Wenye Shukrani kwa Yale Tuliyo Nayo
1 “Mungu aonyesha pendo lake yeye mwenyewe kwetu sisi, kwa kuwa Kristo alikufa kwa ajili yetu, tulipokuwa tungali wenye dhambi.” (Rum. 5:8) Sisi sote twapaswa kuwa wenye shukrani kama nini kwa dhabihu bora zaidi iliyofanywa na wote wawili Yehova Mungu na Mwana wake kwa niaba yetu! Kupitia damu ya Kristo iliyomwagwa, twapewa fursa ya uhai wa milele, jambo ambalo hakuna binadamu awezaye kutupa.
2 Twaweza kuonyeshaje uthamini wetu? Kuna watu wengi walio na kiu ya ujuzi wa kweli, unaoweza kupatikana tu katika Neno Takatifu la Mungu. Ni mapenzi ya Yehova kwamba wapate ujuzi wa kweli. (1 Tim. 2:4) Twaonyesha uthamini wetu kwa ile kweli kwa ‘kutangaza habari njema za Ufalme wa Mungu.’ (Luka 4:43, NW) Ushiriki wa moyo mzima katika kazi hii waonyesha kwamba twathamini kwamba Kristo alikufa kwa ajili yetu na kwamba twataka kumwiga kwa kutii kwa uaminifu amri yake ya kufanya wengine kuwa wanafunzi.—Mt. 28:19, 20.
3 Ni baadhi ya njia zipi za kuhubiri zilizo wazi kwetu? Je, yawezekana kwetu kujiandikisha kuwa mapainia-wasaidizi mara kwa mara? Baada ya kuhesabu gharama, wengine huenda wakaweza kuchukua utumishi wa painia wa kawaida. Kwa kutumia kwa manufaa fursa hizi, twaweza kuongeza kiwango cha wakati tunachotumia kwa kueneza habari njema za Ufalme. Nyakati zilizopita huenda ulifikiria kujiandikisha, lakini kulikuwa na vizuizi. Labda hali zako zimebadilika. Ikiwa ndivyo, je, umefikiria kwa uzito kuingia utumishi wa painia au kutumikia ukiwa painia-msaidizi?
4 Kuwa kwetu wenye shukrani huongezeka zaidi tunapoangalia yanayotendeka kutuzunguka. Kuna ongezeko la jeuri, chuki, na mapigano ulimwenguni pote. Paulo alieleza vizuri nyakati zetu kuwa “za hatari” na “ngumu kushughulika nazo.” (2 Tim. 3:1, NW) Miongoni mwa hali hizi zenye mkazo, tuna habari njema kwa wingi za kushiriki pamoja na wengine. Tuna magazeti mawili mazuri, Mnara wa Mlinzi na Amkeni! Mwezi huu twaweza kutoa nakala moja-moja au maandikisho. Pia tuna broshua zinazozungumzia mambo mbalimbali. Vichapo hivi vyaweza kuleta burudiko halisi kwa wale wavisomao. Kuwa wenye shukrani kwa yale tuliyo nayo kwapasa kutusukuma kuwa wakarimu katika kuyashiriki pamoja na wengine.—Ebr. 13:16.
5 Huenda ikawa kwamba katika eneo unamoishi mna idadi ya kutosha ya wahubiri na makutaniko ili kufanyia kazi eneo kikamili kwa kufaa. Tofauti na hilo, kuna maeneo mengi yenye matokeo ambamo wafanyakazi ni wachache. (Mt. 9:37) Je, yawezekana kwamba unaweza kutumika katika eneo fulani katika nchi yako mahali palipo na uhitaji wako hasa? Ikiwa si kwa muda wote je, waweza kuhubiri huko kwa muda mfupi ama wakati wa kampeni ya eneo lililo pekee ama labda wakati wa kipindi chako cha likizo? Mwangalizi wa mzunguko wako huenda akawa na madokezo kuhusu haya. Unaweza pia kuandikia ofisi ya tawi ukiwa na pendekezo kutoka kwa baraza la utumishi lenu kuhusu kupatikana kwako na sifa zako.
6 Kuna kila sababu ya kuwa wenye shukrani kwa yale tuliyo nayo, kwa kweli, wingi wa vitu vyema. Shukrani zetu kwa Yehova zaweza kuonyeshwa vizuri zaidi kwa kujulisha jina lake na makusudi yake kwa wengine.—Isa. 12:4, 5.