Matetemeko Makubwa ya Ardhi—Biblia Ilitabiri Nini?

Kila mwaka, makumi ya maelfu ya matetemeko ya ardhi hutokea. Ingawa mengi ni madogo, matetemeko makubwa yanaweza kusababisha madhara makubwa, kuteseka, na kifo. Nyakati nyingine, yanatokeza tsunami kubwa zinazoharibu maeneo ya pwani na kusababisha vifo vya watu wengi wanaoishi huko. Je, Biblia ilitabiri matetemeko hayo makubwa?

Katika makala hii

Je, Biblia ilitabiri kutakuwa na matetemeko ya ardhi?

Biblia iliyofunguliwa. Upande wa nyuma kuna dunia na kipimo kinachoonyesha mawimbi yanayopima tetemeko la ardhi.

Biblia inataja kuhusu matetemeko ya ardhi katika unabii ambao Yesu alitoa. Maneno yake yalirekodiwa katika vitabu vitatu vya Biblia. Alisema hivi:

“Kwa maana taifa litapigana na taifa na ufalme kupigana na ufalme, kutakuwa na upungufu wa chakula na matetemeko ya ardhi sehemu mbalimbali.”—Mathayo 24:7.

“Kwa maana taifa litapigana na taifa na ufalme kupigana na ufalme; kutakuwa na matetemeko ya ardhi sehemu mbalimbali; pia kutakuwa na upungufu wa chakula.”—Marko 13:8.

“Kutakuwa na matetemeko makubwa ya ardhi, na magonjwa na upungufu wa chakula katika sehemu mbalimbali.”—Luka 21:11.

Hivyo, Yesu alitabiri kwamba “matetemeko makubwa ya ardhi” yangetokea “sehemu mbalimbali” huku kukiwa na vita, upungufu wa chakula, na magonjwa. Kwa pamoja, matukio hayo yanatambulisha kipindi katika historia ya wanadamu kinachoitwa “umalizio wa mfumo wa mambo,” au “siku za mwisho.” (Mathayo 24:3; 2 Timotheo 3:1) Kulingana na mfuatano wa matukio ya Biblia, “siku za mwisho” zilianza mwaka wa 1914 na bado hazijakwisha.

Je, matetemeko ya ardhi leo yanatimiza unabii wa Biblia?

Sehemu mbalimbali kwenye ramani ya ulimwengu zinazoonyesha matetemeko makubwa ya ardhi.

Ndiyo. Unabii wa Yesu kutia ndani mambo aliyosema kuhusu matetemeko ya ardhi, yanafanana na matukio tunayoona leo. Tangu 1914, kumekuwa na matetemeko makubwa ya ardhi zaidi ya 1,950, ambayo yametokeza jumla ya vifo vya watu zaidi ya milioni mbili.a Fikiria mifano kadhaa ya karne hii.

2004—Bahari ya Hindi. Tetemeko la ardhi lenye ukubwa wa 9.1 lilitokeza tsunami iliyoathiri nchi nyingi, na kusababisha vifo vya watu 225,000 hivi.

2008—China. Tetemeko lenye ukubwa wa 7.9 liliharibu vijiji na miji mingi, na inakadiriwa kuwa lilisababisha vifo vya watu 90,000, watu 375,000 wakajeruhiwa, na kuwaacha mamilioni ya watu bila makao.

2010—Haiti. Tetemeko la ardhi lenye ukubwa wa 7.0 lililofuatiwa na matetemeko mengine madogo yenye nguvu lilisababisha vifo vya watu zaidi ya 300,000 na kuwaacha mamilioni bila makao.

2011—Japani. Tetemeko la ardhi lenye ukubwa wa 9.0 na tsunami zilizofuata zilisababisha vifo vya watu 18,500 hivi na kuwaacha mamia ya maelfu bila makao. Mtambo wa nyuklia wa Fukushima uliharibika na miale hatari ya urujuani ikaingia hewani. Miaka kumi baadaye, zaidi ya watu 40,000 hawawezi kurudi nyumbani kwao karibu na mtambo huo kwa sababu ya viwango vya juu vya mnururisho wenye sumu.

Unabii wa Biblia kuhusu matetemeko ya ardhi unamaanisha nini kwetu?

Wenzi wa ndoa wakitembea wakiwa wameshikana mikono, huku wakitazama wakati ujao mwangavu.

Unabii wa Biblia kuhusu matetemeko ya ardhi unatusaidia kutambua mambo yatakayotukia hivi karibuni. Yesu alisema hivi: “Mtakapoona mambo hayo yakitukia, jueni kwamba Ufalme wa Mungu umekaribia.”—Luka 21:31.

Biblia inaeleza kwamba Ufalme wa Mungu ni serikali halisi iliyo mbinguni na Yesu Kristo ndiye Mfalme. Huo ndio Ufalme ambao Yesu aliwafundisha wafuasi wake wasali uje.—Mathayo 6:10.

Ufalme wa Mungu utakapotawala dunia, Mungu atazuia misiba ya asili isiwadhuru watu, kutia ndani matetemeko ya ardhi. (Isaya 32:18) Zaidi ya hilo, ataondoa madhara ya kimwili na ya kihisia ambayo yametokezwa na matetemeko ya ardhi leo. (Isaya 65:17; Ufunuo 21:3, 4) Ili upate habari zaidi, soma makala yenye kichwa “Ufalme wa Mungu Utatimiza Nini?”

a Takwimu zimetoka kwenye Orodha ya Matetemeko Makubwa ya Ardhi Duniani Pote inayodumishwa na Kituo cha Marekani cha Kukusanya Habari za Hali ya Dunia.

Maoni yasiyo sahihi kuhusu unabii wa Biblia na matetemeko ya ardhi

Maoni yasiyo sahihi: Kipindi tunachoishi si cha pekee kwa sababu sikuzote kumekuwa na matetemeko ya ardhi.

Ukweli: Biblia haikutabiri tu kwamba kungekuwa na matetemeko ya ardhi bali pia kwamba kungekuwa na matukio mengine ambayo kwa pamoja yangetambulisha siku za mwisho. Kwa habari zaidi, ona makala yenye kichwa “Ni Nini Ishara ya ‘Siku za Mwisho’?”

Maoni yasiyo sahihi: Matetemeko ya ardhi yanayotokea leo ni adhabu kutoka kwa Mungu.

Ukweli: Matetemeko ya ardhi hutokea kila mahali, na kusababisha vifo vya watu wema na wabaya. Mara nyingi, wale wanaokufa wanakuwa tu mahali pasipofaa wakati usiofaa. (Mhubiri 9:11) Ili kujifunza kwa nini misiba kama hiyo ya asili si adhabu kutoka kwa Mungu, ona makala yenye kichwa, “Biblia Inasema Nini Kuhusu Misiba ya Asili?”

Maoni yasiyo sahihi: Kitabu cha Biblia cha Ufunuo kinatabiri matetemeko halisi ya ardhi ambayo yataharibu dunia yote.

Ukweli: Kitabu cha Ufunuo kinataja matetemeko ya ardhi katika mistari ifuatayo: Ufunuo 6:12; 8:5; 11:13, 19; 16:18. Hata hivyo, unabii ulio katika kitabu hicho uliandikwa “kwa ishara,” kwa hiyo matetemeko hayo ya ardhi si halisi bali ni ya mfano. (Ufunuo 1:1) Kwa habari zaidi, ona makala yenye kichwa “Kitabu cha Ufunuo—Kinamaanisha Nini?”