“Usiogope”
1. Kama Yeremia, huenda tukakabili matatizo gani tukiwa mtu mmoja-mmoja?
1 Yeremia alipopewa mgawo wa kuwa nabii, alihisi kuwa hastahili. Hata hivyo, Yehova alimwambia kwa uhakika, “usiogope,” kisha akampa nguvu ili atimize mgawo wake. (Yer. 1:6-10) Katika siku zetu, huenda kuona haya au kutojiamini kukaathiri kushiriki kwetu katika huduma. Kuogopa jinsi watu watakavyoitikia au jinsi watakavyotuona kunaweza kutuzuia tusihubiri. Tunaweza kushinda woga huo jinsi gani, na sisi binafsi tutapata baraka gani?
2. Kujitayarisha kwaweza kutusaidiaje kupunguza woga tunapohubiri?
2 Jitayarishe Mapema: Kujitayarisha vya kutosha kwaweza kutusaidia kupunguza woga. Kwa mfano, tukipitia mapema mambo ambayo huenda yakatumiwa kama vizuia-mazungumzo, tutakuwa tayari kujibu maswali tunayokabili kwa ukawaida katika huduma. (Met. 15:28) Mnaweza kutumia vipindi vya mazoezi wakati wa Ibada ya Familia kutayarisha kwa ajili ya matatizo mbalimbali yanayotokea shuleni na katika huduma.—1 Pet. 3:15.
3. Kumtegemea Yehova hutusaidiaje kushinda woga?
3 Mtegemee Yehova: Kumtegemea Mungu wetu kutatusaidia kushinda woga. Yehova anatuhakikishia kwamba atatusaidia. (Isa. 41:10-13) Huo ndio ulinzi bora tunaoweza kupata. Isitoshe, Yesu alituhakikishia kwamba hata hali zisizotazamiwa zikitokea, roho takatifu ya Mungu itatuwezesha kutoa ushahidi kwa njia nzuri. (Marko 13:11) Kwa hiyo, mwombe Yehova kwa ukawaida akupe roho yake takatifu.—Luka 11:13.
4. Tunapata baraka gani kwa kuvumilia katika huduma licha ya matatizo mbalimbali?
4 Baraka: Tunapovumilia katika huduma licha ya matatizo mbalimbali, tunapata nguvu za kukabili majaribu ya wakati ujao kwa mafanikio. Tunasitawisha uhodari na ujasiri ambazo ni sifa za watu ambao wamejazwa roho takatifu. (Mdo. 4:31) Isitoshe, tunaposhinda woga kwa msaada wa Yehova, tunaimarisha imani yetu na tumaini letu katika mkono wake wenye kuokoa. (Isa. 33:2) Pia, kujua kwamba tunampendeza Baba yetu wa mbinguni kunatupa shangwe na uradhi. (1 Pet. 4:13, 14) Basi, tusiogope kutangaza ujumbe wa Ufalme kwa ujasiri, sikuzote tukiwa na uhakika kwamba Yehova anatusaidia!