia kufanya hivyo.

KWA NINI TUNAHITAJI KUKUBALI MSAMAHA WA YEHOVA?

5. Shetani anataka tuamini nini? Toa mfano.

⁵ Kwa kukubali msamaha wa Yehova, tunaweza kuepuka kunaswa na mojawapo ya mitego ya Shetani. Kumbuka kwamba Shetani atafanya yote awezayo ili kutuzuia kumtumikia Yehova. Ili kutimiza lengo lake, huenda Shetani akajaribu kufanya tuamini kwamba dhambi zetu haziwezi kusamehewa. Fikiria mfano wa mwanamume fulani huko Korintho ambaye aliondolewa kutanikoni baada ya kufanya uasherati. (1 Kor. 5:​1, 5, 13) Baadaye alipotubu, Shetani alitaka ndugu na dada kutanikoni wasimsamehe—wamtendee kwa ukali hivi kwamba wakatae kumkaribisha kutanikoni mwanamume huyo. Wakati uleule, Shetani alitaka mwanamume huyo ahisi kwamba hawezi kusamehewa—‘alemewe sana na huzuni inayopita kiasi’ hivi kwamba aache kumtumikia Yehova. Shetani hajabadili mbinu au lengo lake. Hata hivyo, “hatukosi kuzijua mbinu zake.”—2 Kor. 2:​5-11.

6. Tunawezaje kupata kitulizo kutokana na kulemewa na hisia za hatia?

⁶ Kwa kukubali msamaha wa Yehova, tunaweza kupata kitulizo kutokana na kulemewa na hisia za hatia. Kiasili tunapotenda dhambi tunahisi hatia. (Zab. 51:17) Hilo ni jambo zuri. Dhamiri yetu inaweza kutuchochea kuchukua hatua zinazofaa ili kurekebisha mwenendo wetu. (2 Kor. 7:​10, 11) Hata hivyo, ikiwa tutaendelea kulemewa na hisia za hatia muda mrefu sana baada ya kutubu dhambi, tunaweza kuvunjika moyo na tukaacha kumtumikia Yehova. Tunapokubali msamaha wa Yehova, tunaweza kuacha kuhisi hatia ya dhambi. Kisha tunaweza kumtumikia Yehova kwa njia anayotaka, yaani, tukiwa na dhamiri safi na shangwe nyingi. (Kol. 1:​10, 11; 2 Tim. 1:3) Hata hivyo, tunawezaje kuusadikisha moyo wetu ili ukubali msamaha wa Mungu?

NI NINI KINACHOWEZA KUTUSAIDIA KUKUBALI MSAMAHA WA YEHOVA?

7-8. Yehova alifunuaje sifa zake kwa Musa, na hilo linatupatia uhakika gani? (Kutoka 34:​6, 7)

⁷ Tafakari kuhusu jinsi ambavyo Yehova amefunua sifa zake. Kwa mfano, ona kile ambacho Yehova alimwambia Musa kwenye Mlima Sinai.a (Soma Kutoka 34:​6, 7.) Kati ya mambo yote ambayo Yehova angeweza kusema kuhusu sifa na njia zake, aliona ni vema kusema kuwa yeye ni “Mungu mwenye rehema na huruma.” Je, Mungu aliye na sifa hizo anaweza kukataa kumsamehe mwabudu wake ambaye ametubu kikweli dhambi yake? La hasha! Ikiwa angefanya hivyo angekuwa hana rehema na mkatili—sifa ambazo Yehova hawezi kuonyesha.

⁸ Tunaweza kuwa na uhakika kwamba Yehova hawezi kamwe kufunua sifa zake kwa njia isiyo sahihi, kwa kuwa yeye ni Mungu wa ukweli. (Zab. 31:5) Hivyo, tunaweza kuamini maneno yake. Ikiwa ni vigumu kwako kuacha kulemewa na hisia za hatia kwa sababu ya dhambi za zamani, jiulize hivi: ‘Je, ninaamini kwamba kwa kweli Yehova ni mwenye rehema na huruma na kwamba hawezi kamwe kukataa kumsamehe mtenda dhambi yeyote anayetubu? Basi je, sipaswi kukubali kwamba amenisamehe?’

9. Inamaanisha nini kusamehewa dhambi zetu? (Zaburi 32:5)

⁹ Tafakari kuhusu mambo ambayo Yehova aliwaongoza waandikaji wa Biblia waseme kuhusu msamaha wake. Kwa mfano, fikiria jinsi mwandikaji wa Biblia, Daudi, alivyofafanua msamaha wa Yehova. (Soma Zaburi 32:5.) Daudi alisema hivi: ‘Ulinisamehe kosa la dhambi zangu.’ Neno la Kiebrania linalotafsiriwa ‘kusamehe’ linaweza kumaanisha “kuinua,” “kuchukua,” au “kubeba.” Yehova alipomsamehe Daudi, ni kana kwamba aliinua dhambi zake na kuzibeba. Daudi alipata kitulizo kutokana na mzigo mzito wa hatia aliokuwa amebeba. (Zab. 32:​2-4) Tunaweza kupata kitulizo kama hicho. Tunapotubu kikweli dhambi zetu, hatuhitaji kuendelea kubeba mzigo wa hisia za hatia kwa sababu ya dhambi ambazo Yehova amezibeba na kuzipeleka mbali nasi.

10-11. Maneno yuko “tayari kusamehe” yanatuambia nini kumhusu Yehova? (Zaburi 86:5)

¹⁰ Soma Zaburi 86:5. Katika andiko hilo, Daudi anasema kwamba Yehova yuko “tayari kusamehe.” Inapohusu maneno hayo, kitabu kimoja cha marejeo ya Biblia kinasema hivi kumhusu Yehova: “[Yeye] ni mwenye ‘kusamehe’—hiyo ni ‘asili’ yake.” Kwa nini kiasili Yehova ni mwenye kusamehe? Andiko hilo linaendelea kusema hivi: “Una upendo mwingi mshikamanifu kwa wote wanaokuitia.” Kama tulivyojifunza katika makala iliyotangulia, upendo mshikamanifu wa Yehova unamchochea kushikamana, kufungamana kabisa na waabudu wake waaminifu. Akichochewa na upendo wake mshikamanifu ‘atawasamehe kwa hiari’ watenda dhambi wote wanaotubu. (Isa. 55:​7, maelezo ya chini) Ikiwa ni vigumu kwako kukubali msamaha wa Mungu, unaweza kujiuliza hivi: ‘Je, ninaamini kwamba Yehova ni mwenye kusamehe—kwamba yuko tayari kuwasamehe watenda dhambi wote wanaotubu ambao wanamwomba awaonyeshe rehema? Basi je, sipaswi kukubali kwamba alinisamehe mimi nilipomlilia anionyeshe rehema?’

¹¹ Tunaweza kupata faraja kwa kujua kwamba Yehova anaelewa vizuri mwelekeo wetu wa kutenda dhambi. (Zab. 139:​1, 2) Jambo hilo linatajwa wazi kwenye zaburi nyingine ya Daudi, ambayo inaweza pia kutusaidia kukubali msamaha wa Yehova.

USISAHAU KILE AMBACHO YEHOVA ANAKUMBUKA

12-13. Kulingana na Zaburi 103:​14, Yehova anakumbuka nini kutuhusu, na hilo humchochea afanye nini?

¹² Soma Zaburi 103:14. Daudi anasema kwamba Yehova ‘anakumbuka kwamba sisi ni mavumbi.’ Kupitia maneno hayo, Daudi anataja sababu moja inayomfanya Yehova awe tayari kuwasamehe waabudu wake wanaotubu: Sikuzote anakumbuka mwelekeo wetu wa kutenda dhambi. Ili kuelewa jambo hilo vizuri zaidi, acheni tuchunguze kwa makini maneno ya Daudi.

¹³ Daudi anasema kwamba Yehova “anajua vema umbo letu.” Alimuumba Adamu “kutokana na mavumbi ya ardhi” na anajua vizuri kwamba kiasili wanadamu wakamilifu wana mipaka fulani—kwa mfano, wanahitaji kula, kulala, na kupumua. (Mwa. 2:7) Lakini Adamu na Hawa walipotenda dhambi, kuumbwa kutokana na mavumbi kukahusisha mengi zaidi. Tukiwa wazao wao, tulirithi mwelekeo wa kutenda dhambi ambao unatufanya tutende mambo mabaya kwa urahisi. Yehova hatambui tu mwelekeo wetu wa kutenda dhambi; Daudi anasema kwamba Yehova ‘anakumbuka’ mwelekeo huo. Neno la Kiebrania linalotumika hapo linaweza kumaanisha kuchukua hatua inayofaa. Kwa ufupi, tunaweza kufafanua maneno ya Daudi kwa njia hii: Yehova anaelewa kwamba nyakati fulani tutafanya makosa; tunapofanya hivyo, anachochewa kutuonyesha rehema na kutusamehe tunapotubu kutoka moyoni.—Zab. 78:​38, 39.

14. (a) Daudi anafafanuaje ukubwa wa msamaha wa Yehova? (Zaburi 103:12) (b) Mfano wa Daudi unaonyeshaje kwamba Yehova husamehe kikamili? (Tazama sanduku “Jinsi Yehova Anavyosamehe na Kusahau.”)

¹⁴ Msamaha wa Yehova ni mkubwa kadiri gani? (Soma Zaburi 103:12.) Daudi anasema kwamba Yehova anapotusamehe, Yeye huweka dhambi zetu mbali “kama mashariki ilivyo mbali sana na magharibi.” Sikuzote mashariki iko mbali kabisa na magharibi; pande hizo mbili haziwezi kukutana kamwe. Jambo hilo linatuambia nini kuhusu dhambi ambazo Yehova anasamehe? Kitabu kimoja cha marejeo kinafafanua kwa njia hii jambo hilo: “Ikiwa dhambi inaondolewa mbali hivyo, basi tunaweza kuwa na uhakika kwamba harufu, mabaki, hata kumbukumbu ya dhambi hiyo ni lazima imeondolewa kabisa.” Hebu wazia—harufu inaweza kutukumbusha tukio fulani. Lakini Yehova anapotusamehe, ni kana kwamba hakuna hata harufu yoyote inayobaki ambayo itamkumbusha dhambi yetu na kumfanya atuhukumu kwa sababu ya dhambi hiyo.—Eze. 18:​21, 22; Mdo. 3:19.

15. Tunaweza kufanya nini ikiwa tunaendelea kubeba hisia za hatia kwa sababu ya makosa ya zamani?

¹⁵ Maneno ya Daudi katika Zaburi 103 yanawezaje kutusaidia kukubali msamaha wa Yehova? Ikiwa tunaendelea kubeba hisia za hatia kwa sababu ya dhambi za zamani, tunaweza kujiuliza hivi: ‘Je, ninasahau jambo ambalo Yehova anakumbuka, yaani, je, ninasahau kwamba anakumbuka mwelekeo wangu wa kutenda dhambi na atamsamehe mtenda dhambi anayetubu, kutia ndani mimi? Je, ninakumbuka mambo ambayo Yehova anachagua kusahau, yaani, je, ninakumbuka dhambi alizonisamehe na ambazo hatanihukumu nazo kamwe?’ Yehova hakazii fikira dhambi zetu za zamani. Sisi pia tunapaswa kufanya hivyo. (Zab. 130:3) Tunapokubali msamaha wa Yehova, tutaweza kujisamehe wenyewe makosa tuliyofanya zamani na kusonga mbele.

16. Toa mfano unaoonyesha hatari ya kuendelea kuwa na hisia za hatia kwa sababu ya dhambi za zamani. (Tazama pia picha.)

¹⁶ Fikiria mfano huu. Kuendelea kuwa na hisia za hatia kwa sababu ya dhambi za zamani ni kama kujaribu kuendesha gari huku ukiendelea kutazama kioo cha kuangalia nyuma. Ni vema kutazama pindi fulani kioo cha kuangalia nyuma ili uweze kuchukua hatua dhidi ya hatari zinazoweza kutokea nyuma yako. Lakini ili usonge mbele ukiwa salama, ni lazima ukaze macho mbele kwenye barabara. Vivyo hivyo, tunaweza kunufaika ikiwa pindi fulani tutafikiria kuhusu makosa yetu ya zamani; tunaweza kujifunza kutokana na makosa hayo na kuimarisha azimio letu la kutoyarudia. Lakini ikiwa tutaendelea kukazia fikira makosa ya zamani, hisia za hatia tulizo nazo zinaweza kutuzuia kumtumikia Mungu kikamili. Badala yake, acheni tuendelee kukazia fikira barabara iliyo mbele yetu. Tuko katika barabara inayoongoza kwenye uzima katika ulimwengu mpya wa Mungu ulioahidiwa, ambapo kumbukumbu mbaya ‘hazitaingia tena akilini.’—Isa. 65:17; Met. 4:25.

ENDELEA KUUSADIKISHA MOYO WAKO

17. Kwa nini tunahitaji kuendelea kuusadikisha moyo wetu kwamba Yehova anatupenda na yuko tayari kutusamehe?

¹⁷ Tunahitaji kuendelea kuusadikisha moyo wetu kwamba Yehova anatupenda na yuko tayari kutusamehe. (1 Yoh. 3:​19, maelezo ya chini) Kwa nini? Kwa sababu Shetani hataacha kujaribu kutusadikisha kwamba Yehova hatupendi au hawezi kutusamehe. Vyovyote vile, lengo lake ni lilelile—tuache kumtumikia Yehova. Tunaweza kutarajia kwamba Shetani atazidisha jitihada zake kwa kuwa anajua kwamba ana kipindi kifupi cha wakati. (Ufu. 12:12) Hatupaswi kumruhusu ashinde!

18. Tunaweza kufanya nini ili kuusadikisha moyo wetu kwamba Yehova anatupenda na yuko tayari kutusamehe?

¹⁸ Ili kuimarisha uhakika wako katika upendo wa Yehova, tumia mapendekezo yaliyozungumziwa katika makala iliyotangulia. Ili kuusadikisha moyo wako kwamba Yehova yuko tayari kukusamehe, tafakari kuhusu jinsi Yehova alivyofunua sifa zake. Tafakari kuhusu mambo ambayo Yehova aliwaongoza waandikaji wa Biblia waseme kuhusu msamaha wake. Usisahau kwamba anatambua vizuri mwelekeo wetu wa kutenda dhambi na atatutendea kwa rehema. Na kumbuka kwamba anaposamehe, anafanya hivyo kikamili. Kisha, ukiwa na uhakika kama ambao Daudi alikuwa nao kuhusu rehema za Yehova, utaweza kusema hivi: “Asante, Yehova, kwa kusamehe ‘kosa la dhambi zangu’!”—Zab. 32:5.