Ubashiri wa Matukio—Bado Ni Mtindo Unaoendelea
“MTU angewazia, katika siku hizi za mwangaza na elimu iliyoenea kabisa, kwamba hakungekuwa na uhitaji wa kuondolea mbali imani zinazotegemea ajabu za kiuchawi na woga wa ushirikina.” Hiyo ilikuwa sehemu ya taarifa moja iliyotiwa sahihi na wanasayansi mashuhuri 186, kutia na washindi 18 wa zawadi ya Nobeli. Wao walikuwa wakisema juu ya nini? Kulingana na wao unajimu ambao ni namna ya kawaida ya kubashiri matukio kwa kutumia nyota “umeenea katika kila sehemu ya jamii ya kisasa.” Je! wewe binafsi unaamini namna fulani za kubashiri matukio? Au labda wewe ni mtu wa kutia mashaka-mashaka, au hata mwenye kupinga vikali, kama wanasayansi hao mashuhuri? Maoni yako juu ya jambo hili ni ya maana. Acheni tuone kwa sababu gani ni hivyo.
Zoea hili limeenea sana sana. Kulingana na mnenaji wa mkutano mmoja wa wabashiri-matukio katika Paris, “Wafaransa milioni 4 wanaenda kila miezi sita wakaangaliwe na wabashiri-matukio.” Katika United States kuna wanajimu wa nusu-wakati wanaokadiriwa kuwa 175,000 na 10,000 wa wakati wote. Ni wengi sana pia katika Uingereza, ambako wana shule zao wenyewe. Na gazeti la Kifaransa Qa m’interesse (maana yake, Hiyo Inapendeza) linaeleza hivi: Kila mahali, kutia na katika jamii zilizoendelea zaidi ya nyinginezo, tunakuta takwimu zinazofanana na hizo. Wabashiri-matukio wanasitawi sana mwishoni mwa karne yetu.”
Ni Nani Anayewaendea—Na kwa Sababu Gani?
Huenda wengine wakaamini kwamba ni watu wasioelimishwa sana wa hali ya chini wanaopendezwa na “sayansi” hizo za kifumbo, ambazo kati yazo labda unajimu ndio umeenea zaidi ya zote. Lakini Madame Soleil, mnajimu Mfaransa anayejulikana sana, anafunua hivi: “Wote wananijia mimi, wawe ni wa vyama vinavyotaka au visivyotaka mabadiliko makubwa katika maongozi ya kisiasa, wanasiasa wa aina zote, na wakubwa wa nchi za kigeni. Ninapata hata mapadri na wakomunisti.” Kupatana na hilo, wakati mfanya-maajabu ya kiuchawi Frederic Dieudonne alipokufa, makala moja yenye kutokea katika Le Figaro, gazeti la kila siku la Kifaransa linaloandikwa mambo mazito-mazito, lilikumbusha kwamba yeye alivutia wateja wengi sana kati ya watu wa Paris, wahudumu wa makanisa, watu wenye vyeo vikubwa, waandikaji na waigizaji.”
Wacheza-kamari wanaendea wanajimu ili wajifunze jinsi ya kucheza kamari yao. Wafanya biashara wanawaendea ili wajue jinsi ya kutumia pesa zao kwa njia yenye kuleta faida. Hata wako tayari kukuambia ni wakati gani unaofaa kufunga safari au ni kitu gani unachopaswa kupika. Na ubashiri wa matukio umeingia katika nyanja nyingine pia. Polisi katika nchi tofauti-tofauti wanaendea waonaji ili waweze kutafuta wahalifu au watu waliopotea. Na kulingana na Le Figaro Magazine la Kifaransa linalotokea kila juma, “Idara ya Ulinzi ya United States inaajiri kazi watu 34 wenye kipawa cha [kubashiri matukio] ili wawe wakiipasha habari juu ya mambo yanayoendelea katika vituo vya kijeshi vilivyo vya siri katika Urusi.” Gazeti hilo hilo linaripoti kwamba Charles Rose ambaye ni mshiriki wa bunge kuu la United States kuwa akisema kwamba Warusi pia wanaendea wabashiri-matukio.
Kwa sababu gani unajimu ungali kawaida yenye kufuatwa sana? Je! hiyo ni tafrija au jambo la kupitishwa wakati tu lisilo na madhara? Je! hiyo ndiyo njia bora kabisa ya kujua mambo yaliyoko wakati ujao—au kuna njia iliyo nzuri zaidi? Acheni tuone kama tunaweza kupata majibu kwa maulizo hayo ya maana.