Jinsi Tunavyonufaika Kutokana na Upendo wa Yehova

1. Tunaweza kufanya nini ili kumfurahisha Yehova?

WAZIA kwamba umempatia mtu unayempenda zawadi ya pekee ambayo ni maridadi na yenye manufaa. Ungevunjika moyo sana ikiwa mtu huyo angeiweka tu kwenye sanduku na kutoifikiria tena! Kwa upande mwingine, bila shaka ungefurahi ikiwa mtu huyo angeitumia vizuri na kukushukuru kwa zawadi hiyo. Mfano huo unatufundisha nini? Yehova amemtoa Mwana wake kwa ajili yetu. Ni lazima Yehova anafurahi sana tunapoonyesha kwamba tunashukuru kwa zawadi hiyo yenye thamani na kwa upendo wake uliomchochea kuandaa fidia!—Yoh. 3:16; Rom. 5:7, 8.

2. Tutazungumzia nini katika makala hii?

² Hata hivyo, kadiri muda unavyopita tunaweza kuanza kutoithamini zawadi ya fidia. Hilo linaweza kufananishwa na kuiweka kwenye sanduku zawadi ya Mungu. Tunafurahi kwamba tuna zawadi hiyo, lakini tumeiweka mahali ambapo hatuioni wala kuifikiria. Ili kuzuia jambo hilo, ni lazima tuyafikirie kwa ukawaida mambo yote ambayo Mungu na Kristo wametufanyia. Makala hii itatusaidia kufanya hivyo. Tutazungumzia jinsi tunavyoweza kunufaika kutokana na fidia sasa na wakati ujao. Pia, tutachunguza jinsi tunavyoweza kuonyesha kwamba tunamshukuru Yehova kwa upendo wake, hasa katika majira ya Ukumbusho.

JINSI TUNAVYONUFAIKA SASA

3. Tunanufaikaje kutokana na fidia sasa?

³ Tayari tunanufaika kutokana na dhabihu ya fidia ya Kristo. Kwa mfano, kwa msingi wa fidia, Yehova anatusamehe dhambi zetu. Hana wajibu wa kutusamehe. Lakini anataka kutusamehe. Mtunga zaburi aliyekuwa na shukrani nyingi aliimba hivi: “Kwa maana wewe, Ee Yehova, ni mwema na uko tayari kusamehe.”—Zab. 86:5; 103:3, 10-13.

4. Yehova aliandaa fidia kwa ajili ya nani? (Luka 5:32; 1 Timotheo 1:15)

⁴ Huenda baadhi ya watu wakahisi hawastahili msamaha wa Yehova. Ukweli ni kwamba sisi sote hatustahili. Mtume Paulo alielewa kwamba ‘hakustahili kuitwa mtume.’ Hata hivyo, aliongezea hivi: “Kwa fadhili zisizostahiliwa za Mungu mimi niko kama nilivyo.” (1 Kor. 15:9, 10) Tunapotubu dhambi zetu, Yehova hutusamehe. Kwa nini? Si kwa sababu tunastahili, lakini kwa sababu anatupenda. Ikiwa umevunjika moyo kwa sababu unahisi hufai, kumbuka kwamba Yehova hakuandaa fidia kwa ajili ya watu wasio na dhambi, bali kwa ajili ya watenda dhambi wanaotubu.—Soma Luka 5:32; 1 Timotheo 1:15.

5. Je, kweli kuna mtu yeyote kati yetu anayepaswa kuhisi kwamba ana haki ya kupokea rehema za Yehova? Eleza.

⁵ Sisi sote hatupaswi kuhisi kwamba ni haki yetu kupata rehema za Yehova eti kwa sababu tu tumemtumikia kwa miaka mingi. Bila shaka, Yehova anathamini rekodi yetu ya kumtumikia kwa uaminifu. (Ebr. 6:10) Alimtoa Mwana wake kuwa zawadi ya bure, si kama malipo kwa ajili ya utumishi ambao tunamtolea. Ikiwa tunadai kwamba tumefanya jambo fulani la kustahili kuonyeshwa rehema au tunahisi kwamba tunastahili kuonyeshwa uangalifu wa pekee, itakuwa ni kana kwamba tunasema Kristo hakuhitaji kufa kwa ajili yetu.—Linganisha Wagalatia 2:21.

6. Kwa nini Paulo alifanya kazi kwa bidii katika utumishi wa Yehova?

⁶ Paulo alijua kwamba hangeweza kustahili kupata kibali cha Mungu kwa uwezo wake mwenyewe. Basi, kwa nini alifanya kazi kwa bidii sana katika utumishi wa Yehova? Alifanya hivyo ili kuonyesha kwamba anathamini fadhili zisizostahiliwa za Yehova, na si ili kuthibitisha kwamba anastahili rehema za Yehova. (Efe. 3:7) Kama Paulo, tunaendelea kumtumikia Yehova kwa bidii, si ili tustahili kupata rehema yake, bali ili tuonyeshe kwamba tunamshukuru.

7. Kwa sasa, tunanufaika kwa njia gani nyingine kutokana na fidia? (Waroma 5:1; Yakobo 2:23)

⁷ Njia nyingine ambayo kwa sasa tunanufaika kutokana na fidia ni kwamba tunaweza kuwa na uhusiano wa karibu na wa kibinafsi pamoja na Yehova.a Kama ilivyotajwa katika makala iliyotangulia, tulipozaliwa hatukuwa na uhusiano mzuri pamoja na Mungu. Lakini kwa sababu ya fidia, tunaweza kufurahia “amani pamoja na Mungu” na hivyo tunaweza kumkaribia.—Soma Waroma 5:1; Yakobo 2:23.

8. Kwa nini tunapaswa kumshukuru Yehova kwa pendeleo la sala?

⁸ Fikiria sehemu moja ya uhusiano wetu pamoja na Yehova—pendeleo la sala. Yehova husikiliza sala zinazotolewa kwa niaba ya watu, wanapokuwa wamekusanyika pamoja na pia sala za kibinafsi za kila mmoja wetu. Sala inaweza kuutuliza moyo wetu na kutupatia amani ya akili, lakini inatimiza mengi hata zaidi. Inaweza kuimarisha urafiki wetu pamoja na Mungu. (Zab. 65:2; Yak. 4:8; 1 Yoh. 5:14) Alipokuwa duniani, Yesu alisali mara nyingi kwa sababu alijua kwamba Yehova alikuwa akimsikiliza na kwamba sala ingeweza kudumisha uhusiano wake pamoja na Baba yake ukiwa imara. (Luka 5:16) Tunashukuru sana kwamba kwa msingi wa dhabihu ya Yesu tunaweza kuwa rafiki za Yehova na hata kuzungumza naye katika sala!

JINSI TUTAKAVYONUFAIKA WAKATI UJAO

9. Fidia itawanufaishaje waabudu waaminifu wakati ujao?

⁹ Waabudu waaminifu wa Yehova watanufaikaje kutokana na fidia wakati ujao? Watapata uzima wa milele. Watu wengi wanafikiri kwamba hilo haliwezekani kwa sababu wanadamu wamekuwa wakifa kwa maelfu ya miaka. Lakini kusudi la Yehova la awali lilikuwa kwamba wanadamu waishi milele. Ikiwa Adamu hangetenda dhambi, hakuna mtu yeyote ambaye angefikiri kwamba kuishi milele ni jambo lisilowezekana. Na ingawa kwa sasa wazo la kuishi milele huenda likaonekana kuwa jambo lisilowezekana, bei ambayo Yehova alilipa ni kubwa sana, yaani, zawadi ya Mwana wake mpendwa, hivi kwamba itaturudishia tumaini hilo la kuishi milele.—Rom. 8:32.

10. Watiwa-mafuta na kondoo wengine wanatazamia nini kwa hamu?

¹⁰ Ingawa uzima wa milele ni jambo litakalotunufaisha wakati ujao, Yehova anataka tulifikirie wakati huu. Watiwa-mafuta wanatazamia maisha yenye kusudi mbinguni watakapotawala juu ya dunia pamoja na Kristo. (Ufu. 20:6) Kondoo wengine wanatazamia kuishi katika dunia paradiso ambapo hakutakuwa na maumivu wala huzuni. (Ufu. 21:3, 4) Je, wewe ni mmoja wa wale wanaotazamia kuishi milele duniani? Zawadi hiyo ni yenye thamani kubwa kama tu kuishi mbinguni! Hayo ndiyo maisha ambayo wanadamu walikusudiwa kuishi. Maisha duniani yatatupatia furaha nyingi sana.

11-12. Ni baadhi ya baraka gani tunazoweza kutarajia katika Paradiso? (Tazama pia picha.)

¹¹ Wazia jinsi maisha yatakavyokuwa katika dunia Paradiso. Hutakuwa na wasiwasi tena kuhusu magonjwa au kifo. (Isa. 25:8; 33:24) Yehova atatimiza kikamili kila tamaa nzuri uliyo nayo. Utajifunza kuhusu mambo gani? Fizikia? Kemia? Muziki? Sanaa? Katika paradiso kutakuwa na uhitaji wa wasanifu majengo, wajenzi, na wakulima. Bila shaka, kutakuwa pia na uhitaji wa huduma za udumishaji na huduma nyingine kama vile, kutayarisha chakula, kutengeneza vifaa, na kutunza bustani maridadi. (Isa. 35:1; 65:21) Kwa kuwa utaishi milele, utakuwa na muda wa kutosha kujifunza stadi yoyote unayotaka.

¹² Itakuwa shangwe iliyoje kuwakaribisha tena watu watakaofufuliwa! (Mdo. 24:15) Fikiria pia jinsi utakavyofurahia kujifunza mambo mengi zaidi kumhusu Yehova kwa kuchunguza kazi zake nyingi za uumbaji. (Zab. 104:24; Isa. 11:9) Zaidi ya yote, tutafurahi sana kumwabudu Yehova bila kuwa na hisia zozote za hatia! Je, utakubali kupoteza baraka hizo za wakati ujao ili “kufurahia dhambi kwa muda”? (Ebr. 11:25) Bila shaka la! Baraka hizo zinazidi kwa mbali jambo lolote ambalo tunahitaji kujidhabihu sasa. Kumbuka kwamba ahadi ya dunia Paradiso si jambo ambalo tutaendelea kutarajia sikuzote. Hatimaye ahadi hiyo itakuwa jambo halisi. Mambo hayo yote hayangewezekana ikiwa Yehova hangetuonyesha upendo huo mkubwa hivi kwamba atupatie zawadi ya Mwana wake!

MSHUKURU YEHOVA KWA UPENDO WAKE

13. Tunawezaje kuonyesha kwamba tunamshukuru Yehova kwa upendo wake? (2 Wakorintho 6:1)

¹³ Tunawezaje kuonyesha kwamba tunamshukuru Yehova kwa kutuandalia fidia? Kwa kutanguliza kazi yake maishani. (Mt. 6:33) Isitoshe, Yesu alikufa “ili wale wanaoishi wasiishi tena kwa ajili yao wenyewe, bali kwa ajili ya yule aliyekufa kwa ajili yao na kufufuliwa.” (2 Kor. 5:15) Kwa hakika hatungependa kukosa kusudi la fadhili zisizostahiliwa za Yehova.—Soma 2 Wakorintho 6:1.

14. Tunawezaje kuonyesha imani katika mwongozo wa Yehova?

¹⁴ Pia, tunaweza kuonyesha kwamba tunamshukuru Yehova kwa upendo wake kwa kuonyesha imani katika mwongozo wake. Jinsi gani? Tunapofanya maamuzi fulani, kama vile kiasi cha elimu tunachohitaji au aina ya kazi ambayo tutakubali, ni lazima tufikirie kile ambacho Yehova angependa tufanye. (1 Kor. 10:31; 2 Kor. 5:7) Tunapotenda kulingana na imani yetu, jambo la pekee hutukia—imani yetu na urafiki wetu pamoja na Yehova unakuwa imara hata zaidi. Tumaini letu linakuwa hakika zaidi.—Rom. 5:3-5; Yak. 2:21, 22.

15. Tunawezaje kuonyesha kwamba tunamshukuru Yehova kwa upendo wake wakati wa majira ya Ukumbusho?

¹⁵ Bado kuna njia nyingine tunayoweza kuonyesha kwamba tunamshukuru Yehova kwa upendo wake. Ni kwa kutumia majira ya Ukumbusho kumwonyesha Yehova jinsi tunavyoithamini fidia. Zaidi ya sisi wenyewe kupanga kuwepo kwenye Ukumbusho, tunaweza kuwaalika watu wengine ili wahudhurie. (1 Tim. 2:4) Waeleze wale ambao utawaalika mambo ambayo yatatukia kwenye Ukumbusho. Jambo linaloweza kukusaidia ni kuwaonyesha video Kwa Nini Yesu Alikufa? na Kumbuka Kifo cha Yesu, kwenye jw.org. Wazee wanapaswa kuhakikisha wanawaalika wale wasiotenda. Wazia shangwe inayokuwa mbinguni na duniani wakati baadhi ya kondoo waliopotea wa Yehova wanapochochewa kurudi kundini! (Luka 15:4-7) Katika siku ya Ukumbusho, tujitahidi kuwasalimia si wale tu tunaowafahamu bali pia wapya au wale ambao hawajahudhuria mikutano kwa muda mrefu. Tungependa wahisi wamekaribishwa!—Rom. 12:13.

16. Kwa nini tunapaswa kufikiria kupanua huduma yetu wakati wa majira ya Ukumbusho?

¹⁶ Je, unaweza kuongeza utendaji wako wa kiroho wakati wa majira ya Ukumbusho? Kufanya hivyo ni njia nzuri ya kuonyesha tunathamini mambo yote ambayo Mungu na Kristo wametufanyia. Kadiri tunavyofanya mengi zaidi katika utumishi wa Yehova, ndivyo tutakavyozidi kujionea utegemezo wake, na matokeo ni kwamba, uhakika wetu kwake utakuwa na nguvu zaidi. (1 Kor. 3:9) Pia, hakikisha kwamba unafanya Usomaji wa Biblia wa Ukumbusho ulioorodheshwa kwenye kijitabu Kuyachunguza Maandiko Kila Siku au kwenye chati inayopatikana kwenye Daftari la Mkutano wa Huduma na Maisha ya Kikristo. Pia, unaweza kuchagua kutumia mistari hiyo ya Biblia kama msingi wa mradi wa kujifunza.

17. Ni jambo gani linalomfurahisha Yehova? (Tazama pia sanduku “Njia za Kuonyesha Kwamba Tunamshukuru Yehova kwa Upendo Wake.”)

¹⁷ Bila shaka, huenda hali zako zisikuruhusu kufanya kila kitu kilichopendekezwa kwenye makala hii. Ingawa hivyo, kumbuka kwamba Yehova halinganishi mambo unayomfanyia na yale ambayo wengine wanafanya; anaona kilicho moyoni mwako. Anafurahi anapoona unamshukuru kutoka moyoni kwa zawadi yake yenye thamani, fidia.—1 Sam. 16:7; Marko 12:41-44.

18. Kwa nini tunamshukuru sana Yehova Mungu na Yesu Kristo?

¹⁸ Tunaweza kusamehewa dhambi zetu, kuwa na urafiki pamoja na Yehova, na kuwa na tumaini la kuishi milele, kwa sababu tu ya zawadi ya fidia. Sikuzote, na tuonyeshe kwamba tunamshukuru Yehova kwa upendo wake uliomchochea kutupatia baraka hizo zote. (1 Yoh. 4:19) Pia, acheni tuonyeshe uthamini wetu kwa Yesu, ambaye alitupenda sana hivi kwamba akatoa uhai wake wa kibinadamu kwa ajili yetu!—Yoh. 15:13.