Wasaidie Wengine Wathamini Upendo wa Mungu

¹ “Bali Mungu aonyesha pendo lake yeye mwenyewe kwetu sisi, kwa kuwa Kristo alikufa kwa ajili yetu, tulipokuwa tungali wenye dhambi.” (Rum. 5:8) Maneno hayo yanafunua kani yenye kusukuma ahadi ya Yehova ya kuokoa aina ya wanadamu kutoka katika dhambi, huzuni, na kifo. (Yn. 3:16) Ukuu wa upendo wa Mungu unaweza kuthaminiwa zaidi katika njia ya kwamba yeye alifanya hivyo kwa aina yote ya wanadamu, hata ingawa walio wengi hawakubali Uungu wake wala uwezo wake wa kuongoza maisha zao.

² Kwa kuwa nafasi ya uhai wa milele inapatikana kwa watu wote, tunataka kufanya yote tuwezayo kukuza uthamini kwa upendo wa Mungu katika mioyo ya wale ambao sisi tunashiriki habari njema pamoja nao. Ikiwa watu watamtumikia Yehova katika njia yenye kukubalika, wao wanahitaji kuthamini yote ambayo yeye amewafanyia, hasa kupitia dhabihu ya ukombozi ya Mwanaye. Sisi tunaweza kuwasaidiaje wathamini upendo mkuu wa Mungu?

UKUMBUSHO

³ Ijumaa, Aprili 1, 1988, watu wa Yehova watafanya ukumbusho wa kifo cha Yesu Kristo. Hotuba ya Kimaandiko itakayotolewa katika pindi hiyo inaweza kuwasaidia wapya wengi watakaohudhuria ili wathamini kikamili zaidi upendo wa Mungu na uhitaji wa kuishi kulingana na mapenzi yake. Kwa vyo vyote waalike watu wengi uwezavyo wawepo kwenye Ukumbusho. Je! wewe umefikiria kuwaalika majirani wako? Namna gani watu wa ukoo wako, wanashule wenzako, na wafanya-kazi wenzako? Tumia kikaratasi cha ukaribishaji kilichochapishwa na Sosaiti ili kikusaidie wewe uanze mazungumzo.

⁴ Wazee wanatiwa moyo wafanye matayarisho kamili kwa ajili ya sherehe ya Ukumbusho. Je! kuna maandalizi ya kutosha wote ambao wanatazamiwa kuhudhuria, viti zaidi vikitafutwa ikiwa inahitajiwa? Mahali ambapo kundi zaidi ya moja litatumia jumba, mipango yenye utaratibu na ratiba inayofaa inahitajiwa ili kwamba kila kundi liwe na wakati wa kutosha kusherehekea Ukumbusho. Baraza la wazee lapaswa kuchagua msemaji anayestahili ambaye atatoa habari kwa uwazi na kwa njia ya Kimaandiko. Hii itawasaidia wote wanaohudhuria wathamini kile ambacho Mungu amefanya kwa ajili yao. Kama tokeo, wao wataweza kuona uhitaji wa kuitikia upendo wake kwa moyo wote.—Ona toleo la Mnara wa Mlinzi, wa Machi 1, 1985, ukurasa 17.

TOA KITABU CREATION

⁵ Kuongezea zawadi ya Mwana wake, Yehova pia ameonyesha upendo wake kwa aina ya wanadamu kwa vitu ambavyo yeye ametengeneza. Hata hivyo, mamilioni hawampi Yehova sifa kwa uumbaji wa ajabu unaotuzunguka. Watu wanahitaji kuthamini ukweli kuhusu chanzo cha uhai. Kwa sababu gani? Kwa sababu kama inavyoonyeshwa katika fungu 3 kwenye ukurasa 8 wa kitabu Creation: “Mwelekeo wetu wote kuhusu uhai na wakati ujao unaongozwa na maoni yetu kuhusu chanzo cha uhai. Na jinsi uhai ulivyotokea bila shaka utaathiri mwendo wa wakati ujao wa historia na sehemu yetu katika huo.” Kichwa chetu Kipya cha Mazungumzo na kitabu Creation vinaweza kutumiwa kuwasaidia watu mmoja mmoja wenye mioyo ya kufuata haki wathamini kwamba Yehova ndiye Muumba wa uhai na mpango wa jamaa.

⁶ Machi na Aprili imethibitika kuwa miezi bora ya kushiriki katika utumishi wa painia msaidizi. Bila shaka wazee wengi na watumishi wa huduma, pamoja na washiriki wa jamaa zao, wataweza kushiriki, hivyo wakiweka kielelezo kizuri kwa kundi.

⁷ Wakati wa Machi, tumia kila nafasi kuwasaidia wengine wathamini upendo wa Mungu kwa kuwaalika wapya kwenye Ukumbusho na kwa kutoa kitabu Creation. Hivyo tunaweza kuonyesha kwamba sisi tunathamini sana upendo wa Yehova.