ENDELEA KUKESHA!

Dini na Vita Nchini Ukrainia—Biblia Inasema Nini?

Fikiria mambo yafuatayo kuhusu viongozi wa kidini mashuhuri na vita vinavyoendelea nchini Ukrainia:

“Mkuu wa Kanisa Othodoksi la Urusi, Baba Kirill, hajasema lolote kuhusu mashambulizi ya Urusi. . . . Kanisa lake limeendelea kusambaza propaganda hatua kwa hatua dhidi ya Ukrainia, na Putin ametumia maneno hayo kuhalalisha vita vyake.”—EUobserver, Machi 7, 2022.
“Baba Kirill . . . ametoa ishara kubwa zaidi inayotetea uvamizi wa [Urusi] nchini Ukrainia kwa kusema kwamba shambulizi hilo ni pambano dhidi ya dhambi.”—AP News, Machi 8, 2022.
“Askofu Epiphanius wa Kwanza wa Kyiv, ambaye ni kiongozi wa Kanisa Othodoksi la Ukrainia, Jumatatu aliwabariki watu wake ‘wapigane dhidi ya wavamizi wa Urusi’ . . . Pia, alisema kwamba kuwaua wanajeshi wa Urusi si dhambi.”—Jerusalem Post, Machi 16, 2022.
“Sisi [Baraza la Makanisa na Mashirika ya Kidini ya Ukrainia (UCCRO)] tunaunga mkono Majeshi ya Ukrainia na watetezi wetu wote, tunawabariki katika jitihada za kuilinda Ukrainia dhidi ya wakandamizaji, na tunatoa maombi kwa ajili yao.”—Tangazo la UCCRO,a Februari 24, 2022.

Una maoni gani? Je, dini zinazodai kumfuata Yesu Kristo zinapaswa kuwatia moyo washiriki wake kwenda vitani? Biblia inasema nini?

Historia ya dini katika vita

Historia inaonyesha kwamba mara nyingi dini imeunga mkono, ikatetea, au hata kuchochea vita huku ikidai kwamba inajitahidi kuleta amani. Kwa makumi ya miaka, Mashahidi wa Yehova wamefichua unafiki huo wa kidini. Fikiria mifano kadhaa iliyotajwa katika machapisho yetu.

Makala “Zile Krusedi—‘Uwongo Wenye Msiba’” inaonyesha jinsi Kanisa Katoliki la Roma lilivyo na hatia kwa sababu ya mauaji ambayo yamefanywa katika jina la Mungu na Kristo.
Makala “Kanisa Katoliki Katika Afrika” inatoa mfano wa jinsi dini ilivyoshindwa kuzuia vita vya kikabila, na hata mauaji ya jamii nzimanzima.
Makala “Je, Dini Inapaswa Kulaumiwa?,” “Fungu la Dini Katika Vita vya Binadamu,” na “Dini Yajiunga” zinaeleza jinsi viongozi wa dini ya Katoliki, Othodoksi, na Protenstanti wameunga mkono pande zote mbili katika vita vingi.

Je, dini za Kikristo zinapaswa kuunga mkono vita?

Yesu alifundisha nini: “Lazima umpende jirani yako kama unavyojipenda mwenyewe.” (Mathayo 22:39) “Endeleeni kuwapenda adui zenu.”—Mathayo 5:44-47.

Fikiria hili: Je, dini inaweza kudai kwamba inatii amri ya Yesu kuhusu upendo na wakati uleule iwe inawatia moyo wafuasi wake kuuana wakati wa vita? Ili upate majibu, soma makala “Wakristo wa Kweli na Vita” na “Je, Inawezekana Kuwapenda Adui Zako?”

Yesu alisema nini: “Ufalme wangu si sehemu ya ulimwengu huu. Kama Ufalme wangu ungekuwa sehemu ya ulimwengu huu, watumishi wangu wangenipigania.” (Yohana 18:36) “Wote wanaochukua upanga wataangamia kwa upanga.”—Mathayo 26:47-52.

Fikiria hili: Ikiwa Wakristo hawakupaswa kupigana hata kumlinda Yesu, je, wanapaswa kupigana kwa sababu nyingine yoyote? Soma makala “Je, Ukristo Unaunga Mkono Vita?” ili uone jinsi ambavyo Wakristo wa karne ya kwanza walivyofuata mfano wa Yesu na mafundisho yake kwa uaminifu.

Ni nini kitakachopata dini zinazochochea vita?

Biblia inafundisha kwamba Mungu anapinga dini zinazodai kumwakilisha Yesu lakini hazifuati mafundisho yake.—Mathayo 7:21-23; Tito 1:16.

Kitabu cha Ufunuo kinaonyesha kwamba kwa maoni ya Mungu dini hizo ndizo zinazopaswa kulaumiwa kwa sababu ya vifo vya “wale wote ambao wameuawa duniani.” (Ufunuo 18:21, 24) Ili kujifunza sababu, soma makala “Babiloni Mkubwa Ni Nani?”
Yesu alionyesha kwamba dini zote zinazokataliwa na Mungu zitaangamizwa kwa sababu ya kazi zake zisizofaa, kama tu ambavyo mti uliooza unaotokeza matunda yaliyooza “hukatwa na kutupwa ndani ya moto.” (Mathayo 7:15-20) Soma makala “Mwisho wa Dini ya Uwongo Umekaribia!” ili uone hilo litatukia wakati gani.

Mashahidi wa Yehova Ni Tofauti

Mashahidi wa Yehova nchini Urusi, Ukrainia, na ulimwenguni pote wanatii amri za Yesu za kuendelea kuepuka kuunga mkono upande wowote wa kisiasa na kuepuka vita. Kwa sababu hiyo, hatushiriki wala kuunga mkono vita hivi wala vita vingine. Baadhi ya Mashahidi wanateswa kwa sababu ya azimio letu la kushikamana na imani yetu inayotegemea Biblia. (Yohana 15:19, 20; 2 Timotheo 3:12) Kwa mfano, serikali ya Urusi imewafunga Mashahidi wengi gerezani na kuwatesa baadhi yao. Majengo yetu ya ibada yamechukuliwa. Ili upate habari zaidi, nenda kwenye www.jw-russia.org.

Tazama video ya dakika nne yenye kichwa Mashahidi wa Yehova Jijini Irkutsk Wanadumisha Uaminifu Licha ya Nyumba Zao Kushambuliwa ili uone jinsi ambavyo Mashahidi wa Yehova nchini Urusi wameteswa kwa sababu ya imani yao.
Mashahidi wa Yehova wana rekodi ndefu ya kutounga mkono upande wowote katika mambo ya kisiasa na kijeshi. Tazama video Kuwa Imara Licha ya Upinzani uone jinsi walivyodumisha msimamo wao licha ya mateso makali ya Serikali ya Nazi ya Ujerumani na chini ya ule uliokuwa Muungano wa Sovieti.

Tafadhali chunguza tovuti yetu ili ujifunze mengi zaidi kuhusu mambo tunayoamini, kutia ndani ahadi ya Biblia kuhusu wakati ujao usiokuwa na vita. (Isaya 2:4; Yeremia 29:11) Tunakualika uwasiliane nasi ili upate habari zaidi.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Baraza la Makanisa na Mashirika ya Kidini ya Ukrainia, au UCCRO, linatia ndani makanisa 15 ya Kiothodoksi, Kanisa Katoliki la Roma na la Ugiriki, ya Kiprotestanti, na ya Kiinjilisti kutia ndani Wayahudi na Waislamu.