Majibu ya Maswali ya Biblia

Je, Mungu husikiliza sala zote?

Mungu husikiliza watu wa mataifa yote. (Zaburi 145:18, 19) Neno lake, Biblia, hutuhimiza tumweleze jambo lolote linalotuhangaisha. (Wafilipi 4:6, 7) Hata hivyo, si sala zote zinazompendeza Mungu. Kwa mfano, hapendezwi na sala zenye maneno yanayorudiwa-rudiwa.​—Soma Mathayo 6:7.

Pia, Yehova hapendezwi na sala za watu wanaovunja sheria zake kimakusudi. (Methali 28:9) Kwa mfano, katika nyakati za Biblia, Mungu alikataa kuwasikiliza Waisraeli waliokuwa na hatia ya kuua. Kwa kweli, ni lazima tutimize mambo fulani ili Mungu atusikilize.​—Soma Isaya 1:15.

Tunapaswa kufanya nini ili Mungu atusikilize?

Ili Mungu atusikilize tunapaswa kusali tukiwa na imani. (Yakobo 1:5, 6) Ni lazima tuwe na hakika kwamba yupo na anatujali. Tunaweza kuimarisha imani yetu kwa kujifunza Biblia kwa sababu imani ya kweli hutegemea uthibitisho na uhakika unaopatikana katika Neno la Mungu.​—Soma Waebrania 11:1, 6.

Tunapaswa kusali kwa unyoofu na kwa unyenyekevu. Hata Yesu, Mwana wa Mungu, alisali kwa unyenyekevu. (Luka 22:41, 42) Hivyo, badala ya kumwambia Mungu jambo la kufanya, tunapaswa kujitahidi kuelewa sheria zake kwa kusoma Biblia. Na hivyo tunaweza kusali kupatana na mapenzi ya Mungu.​—Soma 1 Yohana 5:14.