Uwe Macho Kutafuta Viziwi Katika Eneo Lenu
1 Yehova anatoa mwaliko: “‘Njoo!’ . . . Acha yeyote atakaye achukue maji ya uhai bure.” (Ufu. 22:17) Idadi inayoongezeka ya viziwi ipo miongoni mwa wale wanaoitikia mwito huo. Hivyo, makutaniko kadhaa yana ndugu na dada ambao ni viziwi.
2 Ijapokuwa tuna wahubiri ambao wamejifunza lugha ya ishara na wanaweza kujitahidi kuwahubiria viziwi na watu walio na matatizo ya kusikia katika maeneo yao, kungali na watu wengi wenye matatizo hayo ambao wanahitaji kuhubiriwa katika eneo letu.
3 Unaweza Kusaidiaje? Unapokuwa katika maeneo ya umma, je, umeona watu wakitumia lugha ya ishara? Je, unajua mtu mmoja kazini kwako au shuleni ambaye ana mshiriki wa familia aliye kiziwi? Na uwe macho kutafuta wale ambao ni viziwi unapoendelea na shughuli zako za kila siku. Lakini utahakikishaje kwamba watapelekewa ujumbe wa Ufalme?
4 Kuwahubiria: Julisha mwandishi wa kutaniko mahali anapoishi kiziwi. Mwandishi atachunguza kama kuna kikundi kilicho karibu cha lugha ya ishara. Viziwi wengi hufanya maendeleo ya haraka katika kujifunza kweli wanapoweza kushirikiana na Mashahidi viziwi katika mikutano ya kutaniko inayotumia lugha ya ishara. Ikiwa kuna kikundi cha lugha ya ishara katika eneo lenu, mwandishi wa kutaniko lenu anapaswa kukipelekea habari kuhusu viziwi wote katika eneo lenu.
5 Vipi ikiwa hakuna mtu anayeweza kuwasaidia viziwi kiroho katika eneo lenu? Unaweza kuwasaidiaje? Kwa nini usifanye ziara ya kurudia na uongee na washiriki wengine wa familia hiyo ambao si viziwi? Jitolee kumwonyesha video ya lugha ya ishara ikiwezekana, ili uamshe upendezi wa kiziwi huyo. Wahubiri wengine wamejifunza lugha ya ishara ili wafanikiwe kuwahubiria viziwi. (Mdo. 16:9, 10) Kuna video za broshua Anataka na kitabu Ujuzi katika Lugha ya Ishara ya Marekani. Kuongoza mafunzo ya Biblia kwa kutumia vifaa hivyo inapowezekana, tayari kumeleta matokeo yenye kufana sana. Katika kutaniko moja ambapo kiziwi mwenye kupendezwa alijua kusoma na kuandika, mhubiri aliongoza funzo kwa kuandika maswali na yule kiziwi akaandika majibu. Maelezo mengineyo yaliandikwa pia.
6 Kwa kuendelea kuwa macho kutafuta viziwi katika eneo lenu unaweza kuwapa fursa ya kuchukua maji ya uhai bure.—Mt. 10:11.