Kuthamini Mambo ya Mungu

1, 2. Katika hekalu Yerusalemu, Yesu alikaza fikira za wanafunzi wake kwenye mfano gani mwema wa kuthamini?

SIKU moja Yesu alipokuwa hekaluni katika Yerusalemu alionyesha wanafunzi wake mfano wa kuthamini mambo ya Mungu. Yesu alikuwa ndiyo wakati huo amemaliza kuonya wanafunzi wake watu wakisikia juu ya ‘madaktari wa sheria wanaopenda kutembea hapa na pale wakiwa wamevaa kanzu ndefu, nao wanapenda sana salamu zenye heshima barabarani, viti vikubwa katika masinagogi, na mahali pa heshima karamuni.’ Hawa hawakuwa na heshima ya kweli kwa nyumba ya Mungu ya ibada. Badala yake, walitafuta kuitumia vibaya kwa faida yao wenyewe, wakivuta fikira kwenye wao wenyewe. Huko hekaluni Yesu alitazama matajiri wakitumbukiza zawadi zao ndani ya visanduku vya hazina. Aliona mwanamke fulani mjane pia akitumbukiza sarafu mbili ndogo zenye thamani ndogo sana humo, naye akavuta fikiri za wanafunzi wake kwenye tukio hilo, akisema hivi: “Hakika nawaambia, huyu mjane maskini ametia zaidi kuliko wote; maana, hao wote walitia sadakani katika mali iliyowazidi, bali huyu katika umaskini wake ametia vyote alivyokuwa navyo.”​—Luka 20:45-47; 21:1-4.

² Inapendeza namna gani kwamba Yesu alisema mwanamke huyu aliyetumbukiza sarafu mbili ndogo zenye thamani ndogo sana “ametia zaidi kuliko wote”! Yesu alijua kwamba mwanamke huyu alilithamini hekalu. Mwanamke huyu alijua kwamba hekalu lilipaswa kuangaliwa naye akatoa mchango wake kusaidia litunzwe. ‘Yeye, akiwa na vichache kuliko vinavyotosha, ametoa vyote alivyokuwa navyo vya kujiruzuku.’ (New English Bible) Ni kitu gani juu ya hekalu hili kilichomfanya mjane maskini huyu aonyeshe kuthamini huko?

3. Yalikuwako mambo gani juu ya hekalu hilo hata mjane ayathamini?

³ Mahali hapa ndipo Wayahudi kutoka eneo lote la Israeli walipokuwa wanakuja walau mara tatu kwa mwaka kwa ajili ya sikukuu za pekee kwa habari ya ibada ya kweli. Hapa ndipo mjane huyu angeweza kuleta dhabihu zake na kuwaomba makuhani wazitoe kwa Yehova apate kusamehewa dhambi zake na kwa wonyesho wa shukrani yake. Hapa ndipo ambapo yeye angeweza kusikia Neno la Mungu likisomwa na kuelezwa. Hapa ndipo ambapo yeye angeweza kujibiwa maulizo yake juu ya Yehova na namna Torati yake ilivyohusu maisha yake. Hapa angeweza kufurahia ushirika na wanaume wazee wengine wa kundi la Mungu na pamoja na rafiki zake ambao wao pia walikuwa wanakuja hapa kwa ajili ya ibada. Yeye alilithamini hekalu sana. Akiwa na imani kwamba Mungu angempa mahitaji yake, alitanguliza faida za ibada ya Yehova hata mbele ya hangaiko juu ya kupata riziki ya kimwili.​—Linganisha Mathayo 6:31-33.

4. Hekalu kuu la Mungu la kiroho ni nini, na imetupasa tulioneje?

⁴ Hekalu hilo katika Yerusalemu, ambalo wakati mmoja lilikuwa mahali pakuu pa ibada ya Yehova hapa duniani, haliko tena. Kwa sababu lilitumiwa vibaya, likatendewa kama kitu najisi na watu waliojidai kumtumikia Mungu, yeye aliliacha liharibiwe na Warumi. Lakini kwa njia ambayo akili za kibinadamu zingeweza kuelewa, hekalu hilo la kidunia lilifananisha hekalu kuu la kiroho la Mungu. Hekalu hili ni jengo la kiroho la Mungu ambalo kupitia kwalo wanadamu hapa duniani wanaweza kumfikia yeye, Mungu mtakatifu asiyeonekana anayekaa katika mbingu, katika ibada yenye msingi wa ubora wenye kulipia dhambi wa dhabihu ya Yesu Kristo. Katika nyua za kidunia za hekalu hili ndipo sisi tuwezapo kutoa dhabihu za sifa kwa Yehova. (Ebr. 13:15) Na ni kupitia kwa hekalu hili la kiroho tunapokea mafundisho katika njia za Mungu. Je! sisi tunalithamini hekalu hilo? Je! tunajisikia kama mtunga zaburi Daudi, aliyesema hivi juu ya nyumba ya Yehova: “Neno moja nimelitaka kwa [Yehova], nalo ndilo nitakalolitafuta, nikae nyumbani mwa [Yehova] siku zote za maisha yangu. Niutazame uzuri wa [Yehova], na kutafakari hekaluni mwake”?​—Zab. 27:4.

5. Kuhudhuria kwetu katika mikutano ya kundi kunaonyeshaje nia yetu juu ya hekalu la kiroho la Yehova?

⁵ Ikiwa ndivyo, tutakusanyika pamoja kwa kawaida na wale wanaomwabudu Yehova wanapokutana pamoja katika mikutano ya kundi. Jumba la Ufalme wanamokutania silo hekalu la Yehova. Lakini hapa ndipo wanapoweza kulisikia Neno la Mungu likisomwa na kuzungumzwa, sawa na ilivyofanywa katika hekalu Yerusalemu nyakati za kale. Hapa ndipo wanapojifunza namna ya kutumia mashauri ya Neno la Mungu katika maisha zao wenyewe. Hapa wanafurahia ushirika na wanaume wazee wa kiroho na pamoja na waabudu wengine wa Yehova. Kwa kuwako kwao katika mikutano hii, kwa kusikiliza sana na kwa kutumia mambo wanayojifunza kutokana na Neno la Mungu, wanaonyesha kwa njia yenye maana kwamba wanalithamini kweli hekalu kubwa la kiroho la Yehova. Je! wewe unathamini mambo ya Mungu? Lazima kila mtu aamue njia anayotaka kufuata​—kufuata mwendo wenye haki pamoja na watu wa Mungu au mbaya katika ushirika na ulimwengu. Je! wewe unathamini nini? Wewe unaona nini kuwa chenye ubora mwingi?​—1 Yohana 2:15, 17.

“LULU MOJA YA THAMANI KUBWA”

6. Ni katika njia gani Yesu alionyesha wingi wa kuthamini ambako lazima Mkristo awe nako kwa ufalme wa Mungu?

⁶ Katika kusaidia wanafunzi wake wasitawishe kuthamini mambo yaliyo na ubora mwingi zaidi, mambo ya Mungu, mara kwa mara Yesu alitumia mifano. Wakati mmoja alipokuwa Galilaya aliwaambia hivi: “Ufalme wa mbinguni umefanana na mfanya biashara, mwenye kutafuta lulu nzuri; naye alipoona lulu moja ya thamani kubwa, alikwenda akauza alivyo navyo vyote, akainunua.” (Mt. 13:45, 46) Huyu alikuwa mfanya biashara aliyejua ubora wa lulu. Alipoona ‘lulu fulani ya thamani kubwa’ aliiona kuwa yenye thamani kuliko mali zake zote. Aliuza vitu vyote alivyokuwa navyo kwa haraka, kila kitu alichokuwa nacho chenye thamani, ili ainunue ‘lulu moja hiyo ya thamani kubwa’ kupita zote. Wale ambao wangetaka waruhusiwe kuingia katika ufalme wa Mungu lazima wauthamini kadiri hiyo; lazima wauone kuwa wenye thamani hiyo.​—Linganisha Luka 13:24.

7. Yesu alionyeshaje kuthamini kwake mwenyewe Ufalme?

⁷ Yesu mwenyewe bila shaka aliweka mfano katika kufanya hivyo. Alipokuwa akisafiri kwa miguu kutoka mwisho mmoja wa nchi ya Israeli mpaka mwingine, alihubiri, “Ufalme wa mbinguni umekaribia.” (Mt. 4:17) Alizoeza na kutuma wengine wakashiriki katika kazi hiyo ya utangazaji. (Mt. 10:7) Si kwamba tu aliwaagiza mitume wake kwamba wangeshiriki pamoja naye katika ufalme wa kimbinguni, bali pia aliutoa uhai wake kama dhabihu ili iwezekane kwao kufanya hivyo. (Luka 22:19, 20, 28-30) Maandiko yanaonyesha kwamba wale ambao wangekuwa warithi washirika na Kristo katika ufalme wake na ambao wangetawala pamoja naye kwa miaka elfu wangekuwa 144,000 hesabu yao, na kwamba duniani ungekuwako “mkutano mkubwa” usiopewa hesabu ambao wangejihakikisha kuwa raia waaminifu wa ufalme huo.​—Ufu. 7:4-10; 14:3-5; 20:6.

8, 9. (a) Lazima ufalme wa Mungu uwe na thamani gani kwa wale watakaokuwa warithi washirika pamoja na Kristo? (b) Paulo alisema nini yaliyoonyesha namna alivyouona? (c) Je! bidii hiyo inatakiwa kwa wale wanaotumainia uzima wa kidunia kama raia za Ufalme?

⁸ Lazima ufalme wa Mungu uwe na thamani gani kwao? Wale ambao wangetaka wapate ufalme wa kimbinguni pamoja na Kristo lazima mwishowe wawe na nia ya kuacha mali zao zote za kidunia nyuma; lazima hata watoe maisha zao ili wapate ufalme wa kimbinguni. Lakini si kwamba tu lazima wawe na nia ya kufa kwa ajili yake; lazima pia waishi kwa ajili ya ufalme huo. (Luka 12:31) Kwa kufuata mfano wa Kristo lazima wawe wahubiri wa habari njema za ufalme huo. Mtume Paulo alitaja kuwa katika umoja na Kristo katika ufalme wa kimbinguni kulikuwa na thamani gani kwake, akisema hivi: “Nayahesabu mambo yote kuwa hasara kwa ajili ya uzuri usio na kiasi wa kumjua Kristo Yesu, Bwana wangu; ambaye kwa ajili yake nimepata hasara ya mambo yote nikiyahesabu kuwa kama mavi ili nipate Kristo; tena nionekane katika yeye, nisiwe na haki yangu mwenyewe ipatikanayo kwa sheria, bali ile ipatikanayo kwa imani iliyo katika Kristo, haki ile itokayo kwa Mungu, kwa imani; ili nimjue yeye, na uweza wa kufufuka kwake, na ushirika wa mateso yake, nikifananishwa na kufa kwake; ili nipate kwa njia yo yote kuifikia kiyama ya wafu. Si kwamba nimekwisha kufika, au nimekwisha kuwa mkamilifu; la! bali nakaza mwendo ili nipate kulishika lile ambalo kwa ajili yake nimeshikwa na Kristo Yesu. Ndugu, sijidhanii nafsi yangu kwamba nimekwisha kushika; ila natenda neno moja tu; nikiyasahau yaliyo nyuma, nikiyachuchumilia yaliyo mbele; nakaza mwendo, niifikilie mede ya thawabu ya mwito mkuu wa Mungu katika Kristo Yesu.” (Flp. 3:8-14) Ndiyo, Paulo alithamini kweli ubora wa mambo ya Mungu. Je! wewe unauthamini?

⁹ Kama vile wale wanaopata mahali katika ufalme wa Mungu lazima wahakikishe kwamba ni wenye thamani zaidi kwao kuliko kitu kingine cho chote walicho nacho, ndivyo, pia, wale ambao wangetaka kupendelewa na uzima wa milele kama raia za kidunia wa ufalme huo lazima waonyeshe kuthamini huko tumaini hilo la ajabu. Namna wanavyoliona itajaribiwa. Kwa sababu gani?

IMARA UJAPOKUWA UPINZANI

10. (a) Ikiwa kweli tunatetea ufalme wa Mungu, tutapata nini kutoka kwa ulimwengu? (b) Mitume walitendaje walipopata mateso hayo, na kwa sababu gani?

¹⁰ Mtu ye yote anayeonyesha imani kweli katika ufalme wa Mungu na kuuhubiri waziwazi atapata upinzani kutoka kwa ulimwengu. Alipokuwa akisema na wanafunzi wake juu ya mwisho wa taratibu hii ya mambo, Yesu aliwatayarisha kwa upinzani huo, akisema hivi: “Watawakamata na kuwaudhi; watawapeleka mbele ya masinagogi, na kuwatia magerezani, mkipelekwa mbele ya wafalme na maliwali kwa ajili ya jina langu. Na hayo yatakuwa ushuhuda kwenu.” (Luka 21:12, 13) Mtume Petro alikuwa mmoja aliyesikia Yesu akisema hayo, naye mwenyewe alipata mateso. Yeye na mitume wengine waliletwa mbele ya Baraza Kuu ya Kiyahudi (Sanhedrin). Kuhani mkuu aliwahoji akasema: “Je! hatukuwaamuru ninyi kwa nguvu, msifundishe kwa jina hili? nanyi, tazameni, mmeijaza Yerusalemu mafundisho yenu, na mnataka kuileta damu ya mtu yule juu yetu.” Bila kusita, lakini wakithamini kabisa pendeleo la kumwakilisha Yehova Mungu na Mwanawe Yesu Kristo, “Petro na mitume wakajibu, wakisema, Imetupasa kumtii Mungu kuliko wanadamu.”​—Matendo 5:27-29.

11, 12. (a) Mtume Petro alituomba tuoneje “majaribu” yanayotujia kwa sababu tunamtumikia Mungu, na matokeo yake? (b) Tunapokaribia ‘dhiki kubwa,’ mifano ya Ibrahimu na Musa inawezaje kutusaidia tuendeleze maoni yanayofaa?

¹¹ Ili afariji na kutia moyo wale waliokuwa wanaendelea kuthamini utumishi wa Mungu, Petro alizungumza matokeo ya majaribu yenye moto ambayo yangewapata. Aliandika hivi: “Mnafurahi sana wakati huo, ijapokuwa sasa kwa kitambo kidogo, ikiwa ni lazima, mmehuzunishwa kwa majaribu ya namna mbalimbali; ili kwamba kujaribiwa kwa imani yenu, ambayo ina thamini kuu kuliko dhahabu ipoteayo, ijapokuwa hiyo hujaribiwa kwa moto, kuonekane kuwa kwenye sifa na utukufu na heshima, katika kufunuliwa kwake Yesu Kristo.”​—1 Pet. 1:6, 7.

¹² Mtu anapoona ubora wa mambo ya Mungu kweli, haachi kusema kweli ati kwa sababu “majaribu” yanaweza kutokana na kufanya kwake hivyo. Anajua kwamba, sawa na Yesu alivyoteswa, ndivyo na wafuasi wake watakavyoteswa. Anajua kwamba “majaribu” hayo hayataendelea milele. Yana mwanzo, na yatafikia mwisho. Kama vile dhahabu inayotiwa katika moto wa mwenye kujaribu thamani ya madini isivyoachwa humo milele bali inatolewa, ndivyo Wakristo wanavyotoka katika joto la mateso. Lakini lo! imani hiyo ambayo imejaribiwa hivyo ni yenye thamani zaidi kuliko dhahabu inayoweza kutoweka. Ibrahimu alipopata habari za kuhamishwa kwa mpwa wake Lutu na wafalme wapagani, yeye hakusita kuonyesha matumaini yake katika Yehova. Alitenda akiwa na imani kamili, akabarikiwa kwa sababu hiyo. (Mwa. 14:13-20) Musa, pia, alionyesha kwamba imani yake ilikuwa katika Yehova, Mungu wa Ibrahimu, ingawa alilelewa katika cheo chenye upendeleo katika jumba la mfalme wa Misri. “Kwa imani Musa alipokuwa mtu mzima, akakataa kuitwa mwana wa binti Farao; akaona ni afadhali kupata mateso pamoja na watu wa Mungu kuliko kujifurahisha katika dhambi kwa kitambo.” Aliona aibu iliyoshirikishwa na kuwekwa kuwa mtumishi wa Mungu kama utajiri mkubwa zaidi kuliko hazina za Misri. (Ebr. 11:24-26) Sasa, namna gani imani yako wewe? Je! wewe unaliamini Neno la Mungu? Je! unaliona kuwa bora? Je! lina thamani kubwa sana kwako hata utaendelea kutia imani yako katika Mungu hata “majaribu” yo yote yakikupata kwa sababu ya kushikamana nalo? Lazima wote ambao ‘watatoka katika dhiki ile iliyo kuu’ kama waokokaji wake wenye tumaini la ajabu la uzima wa milele katika taratibu mpya ya Mungu iliyoko mbele yao waonyeshe kuthamini huko.​—Ufu. 7:14-17.

13. Kwa sababu wana imani, mashahidi wa Yehova wanaingia katika utendaji gani?

¹³ Imani ya namna hiyo ndiyo mashahidi wa Yehova ulimwenguni pote wameonyesha mwaka jana. Wao wanaithamini kweli. Wanajifunza hiyo kwa bidii. Lakini hawaifanyi iwe yao peke yao. Wanaieneza kwa wengine kwa bidii, yajapokuwa mateso yo yote wanayoweza kupata. Wao wanapenda uzima na wangependa kuona watu wengine wote wakipata uzima wa milele. Utapendezwa na waliyofanya kuonyesha kuthamini kwao mambo ya Mungu mwaka jana wa utumishi.

MILIONI MBILI WANAHUBIRI HABARI NJEMA!

14. Ni wangapi hasa walioshiriki katika kuhubiri habari njema mwaka jana, na matokeo yalikuwa nini?

¹⁴ Wakati wa mwaka jana wa utumishi (kutoka Septemba 1, 1973, mpaka Agosti 31, 1974) zaidi ya watu milioni mbili walishiriki katika kuhubiri habari njema pamoja na mashahidi wa Yehova. Walikuwako watu 2,021,432 waliotoa ripoti kwa makundi wanayoshirikiana nayo, wakionyesha kwamba, hawakuwa wameshiriki tu katika kuuhubiri ujumbe wa Ufalme, bali pia wanapanga kuendelea kufanya hivyo. Watu milioni mbili wakiwa wanafanya jambo lile lile, yaani, kwenda nyumba kwa nyumba na kutumia kila njia ifaayo kuhubiri habari njema za ufalme wa Mungu, na kulithamini kweli pendeleo la kufanya hivyo​—hiyo inaleta matokeo. Kwa hiyo ikawa kwamba wakati wa mwaka wa utumishi wa 1974 mashahidi wa Yehova walikuwa na furaha ya kuona watu 297,872 wakifanya maendeleo katika kuthamini kwao kweli ya Biblia hata wakabatizwa kwa kuonyesha wakf wao kwa Yehova Mungu. Hesabu hii walijishirikisha na wale ambao tayari walikuwa wanatangaza habari njema na kujitangaza wenyewe kuwa mashahidi wa Yehova wa Kikristo. Wao, pia, wanakwenda nyumba kwa nyumba sasa wakiwa na ujumbe wa Biblia, wakifanya ziara za kurudia juu ya wale wanaoonyesha kupendezwa na kweli na kujifunza Neno la Mungu pamoja nao katika nyumba zao.

15. Ni kwa kadiri gani mashahidi wa Yehova walijitia Katika utumishi wa shambani wakati wa mwaka?

¹⁵ Ni vigumu kuwazia hivi, lakini watu hawa zaidi ya milioni mbili (wote wanaotumikia ni wenye kujitolea, si kwa ajili ya faida yo yote ya pesa, bali kwa sababu ya kumpenda Mungu na kuhangaikia wanadamu wenzao) wametumia saa 371,132,570 katika kazi ya kuhubiri Injili. Walifanya ziara za kurudia 151,171,555 juu ya wale walioonyesha kupendezwa na Neno la Mungu, nao walikuwa wakiongoza mafunzo ya nyumbani ya Biblia 1,351,404 kwa wastani. Utendaji huu ulikuwa ukiendeshwa katika nchi na visiwa vya bahari 207 duniani mwote. Wakiwa wanathamini hivyo mambo ya Mungu, si ajabu kwamba mashahidi wa Yehova wamekuwa na matokeo mazuri sana katika kuhubiri habari njema miezi kumi na miwili iliyopita!

16. Ni vitabu, vijitabu na magazeti mangapi yaliyoangushwa, na kwa sababu gani?

¹⁶ Ili wasaidie watu wote wenye mioyo minyofu wapate maarifa sahihi ya kusudi lenye upendo la Mungu kwa wanadamu, mashahidi wa Yehova wanafurahia kuwatolea Biblia na vitabu vya kusaidia kujifunza Biblia. Mwaka jana waliangusha vitabu 27,581,852 vijitabu na magazeti 273,238,018 kwa watu wenye kupendezwa ili kuendeleza elimu hiyo ya Biblia. Tena, walipata maandikisho 2,387,904 ya magazeti ya Mnara wa Mlinzi na Awake!

17. Walitumia wakati wao mwingi katika utendaji gani mwingine, na kwa sababu gani?

¹⁷ Walakini, mashahidi wa Yehova hawakutumia wakati wao wote wakitembelea nyumba za watu wengine kuwatolea vitabu vinavyosaidia kujifunza Biblia na kujifunza hiyo pamoja nao. Waliweka kando pia wakati kuzungumza Neno la Mungu katika nyumba zao wenyewe na katika mikutano yao ya kundi. Na wakati wa mwaka jana wamejenga Majumba ya Ufalme mengi mapya, ambako wanakutania kwa kawaida kila juma wajengwe kiroho. Wao wanajua kwamba mikutano hiyo ni ya lazima katika maisha ya Mkristo. Kama vile Yesu mwenyewe alivyosema: “Imeandikwa, Mtu hataishi kwa mkate tu, ila kwa kila neno litokalo katika kinywa cha Mungu.”​—Mt. 4:4.

18. Sasa kuna makundi mangapi, na msingi wa mikutano yao ni nini?

¹⁸ Sasa kuna makundi 34,576 ya mashahidi wa Yehova wanaokutana katika Majumba ya Ufalme yao ulimwenguni mwote. Katika makundi yote haya Biblia ndicho kitabu kikuu kinachokaziwa fikira na ambacho ndicho msingi wa mazungumzo. Kila kundi linaangaliwa na wazee waliomo kati yao ambao ni waalimu wanaostahili wa Neno la Mungu. Wanapashana habari na maafisi ya matawi ya Watch Tower Society​—yako maafisi ya matawi 96​—na kupitia kwa haya wanapokea habari nyingi za kujifunza zenye kujenga kundi. Sikuzote unakaribishwa uhudhurie mikutano ya mashahidi wa Yehova katika lo lote la Majumba ya Ufalme yao. Ikiwa hujui lililo karibu zaidi liko wapi, jione huru kuandikia wachapaji wa gazeti hili uulize. Tutakupasha habari hizo kwa furaha. Katika Jumba la Ufalme utakutana na watu wengi sana wazuri, watu wenye kupendeza, ambao wamejiweka wakf kweli kweli kwa Yehova Mungu nao wanatafuta kwa unyofu wa moyo kufanya mapenzi yake. Wao wanasali hivi wakiwa na imani ya kweli: “Baba yetu uliye mbinguni, jina lako litukuzwe, ufalme wako uje, mapenzi yako yatimizwe, hapa duniani kama huko mbinguni.”​—Mt. 6:9, 10.

19. Ni watu wangapi waliohudhuria Ukumbusho mwaka jana, na Maandiko yanaonyeshaje ubora wa kuhudhuria mikutano?

¹⁹ Mashahidi wa Yehova wamekuwa na watu 4,550,457 katika Majumba ya Ufalme yao duniani mwote katika wakati mmoja. Hiyo ilikuwa Aprili 7, 1974, penye mwadhimisho wa Ukumbusho wa kifo cha Kristo. Je! wewe ulikuwa mmoja wa waliohudhuria?​—Ebr. 10:24, 25.

20. (a) Kama ilivyoonyeshwa katika orodha ya utumishi, ni nchi gani zilizoonyesha maongezeko makubwa katika hesabu ya wahubiri mwaka jana? (b) Hesabu ya mapainia ni kadiri gani ikilinganishwa na jumla ya wahubiri katika mahali kama Hawaii, Indonesia, Japan na Korea? (c) Ni katika nchi gani unazoona kwamba kila mhubiri ana zaidi ya funzo moja la Biblia?

²⁰ Ili kukupa habari zote juu ya kazi ya mashahidi wa Yehova ulimwenguni pote, tunachapa katika toleo hili la Mnara wa Mlinzi, katika ukurasa 302 mpaka 305, orodha yenye kuonyesha utumishi wa shambani wa mashahidi wa Yehova. Inapanga nchi zote ambako wamekuwa wakihubiri mwaka jana nayo inaonyesha hesabu ya wahubiri mmoja mmoja au watangazaji wa habari njema ambao wameshiriki katika kazi hii. Inaonyesha pia kuna wahubiri “mapainia” wangapi, yaani, watu mmoja mmoja wanaotoa walau saa 100 kila mwezi kuhubiri na kufundisha ujumbe wa Biblia kwa watu wasio Mashahidi. Pia utaona katika orodha hesabu ya watu waliobatizwa mwaka jana, wakati uliotumiwa katika kazi ya kuhubiri Injili, hesabu ya ziara za kurudia zilizofanywa na hesabu ya wastani ya mafunzo ya Biblia yaliyoongozwa ya miezi sita. Kazi yote hii inafanywa kwa kujitolea; wale wanaoishiriki wanalithamini pendeleo la kufanya hivyo nao wanaifurahia.

21. (a) Tunafuata mfano wa nani katika njia yetu ya kuhubiri? (b) Watu wanawezaje kufaidiwa na ujumbe

²¹ Mashahidi wa Yehova wanapokutembelea mlangoni pako, tafadhali sikiliza wanayosema. Wanakuletea ujumbe ulio wa maana kupita wote ulimwenguni​—ujumbe wa Mungu kwa wanadamu leo. Kumbuka kwamba Yesu aliwaendea watu moja kwa moja katika utendaji wake wa kuhubiri, hivyo akiweka mfano kwa wafuasi wake, mfano ambao mashahidi wa Yehova wanafuata leo. Mwanafunzi wa Kikristo Luka alisema hivi akizungumza juu ya Yesu: “Alikuwa akizunguka-zunguka katika miji na vijiji akihubiri na kuitangaza habari njema ya ufalme wa Mungu; na wale Thenashara walikuwa pamoja naye.” (Luka 8:1) Mashahidi wa Yehova wa Kikristo wanatembea katika nyayo za Yesu Kristo. Sasa, wakiwa wasiopungua 2,021,432 wanaoishiriki kazi hii, miji na vijiji vingi sana vitafikiwa mwaka ujao na inaelekea watakuwako watu wengine wengi watakaofanya utendaji uu huu wa Kikristo. Tafadhali wasikilize watakapokutembelea nyumbani kwako, kwa sababu hii itakusaidia ‘kupata uzima ulio kweli kweli.’​—1 Tim. 6:19.

22. Kusudi letu katika kuwa na mazungumzo ya Biblia na watu wenye nia ya kusikiliza ni nini?