Kutoka kwa Wasomaji Wetu

Hisiamoyo Zisizofaa Mimi ni msichana mwenye miaka 12, na nilifurahia sana kusoma makala za “Wewe Unaweza Kushinda Hisiamoyo Zisizofaa.” (Oktoba 8, 1992) Nimekuwa na matatizo na rafiki na wanashule wenzangu. Chanzo cha hayo yote kilikuwa ni kuwa na maoni mabaya nyakati zote kuhusu mambo. Makala hizo zilinifundisha kuwa na mtazamo ufaao.

A. C., Italia

Baada ya kutibiwa kwa miaka miwili kutokana na mifululizo ya matatizo ya kihisiamoyo na kihormoni, ninajua kutokana na ujuzi kwamba madokezo yenu yanafanya kazi. Siku mbili zilizopita nilirudiwa tena na nilitaka tu kuacha. Mume wangu mwenye saburi nyakati zote aliniambia niisome tena makala hiyo. Ilikuwa na kitia-moyo chote nilichohitaji na kunipatia nia ya kujaribu tena.

J. L., Uingereza

Wazazi Wanaoaibisha Asanteni sana kwa makala “Vijana Wanauliza . . . Namna Gani Ikiwa Wazazi Wetu Wametuaibisha?” (Oktoba 22, 1992, Kiingereza) Ilinitia moyo sana. Baba yangu juzi alinikataza nisihudhurie mikutano ya Kikristo. Hata hivyo, kusoma makala yenu kulinisaidia nielewe kwamba siko peke yangu katika hali hiyo na kwamba naweza kutegemea msaada wa Yehova.

K. L. R., Ufaransa

Baba yangu ni Mkristo asiyetenda. Mama yangu alitengwa na ushirika na anapinga kweli. Pindi moja alininyima chakula kwa zaidi ya saa 36 kwa sababu nilikuwa nimeenda kuhubiri. Alinipiga pia. Nyakati nyingine mimi hulia kwa ajili ya hali ya kiroho ya wazazi wangu. Kwa hiyo, hamwezi kuwazia jinsi makala yenu ilivyonitia moyo na kuimarisha imani yangu. Nimeazimia kushikamana na kanuni za Biblia.

E. J., Nigeria

Mimi pia nina baba aliyetengwa na ushirika na ndugu na dada zangu kadhaa wamekemewa au kutengwa na ushirika. Wengine wameniona kuwa kama wao. Lakini sasa nimeolewa na nimemaliza mwaka wangu wa kwanza nikiwa mweneza evanjeli wa wakati wote. Naam, waweza kuthibitisha kwa kweli kuwa tofauti.

D. R., United States

Kuutazama Ulimwengu Asanteni sana kwa kuchapa habari ndogo-ndogo katika “Kuutazama Ulimwengu.” Kwa sababu nimekuwa na maisha tulivu na isiyotia ndani mambo mengi, mimi hujihakikishia nyakati zote kwamba kwa kweli hizi ni siku za mwisho. “Kuutazama Ulimwengu” imenisaidia sana katika kunihakikishia jinsi ulimwengu wa kale ulivyo mwovu na mpotovu. Tafadhali endeleeni kuichapisha kwa ukawaida.

M. G., United States

Barua kwa Wazazi Ile makala “Barua kwa Mama na Baba” (Oktoba 8, 1992) ilinitoa machozi. Ilinifanya nitambue jinsi ilivyokuwa vigumu kwa wazazi wangu kulea watoto wanane. Kwa hiyo, nikiwa mwenye miaka 42, nimeandika barua yangu ya shukrani kwa Mama na Baba.

J. D., United States

Ilikuwa uchungu sana kuisoma kwa sababu wazazi wangu hawakunipatia mambo yaliyoorodheshwa na kijana huyo. Lakini nilipoisoma tena, niling’amua jinsi Yehova, Baba yetu wa kimbingu, amenifanyia mimi na wengine wengi pia mambo mengi. Amenifundisha upendo na kunitia nidhamu nilipoihitaji. Hivyo, amenipa uhuru fulani kutokana na maisha ya utoto yenye uchungu niliyokuwa nayo.

C. A., United States