“Paulo Alimshukuru Mungu na Kujipa Moyo”

Kutaniko lililokuwa Roma liliposikia kwamba Paulo alikuwa akija, akina ndugu walisafiri kilomita 64 kwenda kukutana naye. Upendo wao wa kujidhabihu ulimwathirije Paulo? “Paulo alipowaona, akamshukuru Mungu na kujipa moyo.” (Mdo 28:15) Ingawa Paulo alijulikana kwa kuyaimarisha makutaniko aliyotembelea, katika pindi hii alipokuwa mfungwa, yeye ndiye aliyetiwa moyo.—2Ko 13:10.

Leo waangalizi wa mzunguko husafiri kutoka kutaniko moja hadi lingine wakiwaimarisha akina ndugu na dada. Lakini kama watu wote wa Mungu, pindi fulani wao huchoka, wanapatwa na mahangaiko, na kuvunjika moyo. Wakati ujao mwangalizi wa mzunguko na mke wake watakapotembelea kutaniko lenu, unaweza kufanya nini ili kuwafanya wajipe moyo, na hivyo ‘mtiane moyo’?—Ro 1:11, 12.

• 

  Unga mkono mikutano ya utumishi wa shambani. Mwangalizi wa mzunguko anatiwa moyo wahubiri wanapojidhabihu ili wanufaike kikamili kutokana na juma hilo la pekee la utendaji. (1Th 1:2, 3; 2:20) Fikiria ikiwa unaweza kufanya upainia msaidizi mwezi wa ziara. Je, unaweza kujiandikisha uhubiri pamoja naye na mke wake au uandamane na mmoja wao kwenye funzo lako la Biblia? Wanafurahia kuhubiri na wahubiri tofauti-tofauti, kutia ndani wale ambao ni wapya au ambao hawana ustadi mwingi katika huduma.

• 

  Uwe mkaribishaji wageni. Je, unaweza kuwaandalia mahali pa kulala au uwaandalie mlo? Hilo litamwonyesha mwangalizi wa mzunguko na mke wake kwamba unawapenda. Hawatazamii uandae mambo mengi.—Lu 10:38-42.

• 

  Sikiliza na ufuate mwongozo na mashauri yake. Mwangalizi wa mzunguko hutusaidia kwa upendo kuona jinsi tunavyoweza kuboresha utumishi wetu kwa Yehova. Nyakati nyingine, huenda akalazimika kutupa shauri kali. (1Ko 5:1-5) Anapata shangwe tunapotii na kujitiisha.—Ebr 13:17.

• 

  Washukuru. Mweleze mwangalizi wa mzunguko na mke wake jinsi jitihada zao zimekunufaisha. Unaweza kuwaeleza moja kwa moja au uwaandikie barua au kadi.—Kol 3:15.