Jinsi ya Kufanya Funzo Lako la Biblia Liwe Lenye Kunufaisha na Kufurahisha Zaidi

Yoshua akisoma Sheria; kuta za Yeriko zaanguka lakini nyumba ya Rahabu yaendelea kusimama; Yoshua asali huku akiwa ameinua mikono yake juu kuelekea mbinguni

YOSHUA anakabili changamoto fulani yenye kutisha. Lazima aongoze taifa la Israeli kuingia katika Nchi ya Ahadi licha ya hali ngumu na zenye kuogopesha. Hata hivyo, Yehova anamhakikishia kwamba atafanikiwa, na anamtia moyo hivi: ‘Uwe jasiri na imara. Fuata Sheria yangu. Isome mchana na usiku, ili ufuate kwa uangalifu mambo yote yaliyoandikwa humo. Ndipo utafanikiwa na kutenda kwa hekima.’—Yos. 1:7, 8.

Katika “nyakati [hizi] za hatari zilizo ngumu kushughulika nazo,” sisi pia tunakabili hali nyingi ngumu. (2 Tim. 3:1) Kama Yoshua, sisi pia tunaweza kufanikiwa kwa kufuata ushauri ambao Yehova alimpa. Tunahitaji kusoma Biblia kwa ukawaida na kuwa makini kutumia kanuni zake tunapokabili majaribu.

Lakini huenda wengi wetu tukakiri kwamba sisi si wapenzi wa kusoma, na kwamba kujifunza ni jambo gumu. Hata hivyo, kwa kuwa kujifunza Biblia ni jambo muhimu sana, chunguza kisanduku chenye kichwa “Jaribu Kutumia Mapendekezo Haya” ili uone madokezo yanayoweza kukusaidia kufanya funzo lako la Biblia liwe lenye kunufaisha na kufurahisha zaidi.

Mtunga zaburi aliimba hivi: “Niongoze katika njia ya amri zako, kwa maana ninapendezwa nayo.” (Zab. 119:35) Unaweza kupata furaha nyingi kwa kuchunguza Neno la Mungu. Kuna vito vingi vyenye thamani utakavyopata ikiwa utaendelea kuchimba ili kutafuta hazina za kiroho.

Ingawa hutaongoza taifa kama Yoshua alivyofanya, bila shaka unakabili changamoto fulani za kibinafsi. Hivyo basi, kama Yoshua, jifunze na kushika mambo yaliyoandikwa yaliyokusudiwa kukunufaisha. Utakapofanya hivyo, wewe pia utafanikiwa na kutenda kwa hekima.

JARIBU KUTUMIA MAPENDEKEZO HAYA

Sali kabla ya kujifunza. Biblia ina mawazo ya Mungu mweza yote ambayo yeye mwenyewe aliyahifadhi ili yakunufaishe. Hivyo, unapojifunza Biblia, mwombe akusaidie kuielewa, kukumbuka mambo unayojifunza, na kuyatumia maishani mwako.—Ezra 7:10.
Jiulize maswali unaposoma Biblia au machapisho yanayotegemea Biblia. ‘Habari hii inanifundisha nini kumhusu Yehova? Inahusianaje na ujumbe wa msingi unaopatikana katika Neno lake? Ninaweza kutumiaje habari hizi kuwasaidia wengine?’
Tafakari mambo unayojifunza. Unaposoma, tua, na ujiulize: ‘Habari hii inafanya nihisije? Kwa nini inanifanya nihisi hivyo? Inahusianaje na mambo niliyopitia maishani, hali ninayopitia kwa sasa, au matukio yanayoweza kutukia wakati ujao? Ninaweza kutumiaje kanuni hizi za Biblia na shauri hili maishani mwangu?’ (Ayu. 23:5; Zab. 49:3) Ona ikiwa unaweza kueleza kwa nini Yehova huwahimiza watu wake waepuke mazoea fulani, au kueleza matokeo ambayo mtu anaweza kupata ikiwa ataamua kutenda kinyume.—Kum. 32:28, 29.
Tumia uwezo wako wa kuwazia unaposoma masimulizi. Kwa mfano, je, unaweza kupiga picha akilini ndugu za Yosefu wakimuuza Yosefu kwa Waishmaeli? (Mwa. 37:18-28) Unaona nini, unasikia nini, na unanusa nini? Jiweke katika hali za wahusika. Wanafikiria nini, na wanahisije? Mawazo kama hayo yatafanya funzo lako la Biblia liwe halisi zaidi na lenye kunufaisha.
Tumia vifaa vya kujifunza ambavyo vimeandaliwa ili kuboresha utafiti wako. Jitahidi kujua jinsi ya kutumia vifaa vinavyopatikana katika lugha yako, vya mtandaoni na vilivyochapishwa. Usisite kuwaomba wengine wakusaidie kujua jinsi ya kuvitumia vizuri. Kwa mfano, Fahirisi au Mwongozo wa Utafiti wa Mashahidi wa Yehova, utakusaidia kupata mambo yaliyoandikwa kuhusu habari mbalimbali na pia kupata maelezo kuhusu mistari mingi ya Biblia. Tumia nyongeza za Biblia Takatifu—Tafsiri ya Ulimwengu Mpya ikiwa inapatikana katika lugha unayofahamu. Nyongeza hizo zina habari muhimu kuhusu maeneo, mfuatano wa matukio, uzito au vipimo mbalimbali, na kadhalika.
Fanya muhtasari wa mambo makuu ili ukusaidie kukumbuka mambo uliyotoka tu kujifunza. Na jambo bora hata zaidi, waambie wengine mambo uliyojifunza. Je, kuna jambo lolote unaloweza kutumia katika huduma yako? Kwa kufanya hivyo, utaendelea kuyakumbuka mambo makuu uliyojifunza na pia kuyatumia kuwanufaisha wengine.