Matumizi Mazuri ya Pesa

UWE NA MIPANGO MIZURI

KANUNI YA BIBLIA: “Mipango ya wenye bidii hakika huleta mafanikio, lakini wote walio na haraka kwa hakika watakuwa maskini.”—Methali 21:5.

INAMAANISHA NINI: Kushikamana kwa bidii na mipango yako ni muhimu ili upate mafanikio. Kwa hiyo, panga bajeti kwa makini kabla ya kutumia pesa. Kumbuka, huwezi kununua kila kitu unachotaka. Hivyo, tumia pesa zako kwa hekima.

MAMBO UNAYOWEZA KUFANYA:

• Shikamana na bajeti yako. Andika orodha ya vitu vyote unavyotaka kununua, na uweke vitu hivyo katika makundi kama vile chakula, mavazi, na matumizi ya nyumbani. Kisha amua kiasi cha pesa utakachotumia katika kila kikundi. Ukitumia pesa nyingi kwenye kikundi kimoja, chukua pesa kutoka kwenye kikundi kingine ili kujazia gharama hizo. Kwa mfano, ikiwa umetumia pesa nyingi kununua mafuta ya gari kuliko ulivyopanga, unaweza kuchukua pesa kutoka kwenye kikundi ambacho si muhimu sana kama vile pesa ambazo ungetumia kununua chakula mkahawani.

• Epuka madeni yasiyo ya lazima. Jitahidi kadiri unavyoweza kuepuka madeni. Badala ya kukopa, weka akiba ya pesa ili kununua vitu unavyohitaji. Ukilazimika kukopa, jitahidi kulipa deni hilo haraka iwezekanavyo ili kuepuka riba. Ikiwa una deni, panga njia ya kulipa na ushikamane nayo.

  Mtu akiwa na zoea la kukopa, kuna uwezekano wa kutumia pesa nyingi kuliko alivyopanga. Hivyo, ikiwa unataka kukopa, fikiria kwa makini kabla ya kufanya hivyo.

JIHADHARI NA MITAZAMO ISIYOFAA

KANUNI YA BIBLIA: “Mvivu halimi katika majira ya baridi kali, kwa hiyo atakuwa akiombaomba wakati wa mavuno, wakati hana chochote.” —Methali 20:4.

INAMAANISHA NINI: Uvivu unaweza kusababisha umaskini. Kwa hiyo, uwe mfanyakazi mwenye bidii, na ujitahidi kadiri unavyoweza kutumia pesa zako kwa hekima ili uwe na akiba ya wakati ujao.

MAMBO UNAYOWEZA KUFANYA:

• Fanya kazi kwa bidii. Unapofanya kazi kwa bidii na kuwa mwenye kutegemeka, mwajiri wako atakuamini na haitakuwa rahisi kufutwa kazi. Waajiri wanapenda wafanyakazi wenye sifa hizo.

• Uwe mnyoofu. Usimwibie mwajiri wako. Ukikosa unyoofu utaharibu sifa yako nzuri na kufanya iwe vigumu kupata kazi baadaye.

• Epuka pupa. Ikiwa sikuzote unang’ang’ana kupata pesa nyingi zaidi na zaidi, mwishowe unaweza kupata matatizo ya afya na kuharibu uhusiano wako na wengine. Kumbuka, pesa si jambo kuu maishani.

KANUNI NYINGINE ZA BIBLIA

USIPOTEZE WAKATI NA MALI KWA KUJIHUSISHA NA MAZOEA MABAYA.

“Mlevi na mlafi watakuwa maskini, na kusinzia kutamvika mtu matambara.”​—METHALI 23:21.

EPUKA MIKAZO ISIYO YA LAZIMA.

“Acheni kuhangaikia uhai wenu kuhusu kile mtakachokula au kunywa, au juu ya miili yenu kuhusu kile mtakachovaa.”​—MATHAYO 6:25.

EPUKA WIVU.

“Mtu mwenye wivu hujitahidi sana kupata mali, lakini hajui kwamba umaskini utamkumba.”​—METHALI 28:22.