Kutangaza Habari Njema—Kwa Kutumia Trakti Katika Kila Fursa
1 Mimea fulani inaweza kuzaa mamia au maelfu ya mbegu. Katika njia hii, Yehova alihakikisha kwamba uhai wa mimea kama huo ungesitawi sikuzote duniani.—Mwa. 1:29, 30.
2 Vivyo hivyo, kwa ukarimu wake mkubwa sana, Yehova anafanya mbegu ya kweli ya Ufalme iwe nyingi si katika vinywa vya watumishi wake waliojitoa tu bali pia kwa namna ya ukurasa uliochapishwa. Ebu fikiria mamia ya maelfu ya vitabu, vijitabu, magazeti, na broshua ambazo zimegawanywa muda wa miaka. Mwaka uliopita seti mpya ya trakti ilitolewa. Je! sisi tunatumia trakti hizo kueneza habari njema katika kila fursa?
3 Ili tutumie trakti kwa matokeo mazuri, tunahitaji kuzoeleana nazo. Si kwa sababu tu zina rangi nzuri na zimechapishwa kwenye karatasi yenye kudumu. Ukubwa wazo unaofaa unafanya iwezekane kwetu kuzipeleka baadhi yazo ko kote tuendako. Jambo la maana zaidi, ujumbe unaotegemea Biblia ulio katika kila trakti ni wazi, unagonga kichwa cha msumari, na ni wenye kusadikisha. Je! wewe unaona fursa nyingi za kuzitumia?
4 Kazi ya Nyumba kwa Nyumba: Wahubiri wengi wanaona kwamba kutoa trakti ya bure katika utangulizi wao kunafungua njia ya kuwa na mazungumzo pamoja na mwenye nyumba. Huenda ukapenda kujaribu njia hii pamoja na Kichwa cha Mazungumzo cha sasa, ukitumia Uzima Katika Ulimwengu Mpya Wenye Amani au Sababu Kwa Nini Wewe Unaweza Kuitumaini Biblia. Wakati wa mazungumzo mlangoni, huenda ukapata kujua kwamba mtu huyo alipoteza mpendwa wake katika kifo hivi karibuni. Jinsi ingefaa kushiriki pamoja naye ujumbe wenye faraja ulio katika trakti Kuna Tumaini Gani kwa Wapendwa Waliokufa? Au mazungumzo hayo yanaweza kufunua kwamba mtu huyo ana dhana fulani zisizo sahihi kuhusu Mashahidi wa Yehova. Trakti Mashahidi wa Yehova Wanaamini Nini? huenda ikawa ndicho kitu kinachohitajiwa. Mara nyingi mwenye nyumba ana nia ya kukubali trakti hata kama anakataa kuchukua kitabu. Hatujui matokeo ambayo trakti moja inaweza kuwa nayo kwa mtu huyo au wengine katika nyumba yake ambao huenda wakaisoma.—Mhu. 11:6.
5 Ushuhuda wa Vivi Hivi: Wakati wa shughuli zetu za kila siku, tunaweza kukutana na idadi yo yote ya watu wa ulimwengu. Po pote tulipo, trakti zinatusaidia tujitayarishe kutoa ushuhuda. Fursa ya kutoa ushuhuda kwa mazungumzo mafupi inaweza kuongezewa kwa kumtolea mtu trakti ili aisome baadaye.
6 Katika mahali pako pa kazi, je! wafanya kazi wenzako na watu wengine wanazungumza juu ya mikazo na matatizo ya kuishi katika mfumo huu wa mambo? Je! wangependa kujua ni kitu gani ambacho kimekupa tumaini kwa wakati ujao? Ikiwa kweli wao “wanaugua na kulia” kwa ajili ya hali zisizo za adili za ulimwengu huu, habari inayopatikana katika Uzima Katika Ulimwengu Mpya Wenye Amani itagusa mioyo yao waitikie, ikifungua njia kwa ajili ya mazungumzo zaidi.—Ezek. 9:4.
7 Je! ninyi wachanga mlio shuleni mnawasikia walimu na wanafunzi wenzenu wakitilia mashaka uhakika wa Biblia? Sababu kwa Nini Wewe Unaweza Kuitumaini Biblia ina ujumbe wenye kujenga imani ukionyesha usahihi wa sayansi na historia kuhusu Biblia ambao unaweza kuchochea kupendezwa kwao katika kutaka kujifunza mengi.
8 Yesu alisema kwamba shamba letu la kutoa ushuhuda ni dunia yote inayokaliwa. (Mt. 13:38; 24:14) Hivyo, po pote ambapo pana watu—kazini, shuleni, katika chumba cha kungojea cha daktari au tabibu wa meno, madobini au madukani, nyumbani kwa watu wa ukoo au majirani, au hata mlangoni petu wenyewe wakati watu wanapokuja kwa sababu mbalimbali—na tuchukue kila fursa ili kueneza mbegu za habari njema za Ufalme, tukiitibari kwamba baadhi ya hizi zitaangukia “udongo mzuri” na kutokeza tunda zaidi kwa sifa ya Yehova.—Mt. 13:23.