Kubali Upendo wa Yehova

1. Kwa nini ulijiweka wakfu kwa Yehova? (Tazama pia picha.)

JE, UNAKUMBUKA ulipojiweka wakfu kwa Yehova? Ulifanya uamuzi huo kwa sababu ulimjua na kumpenda. Ulimwahidi kwamba ungetanguliza mapenzi yake maishani mwako na kwamba ungeendelea kumpenda kwa moyo, nafsi, akili, na nguvu zako zote. (Marko 12:30) Tangu wakati huo, upendo wako kwake umezidi kuimarika. Basi, ungejibuje ikiwa mtu angekuuliza hivi: “Je, kweli unampenda Yehova?” Bila kusita, ungemjibu hivi: “Ninampenda kuliko mtu au kitu chochote kingine!”

2-3. Yehova anataka tukubali nini, na tutachunguza nini katika makala hii? (Yeremia 31:3)

² Hata hivyo, ungejibuje ikiwa mtu angekuuliza, “Je, una uhakika kwamba Yehova anakupenda wewe?” Je, ungesita kujibu, huenda ukifikiri kwamba hustahili upendo wa Yehova? Dada mmoja ambaye hakupata malezi mazuri alisema hivi: “Ninajua kwamba ninampenda Yehova. Sina shaka kuhusu hilo. Jambo ninalotilia shaka mara nyingi ni ikiwa Yehova ananipenda.” Unaweza kujuaje hisia za Yehova kukuelekea?

³ Yehova anataka uwe na uhakika kwamba anakupenda. (Soma Yeremia 31:3.) Ukweli ni kwamba Yehova alikuvuta kwake. Na ulipojiweka wakfu kwake na kubatizwa, ulipokea kitu chenye thamani sana—upendo wake mshikamanifu. Upendo huo unahusisha kushikamana, kufungamana kabisa na mtu. Unamchochea Yehova kuwaona waabudu wake waaminifu—kutia ndani wewe—kuwa ‘mali anayoithamini sana.’ (Mal. 3:​17, maelezo ya chini) Yehova anataka uwe na uhakika kwamba anakupenda kama mtume Paulo alivyokuwa na uhakika kwamba Yehova anampenda. Paulo aliweza kuandika hivi kwa uhakika: “Nimesadiki kwamba wala kifo wala uzima wala malaika wala serikali wala mambo yaliyopo sasa wala mambo yatakayokuja wala nguvu wala kimo wala kina wala uumbaji mwingine wowote havitaweza kututenga na upendo wa Mungu.” (Rom. 8:​38, 39) Katika makala hii, tutachunguza kwa nini tunahitaji kuimarisha uhakika wetu katika upendo wa Yehova na mambo yatakayoweza kutusaidia kufanya hivyo.

KWA NINI TUNAHITAJI KUKUBALI UPENDO WA YEHOVA?

4. Tunawezaje kupambana na mojawapo ya matendo yenye hila ya Shetani?

⁴ Kwa kukubali upendo wa Yehova, tunaweza kupambana dhidi ya mojawapo ya “matendo yenye hila” ya Shetani. (Efe. 6:11) Shetani atafanya lolote analoweza ili kutuzuia kumtumikia Yehova. Mojawapo ya matendo yenye hila ya Shetani ni kuendeleza uwongo wa kwamba Yehova hatupendi. Usisahau kamwe kwamba Shetani anatumia nafasi yoyote anayopata kwa faida yake mwenyewe. Mara nyingi anatushambulia tunapokuwa dhaifu—labda tunapokuwa tumelemewa na hisia kwa sababu ya mambo ambayo tumepitia maishani, changamoto tunazopitia sasa, au wasiwasi kuhusu wakati ujao. (Met. 24:10) Shetani ni kama simba anayevizia mnyama asiye na nguvu za kujilinda. Hivyo, anajaribu kutumia hali yetu ya kushuka moyo ili kutufanya tukate tamaa. Lakini ikiwa tutaendelea kuimarisha uhakika wetu katika upendo wa Yehova, tutakuwa na uwezo mzuri zaidi wa ‘kusimama dhidi ya’ Shetani na mbinu zake zenye hila.—1 Pet. 5:​8, 9; Yak. 4:7.

5. Kwa nini tunahitaji kuhisi kwamba tunapendwa na Yehova?

⁵ Kwa kukubali upendo wa Yehova, tunaweza kumkaribia zaidi. Fikiria kwa nini tunaweza kusema hivyo. Yehova alituumba tukiwa na uhitaji wa kuwapenda wengine na kupendwa. Kwa asili ikiwa mtu anatuonyesha upendo, hilo hutuchochea kumpenda pia. Hivyo, kadiri tunavyohisi upendo wa Yehova, ndivyo tutakavyompenda zaidi pia. (1 Yoh. 4:19) Na kadiri upendo wetu kwake unavyokua, ndivyo atakavyotupenda zaidi. Biblia inatuambia hivi waziwazi: “Mkaribieni Mungu, naye atawakaribia ninyi.” (Yak. 4:8) Hata hivyo, tunawezaje kuimarisha uhakika wetu kwamba Yehova anatupenda?

NI NINI KINACHOWEZA KUTUSAIDIA KUKUBALI UPENDO WA YEHOVA?

6. Ili tukubali upendo wa Yehova, tunaweza kusali kuhusu nini?

⁶ Taja mambo hususa katika sala na usali bila kuacha. (Luka 18:1; Rom. 12:12) Mwombe Yehova—ikihitajika mara nyingi kila siku—akusaidie ujione kama yeye anavyokuona. Ni kweli kwamba si rahisi kuusadikisha moyo unaojihukumu. Lakini kumbuka kwamba Yehova ni mkuu kuliko moyo wako. (1 Yoh. 3:​19, 20) Anakujua vizuri zaidi ya jinsi unavyojijua mwenyewe; anaona sifa zako nzuri ambazo wewe huzioni. (1 Sam. 16:7; 2 Nya. 6:30) Hivyo, usisite ‘kummwagia’ hisia zako, na kumwomba akusaidie ukubali upendo wake. (Zab. 62:8) Kisha, utende kulingana na sala zako kwa kutumia mapendekezo yafuatayo.

7-8. Kitabu cha Zaburi kinatuhakikishiaje kwamba Yehova anatupenda?

⁷ Mwamini Yehova. Aliwaongoza waandikaji wa Biblia wafafanue kwa njia sahihi utu wake. Fikiria jinsi mtunga zaburi Daudi alivyomfafanua Yehova kwa wororo. Alisema hivi: “Yehova yuko karibu na wale waliovunjika moyo; huwaokoa waliovunjika moyo.” (Zab. 34:​18, maelezo ya chini) Unaposhuka moyo, huenda ukahisi kwamba uko peke yako. Lakini Yehova anakuahidi kwamba katika pindi hizo yuko karibu nawe kwa sababu unamhitaji zaidi kuliko wakati mwingine wowote. Daudi aliandika hivi katika zaburi nyingine: “Yakusanye machozi yangu katika kiriba chako cha ngozi.” (Zab. 56:8) Yehova anaona unapopambana na hisia za huzuni. Anakujali sana na anaelewa changamoto unazopitia. Kwa njia ya mfano, anakusanya machozi yako na kuyahifadhi, kana kwamba ni maji yenye thamani yaliyowekwa kwenye kiriba cha ngozi cha msafiri. Kwenye Zaburi 139:​3, tunasoma hivi: “[Yehova] unazijua njia zangu zote.” Yehova anaona njia zako zote, lakini anakazia fikira mambo mema unayofanya. (Ebr. 6:10) Kwa nini? Kwa sababu anathamini jitihada zote unazofanya ili kumfurahisha.a

⁸ Kupitia maneno hayo yenye kufariji yanayopatikana kwenye Neno lake lililoongozwa na roho, ni kana kwamba Yehova anasema hivi: “Ninataka ujue jinsi ninavyokupenda na kukujali.” Lakini kama tulivyojifunza awali, Shetani anaendeleza uwongo wa kwamba Yehova hakupendi. Hivyo, ikiwa nyakati fulani unatilia shaka upendo wa Yehova kukuelekea, tua na ujiulize hivi: ‘Nitamwamini nani—“baba ya uwongo” au “Mungu wa ukweli”?’—Yoh. 8:44; Zab. 31:5.

9. Yehova amewahakikishia nini wale wanaompenda? (Kutoka 20:​5, 6)

⁹ Tafakari kuhusu jinsi Yehova anavyotenda anapoonyeshwa upendo. Fikiria kile ambacho Yehova alimwambia Musa na Waisraeli. (Soma Kutoka 20:​5, 6.) Yehova anaahidi kuendelea kuwaonyesha upendo mshikamanifu wale wanaompenda. Maneno hayo yanatuhakikishia kwamba Mungu wetu mshikamanifu hawezi kamwe kupokea upendo kutoka kwa waabudu wake naye asiwaonyeshe upendo. (Neh. 1:5) Hivyo, ikiwa nyakati fulani unahitaji kujihakikishia kwamba Yehova anakupenda, tua na ujiulize hivi: ‘Je, ninampenda Yehova?’ Kisha fikiria jambo hili: Ikiwa unampenda na unajitahidi kadiri unavyoweza kumfurahisha, anakuhakikishia kwamba anakupenda sana. (Dan. 9:4; 1 Kor. 8:3) Kwa maneno mengine, ikiwa huna shaka kwamba unampenda Yehova, kwa nini utilie shaka kwamba anakupenda? Unaweza kuwa na uhakika kabisa kwamba sikuzote atakupenda na hatakuacha kamwe.

10-11. Yehova anataka uwe na mtazamo gani kuhusu fidia? (Wagalatia 2:20)

¹⁰ Tafakari kuhusu fidia. Dhabihu ya fidia ya Yesu Kristo ndiyo zawadi bora zaidi ambayo Yehova amewapatia wanadamu. (Yoh. 3:16) Lakini je, ni zawadi kwako binafsi? Ndiyo! Fikiria mfano wa mtume Paulo. Kumbuka kwamba kabla ya kuwa Mkristo alikuwa ametenda dhambi nzito kadhaa na alihitaji kuendelea kupambana na udhaifu wake mbalimbali. (Rom. 7:​24, 25; 1 Tim. 1:​12-14) Hata hivyo, aliiona fidia kuwa zawadi ya kibinafsi kutoka kwa Yehova. (Soma Wagalatia 2:20.) Kumbuka kwamba Yehova alimwongoza Paulo kuandika maneno hayo. Na kila kitu katika Biblia kimeandikwa ili kutufundisha. (Rom. 15:4) Maneno ya Paulo yanaonyesha mtazamo ambao Yehova anataka uwe nao kuhusu fidia—kwamba ni zawadi ya kibinafsi kutoka Kwake. Unapokuwa na mtazamo huo kuhusu fidia, unaimarisha uhakika wako kwamba Yehova anakupenda kibinafsi.

¹¹ Tunamshukuru Yehova kwa kumtuma Yesu duniani ili afe kwa ajili yetu. Lakini sababu nyingine iliyomfanya Yesu aje duniani ni ili kufundisha kweli kumhusu Mungu. (Yoh. 18:37) Kweli hiyo inatia ndani jinsi Yehova anavyohisi kuhusu watoto wake.

JINSI YESU ANAVYOTUSAIDIA KUKUBALI UPENDO WA YEHOVA

12. Kwa nini tunaweza kuamini mambo ambayo Yesu alisema kumhusu Yehova?

¹² Alipokuwa duniani, kwa hiari Yesu alitufunulia utu wa Yehova. (Luka 10:22) Tuna kila sababu ya kuamini mambo ambayo Yesu alisema kumhusu Yehova. Isitoshe, Yesu aliishi pamoja na Yehova mbinguni kwa mabilioni ya miaka kabla ya kuja duniani. (Kol. 1:15) Kupitia mambo aliyojionea mwenyewe, Yesu alijua ni kwa kadiri gani Yehova anawapenda wana na binti Zake waaminifu. Yesu anawasaidiaje wengine wakubali upendo wa Mungu?

13. Yesu anataka tuwe na maoni gani kumhusu Yehova?

¹³ Yesu anataka tumwone Yehova kama yeye anavyomwona. Katika vitabu vya Injili, Yesu alimrejelea Yehova kuwa “Baba” zaidi ya mara 160. Na alipozungumza na wafuasi wake, alitumia maneno kama vile “Baba yenu” au “Baba yenu wa mbinguni.” (Mt. 5:16; 6:26) Kabla ya Yesu kuja duniani, watumishi waaminifu wa Yehova walimwita majina ya cheo kama vile ‘Mweza-Yote,’ ‘Aliye Juu Zaidi,’ ‘Muumba Mkuu,’ na majina mengine ya cheo kama hayo. Lakini mara nyingi Yesu alimwita Yehova ‘Baba’ yetu. Neno hilo linaonyesha kwamba Yehova anataka watumishi wake wahisi wakiwa karibu naye kama mtoto anavyohisi anapokuwa na uhusiano wa karibu na baba yake mpendwa. Ni wazi kwamba Yesu anataka tumwone Yehova kama yeye anavyomwona—akiwa Baba mwenye upendo, anayewapenda watoto Wake. Acheni tuchunguze pindi mbili ambazo Yesu alitumia neno “Baba.”

14. Yesu alionyeshaje kwamba kila mmoja wetu ana thamani machoni pa Baba yetu wa mbinguni? (Mathayo 10:​29-31) (Tazama pia picha.)

¹⁴ Kwanza, fikiria maneno ya Yesu yanayopatikana kwenye Mathayo 10:​29-31. (Soma.) Shore ni ndege wadogo ambao kamwe hawawezi kumpenda wala kumwabudu Yehova. Hata hivyo, Baba yetu anamthamini shore mmoja hivi kwamba anajua anapoanguka chini. Basi, ikiwa Yehova anamthamini hivyo ndege mdogo, tunaweza kuwa na uhakika kwamba anamjali hata zaidi kila mmoja wetu kwa sababu tunampenda na kumwabudu yeye. Yesu alisema pia kwamba Baba yetu anajua idadi ya nywele tulizo nazo kichwani. Kwa kuwa Yehova anajua hata mambo madogo kutuhusu, tunaweza kuwa na uhakika kabisa kwamba anatujali sana. Kwa hakika, Yesu anataka tukubali kwamba kila mmoja wetu ni mwenye thamani machoni pa Baba yetu wa mbinguni.

15. Maneno ya Yesu yanayopatikana katika Yohana 6:44 yanafunua nini kumhusu Baba yako wa mbinguni?

¹⁵ Ona pindi nyingine ambayo Yesu alitumia neno “Baba.” (Soma Yohana 6:44.) Baba yako wa mbinguni alikuvuta kibinafsi—kwa wororo—katika kweli. Kwa nini alifanya hivyo? Kwa sababu aliona una moyo wenye mwelekeo unaofaa. (Mdo. 13:48) Yesu aliposema maneno yanayopatikana kwenye Yohana 6:​44, huenda alikuwa akirejelea maneno aliyosema Yehova yanayopatikana katika Yeremia 31:3. Yehova aliwaambia hivi watu wake: “Nimekuvuta kwangu kwa upendo mshikamanifu [au, nimeendelea kukutendea kwa upendo mshikamanifu].” (Yer. 31:3; maelezo ya chini; linganisha Hosea 11:4.) Fikiria hilo linamaanisha nini. Baba yetu wa mbinguni mwenye upendo anaendelea kuona sifa nzuri ulizo nazo ambazo huenda wewe huzioni.

16. (a) Ni kana kwamba Yesu anatuambia nini, na kwa nini tunapaswa kumwamini? (b) Unawezaje kuimarisha uhakika wako kwamba Yehova ni Baba unayemhitaji? (Tazama sanduku “Baba Ambaye Sote Tunamhitaji.”)

¹⁶ Kwa kumfafanua Yehova kuwa Baba yetu, kwa njia fulani Yesu anatuambia hivi: “Yehova si Baba yangu tu; ni Baba yenu pia. Na ninakuhakikishia kwamba anakupenda na anakujali sana kibinafsi.” Hivyo, ikiwa nyakati fulani unahisi huna uhakika kwamba Yehova anakupenda, tua na ujiulize hivi: ‘Je, sipaswi kuamini maneno ya Mwana anayemjua Baba yetu vizuri zaidi na ambaye sikuzote husema ukweli?’—1 Pet. 2:22.

ENDELEA KUIMARISHA UHAKIKA WAKO

17. Kwa nini ni lazima tuendelee kuimarisha uhakika wetu katika upendo wa Yehova?

¹⁷ Tunahitaji kuendelea kuimarisha uhakika wetu katika upendo wa Yehova. Kama tulivyojifunza awali, Shetani, adui yetu mwenye hila, atafanya yote awezayo ili tuache kumtumikia Yehova. Katika jitihada zake za kudhoofisha azimio letu, Shetani ataendelea kujaribu kudhoofisha uhakika wetu katika upendo wa Mungu. Hatupaswi kumruhusu Shetani ashinde!—Ayu. 27:5.

18. Unaweza kuimarishaje uhakika wako katika upendo wa Yehova?

¹⁸ Ili kuimarisha imani yako katika upendo wa Yehova, endelea kusali akusaidie ujione kama yeye anavyokuona. Tafakari jinsi ambavyo waandikaji wa Biblia walioongozwa na roho walivyofafanua upendo wake mwororo. Tafakari kuhusu jinsi anavyotenda anapoonyeshwa upendo; hawezi kamwe kupokea upendo kutoka kwa waabudu wake naye asiwaonyeshe upendo. Tafakari kwa nini unaweza kuiona fidia kuwa zawadi yako ya kibinafsi. Na amini uhakikisho wa Yesu kwamba Yehova ni Baba yako wa mbinguni. Na ikiwa mtu yeyote atakuuliza: “Je, una uhakika kwamba Yehova anakupenda?” utajibu hivi kwa uhakika: “Ndiyo, ananipenda! Na kila siku ninajitahidi kadiri niwezavyo kumwonyesha jinsi ninavyompenda!”