Kitabu Chenye Kutawanywa Zaidi Sana Ulimwenguni
“Biblia ndiyo kitabu chenye kusomwa zaidi sana katika historia. . . . Nakala nyingi zaidi za Biblia zimetawanywa kuliko za kitabu kingine chochote. Biblia imetafsiriwa mara nyingi zaidi pia, na katika lugha nyingi zaidi, kuliko kitabu kingine chochote.”—“The World Book Encyclopedia.”1
KWA njia fulani, vitabu vingi ni kama watu. Vinatokea, huenda vikapendwa na watu wengi, na—isipokuwa vichache vilivyo bora kabisa—vinazeeka na havitumiki tena. Mara nyingi maktaba huwa kama makaburi ya vitabu visivyohesabika ambavyo si vya kisasa, havisomwi na kwa kweli, havitumiki tena.
Hata hivyo, Biblia ni ya kipekee hata miongoni mwa vitabu vilivyo bora kabisa. Ingawa ilianza kuandikwa miaka 3,500 iliyopita, hiyo ingali hai sana. Ni kitabu chenye kutawanywa zaidi sana duniani.a Kila mwaka, nakala zipatazo milioni 60 za Biblia nzima au sehemu-sehemu zayo hutawanywa. Chapa ya kwanza iliyotumia uchapaji kwa mashine ilitokezwa na matbaa ya mbuni Mjerumani Johannes Gutenberg mwaka wa 1455 hivi. Tangu wakati huo Biblia (zikiwa nzima au sehemu-sehemu) zinazokadiriwa kuwa bilioni nne zimechapwa. Hakuna kitabu kingine, cha kidini au kingine chochote, kikaribiacho hata idadi hiyo.
Biblia pia ndiyo kitabu chenye kutafsiriwa zaidi sana katika historia. Biblia nzima au sehemu-sehemu zayo imetafsiriwa katika lugha na lahaja zaidi ya 2,100.b Asilimia zaidi ya 90 ya familia ya kibinadamu wanaweza kupata angalau sehemu ya Biblia katika lugha yao wenyewe.2 Hivyo kitabu hiki kimepatikana katika mataifa mengi na kimevuka mipaka ya kijamii na ya kikabila.
Takwimu zenyewe huenda zisiandae sababu ya kukuvutia sana uichunguze Biblia. Hata hivyo, tarakimu za nakala zinazogawanywa na za tafsiri ni zenye kuvutia, zikithibitisha uvutio wa Biblia kwa wote. Kwa hakika kitabu kinachouzwa kwa wingi zaidi sana na ambacho kimetafsiriwa zaidi sana katika historia yote ya kibinadamu chastahili uchunguzi wako.
[Maelezo ya Chini]
a Kichapo cha pili chenye kutawanywa zaidi sana chafikiriwa kuwa kile kijitabu chenye jalada nyekundu kiitwacho Quotations From the Works of Mao Tse-tung, ambacho nakala zikadiriwazo kuwa milioni 800 zimeuzwa au kutawanywa.
b Takwimu kuhusu idadi ya lugha zinategemea tarakimu zilizochapishwa na United Bible Societies.
[Picha katika ukurasa wa 6]
Biblia ya Gutenberg, katika Latini, kitabu kamili cha kwanza kilichochapwa kwa kutumia uchapaji kwa mashine