HABARI KUU | JE, KUNA FAIDA YOYOTE TUNAPOSALI?
Kwa Nini Watu Husali?
“Nilipenda sana kucheza kamari. Nilikuwa na kawaida ya kusali ili nishinde. Lakini sikuwahi kushinda.”—Samuel,a Kenya.
“Tulipokuwa shuleni tulikariri na kusali sala tulizofundishwa.”—Teresa, Ufilipino.
“Mimi husali ninapopata matatizo. Ninasali ili kuomba msamaha wa dhambi na ili kuwa Mkristo anayefaa.”—Magdalene, Ghana.
Maelezo yaliyotolewa na Samuel, Teresa, na Magdalene yanaonyesha kwamba watu husali wakiwa na malengo mbalimbali, mazuri au mabaya. Baadhi ya watu husali kutoka moyoni; na wengine hawasali kutoka moyoni. Hata hivyo, iwe wanasali ili kufaulu mitihani shuleni, timu wanayoipenda ishinde, Mungu asaidie familia zao, au kwa sababu zozote zile, watu wengi huona kuna uhitaji wa kusali. Kwa kweli, utafiti mwingi uliofanywa unaonyesha kwamba hata baadhi ya watu wasio na dini husali kwa ukawaida.
Je, wewe husali? Ikiwa ndiyo, basi unasali kwa ajili ya nini? Iwe una kawaida ya kusali au la, huenda ukajiuliza: ‘Je, kuna faida yoyote tunaposali? Je, kuna yeyote anayesikiliza sala?’ Mwandishi mmoja alisema sala ni “aina mojawapo ya matibabu . . . sawa na kuzungumza na samaki unayemfuga.” Wataalamu wa tiba wana maoni hayo pia, nao husema kwamba sala ni aina mojawapo ya “tiba mbadala.” Je, watu wanaotoa sala hupata faida yoyote nyingine?
Tofauti na maoni ya watu wengi, Biblia inataja kwamba sala ina faida nyingi zaidi ya kuwa tiba. Inasema kwamba kuna mtu anayesikiliza sala zinazotolewa kwa njia inayofaa na kwa mambo yanayofaa. Je, jambo hilo ni la kweli? Acheni tuone uthibitisho.
a Baadhi ya majina yamebadilishwa.