Har-Magedoni—Kwa Nini Inasemwa Sana?

“HAR-MAGEDON!”​—jina hilo la Kibiblia lina maana gani? Mfululizo wa makala zenye habari nyingi zinazohusu kichwa hicho utakuwa katika matoleo manne ya Mnara wa Mlinzi ya Juni na Julai 1985, na kila mara jalada la gazeti litakuwa la hali yenye kupatana na habari. Inatumainiwa kwamba mazungumzo hayo ya Kimaandiko yatakufariji kwa kukujulisha maana yenyewe hasa ya HAR-MAGEDONI.

“Mwajua, ninarudia kuangalia manabii wenu wa kale katika Agano la Kale na ishara zinazotabiri Har–Magedoni, kisha najikuta nikijiuliza kama​—kama sisi ndicho kizazi kitakachoiona ikitokea.”​—Ronald W. Reagan, rais wa United States, Oktoba 18, 1983.

“Leo ufunuo si mtajo wa kibiblia tu bali umekuwa wenye kuelekea sana kutokea. Hatujapata tena kamwe katika mambo ya kibinadamu kuwa kwenye ncha nyembamba kati ya msiba mkubwa na wokovu.”​—Javier Perez de Cuellar, katibu mkuu wa Umoja wa Mataifa, Juni 8, 1982.

“HAR-MAGEDONl” imekuwa ndiyo mazungumzo ya ulimwengu. Neno hilo lenye kutisha sana linasikiwa zaidi na zaidi kutoka kwenye midomo ya viongozi wa kidini, wanasiasa, viongozi wa serikali, majemadari wa kijeshi, wanasayansi, na hata wanauchumi. Katika United States peke yake, neno Har–Magedoni linapatikana kwenye vichwa vya habari vya angalau vitabu 15 vilivyokuwa vikiuzwa mwaka 1983. Limekuwa ndilo lenye kuzungumzwa katika vitabu vingine vingi, vingine vya vitabu hivyo vikiwa vimeuzwa kufikia mamilioni ya nakala.

Huenda likaonekana kuwa jambo geni kwamba neno hilo limepata kujulikana upesi sana na watu wengi, kwa maana matumizi ya kwanza yaliyoandikwa ya neno Har–Magedoni yanapatikana katika Biblia​—na humo linatumiwa mara moja tu. (Ufunuo 16:16) Hata hivyo si viongozi wa kidini peke yao ambao wamekuwa wakitumia neno hilo. Katika miaka ya kuanza na wa 1800 neno Har–Magedoni lilianza kutumiwa katika maana isiyo ya Kibiblia pia. Lakini, haikuwa mpaka mapema ya kuanza na mwaka 1900 kwamba “Har–Magedoni” likawa neno la kueleza “mauaji yo yote makubwa” au “pigano la mwisho.”

Tangu wakati huo neno Har–Magedoni polepole limeingizwa katika matumizi ya mambo mbalimbali, kila moja likiipa maana iliyo tofauti kidogo. Mwaka wa 1912, Theodore Roosevelt, akifanya kampeni ya kuchaguliwa atawale kipindi kingine akiwa rais wa United States, alibadili neno hilo likawa na maana ya kisiasa. Alijivuna hivi: “Kwa moyo kamili na bila ya jicho kufifia, tunasimama kwenye pigano hilo la kisiasa la kutaka kuchaguliwa tena kwa kura.

Siku hizi ni wasiwasi mkubwa sana unaosababisha mazungumzo hayo juu ya Har–Magedoni: matisho ya kuangamizwa kwa dunia yote na nyukilia, baridi kali iliyo ndefu yenye kuletwa na kulipuliwa kwa silaha hizo zenye kutisha, vita vikubwa katika Mashariki ya Kati, au kuanguka kukubwa kwa ghafula kwa msingi wa uchumi wa ulimwengu. Kwa hiyo neno Har–Magedoni linaonekana hata katika sehemu lisilotazamiwa hata kidogo litokee:

◆ Sinema kamili ya Kijapani ya picha zenye maumbo ya kuchekesha yenye kichwa “Har–Magedoni katika Kichijoji” inaonyesha maumbo yenye kuchekesha yanayowakilisha wema na uovu katika pigano la kukata maneno.

◆ Kutokea kwa mara nyingine kulikotazamiwa mwaka 1986 kwa Nyota Yenye Mkia ya Haley kulifanya gazeti Frankfurter Neue Presse liseme kwamba “huenda kwa mara nyingine ikawa ni kionyesho cha kimbele cha Har–Magedoni” kwa washirikina.

Lakini hakuna lo lote la hayo ambalo ni Har–Magedoni yenyewe. Leo sauti nyingine inayotangaza Har–Magedoni inasikiwa. Ni sauti inayozidi kuwa kubwa sana na inayotolewa na watu zaidi ya milioni mbili na nusu. Je! wewe umekwisha kuisikia sauti hiyo? Kwa kusikiliza sauti hiyo, utaweza kujua Har–Magedoni ni nini na zaidi, namna ilivyo.