Aina ya Upendo Ulio Bora Zaidi

KATIKA Maandiko ya Kigiriki ya Kikristo, au Agano Jipya, mahali ambapo neno “upendo” linapatikana, limetafsiriwa kutokana na neno la Kigiriki a·gaʹpe.

Kikieleza maana ya neno hilo, kitabu Insight on the Scripturesa kinasema hivi: “[A·gaʹpe] si hali tu ya kuwa na hisia zinazotegemea uhusiano wa kibinafsi, kama vile ambavyo watu kwa kawaida hufikiri kuhusu upendo, lakini ni upendo wa kiadili au kijamii ambao msingi wake ni kukubali kufanya mambo kwa hiari kwa kutegemea kanuni, wajibu, na adabu, na kutafuta kwa unyofu mema kwa faida ya wengine kulingana na yaliyo haki. A·gaʹpe (upendo) unaomfanya mtu ashinde uadui, hauruhusu kamwe uadui kumfanya mtu aache kanuni za haki na kulipiza kisasi.”

Upendo wa a·gaʹpe unaweza pia kutia ndani hisia nzito. Mtume Petro alionya hivi: “Iweni na upendo wenye juhudi nyingi [a·gaʹpe] nyinyi kwa nyinyi.” (1 Petro 4:8) Hivyo, inaweza kusemwa kwamba a·gaʹpe inahusisha moyo na vilevile akili. Kwa nini usichunguze baadhi ya maandiko yanayoonyesha nguvu na uwezo wa aina hii ya upendo ulio bora? Maandiko yafuatayo yanaweza kukusaidia sana: Mathayo 5:43-47; Yohana 15:12, 13; Waroma 13:8-10; Waefeso 5:2, 25, 28; 1 Yohana 3:15-18; 4:16-21.

[Maelezo ya Chini]