Kujenga Mahusiano ya Karibu ya Familia
1 Kukiwa na madai mengi sana kwa wakati wao, wazazi wakabili tatizo katika kujenga familia ambayo ni imara katika ibada ya kweli. Familia za Kikristo huhitaji kifungo cha karibu kinachoandaa tegemezo katika nyakati hizi ngumu. (Mhu. 4:9-12; 2 Tim. 3:1-5) Kadiri hali ya kiroho ikuavyo, familia huwa yenye umoja zaidi nayo itaimarishwa istahimili mashambulio ya Shetani na mfumo wake.
KUJENGA SIFA ZA KIROHO
2 Mikutano ya kundi na funzo la familia ni mambo yanayohitajiwa kabisa katika ratiba ya familia ya kila juma. (Kum. 6:6, 7; Ebr. 10:23-25; wSW86 11/1 kur. 23-5) Lakini, zaidi yanahitajiwa. Kungali kuna pengo ikiwa hayo tu ndiyo mazoezi ya kiroho wanayopata watoto.
3 Uhusiano mzuri wa familia husitawi wakati wazazi wanapopendezwa kihalisi na masilahi ya kiroho ya watoto. Katika Israeli, wazazi walikuwa na daraka la kuelimisha na kuzoeza watoto wao, wakiwapa maagizo kwa neno na kielelezo pia. Programu ya elimu ya Kiisraeli ilitia ndani mazoezi yenye kutumika kwa ajili ya maisha ya mtu mzima, kufundisha stadi za msingi za kusoma na kuandika, na maagizo ya kusitawisha sifa za kiroho. Katika kuelimisha watoto, mkazo ulitiwa juu ya kuwafundisha kumhofu Yehova, Sheria, staha kwa wazazi na watu wa umri mkubwa zaidi, na umaana wa utii.
4 Jitahidi kutumia wakati wa hali bora pamoja na familia yako kila siku. Mambo ya kiroho yaweza kuzungumzwa kwa kikao cha vivi hivi, kama vile wakati wa mlo. Mzazi mmoja alionelea hivi kwa hekima: “Wazazi watatumia wakati pamoja na watoto wao—ama katika kusitawisha sifa za kiroho au katika kuwasaidia watoke katika tatizo moja baada ya jingine.” Ni afadhali kama nini kujenga katika watoto sifa za kiroho zinazohitajiwa ili waweze kuepuka mitego ya ulimwengu.
KUONEA SHANGWE UTENDAJI WA UTUMISHI WA SHAMBANI
5 Shangwe ni hisiamoyo inayochochewa na kupata au kutarajia mema. Wakati mtu anapojitayarisha kwa ajili ya utumishi wa shambani, aweza kutazamia kwa kufaa matokeo mazuri. Hivyo, kujitayarisha ndio ufunguo wa kuwa na utumishi wa shambani wenye shangwe. Kujizoeza kwa ukawaida mtakayosema mkiwa familia kabla ya kwenda katika utumishi wa shambani hujenga uhakika. (Linganisha Tito 3:1b.) Kila mmoja aweza kuwa na mradi akilini. Utoaji sahili waweza kufanyiwa mazoezi pamoja na watoto wachanga au wale ambao wametoka tu kuanza utumishi wa shambani.
6 Kwa kufanya kazi pamoja na watoto wao katika huduma ya Kikristo, wazazi waweza kuwasaidia wasitawishe upendezwaji wa kibinafsi kwa watu unaotolewa kielelezo na Yehova na Yesu. Pia huduma hutusaidia kusitawisha uhusiano wa karibu pamoja na Yehova. (w81 11/1 kur. 14-20 au wSW82 6/1 kur. 17-24) Baadhi ya familia huratibu siku nzima pamoja, wakipanga tafrija yenye kufaa kufuata utumishi wa shambani. Hilo laruhusu wakati kwa ajili ya mazungumzo katika mazingira yenye starehe na huvuta wazazi na watoto pamoja.
7 Azimieni kusitawisha stadi za uwasiliano zinazohitajiwa ili kuendeleza uhusiano wa karibu pamoja na watoto wenu. Msiruhusu chochote kiwazuie kutwaa wakati unaohitajiwa kabisa kuimarisha familia zenu kiroho. Salini kwa ajili ya watoto wenu na pamoja nao, mkijua kwamba Yehova aweza kufanikisha jitihada zenu za ujenzi.—Zab. 127:1; Mit. 24:3.