Mashahidi wa Yehova Wanazoezwa Jinsi Gani ili Kutimiza Huduma Yao?

Mashahidi wa Yehova hupata mazoezi katika kila sehemu ya maisha ya Mkristo kutia ndani huduma yao. Huduma hii ni kazi ambayo Yesu aliwaamuru wafuasi wake wafanye, yaani, kuhubiri na kufundisha habari njema za Ufalme wa Mungu. (Mathayo 24:14; 28:19, 20) Tunapata mazoezi hayo katika mikutano yetu ya kila juma na katika makusanyiko ya eneo na ya mzunguko tunayofanya kila mwaka. Mashahidi wa Yehova walio na majukumu kutanikoni au katika tengenezo hupata mazoezi zaidi katika shule hususa za Biblia.

Katika makala hii

Mashahidi wa Yehova hupata mazoezi gani?

Mikutano ya kutaniko. Kila juma, tunahudhuria mikutano miwili katika sehemu zetu za ibada zinazoitwa Majumba ya Ufalme. Kwa kawaida, mkutano mmoja unafanywa katikati ya juma; na mwingine mwisho juma. Watu wote wanakaribishwa kuhudhuria na hakuna sadaka zinazokusanywa.

Mikutano ya katikati ya juma. Tunapata mazoezi ya jinsi ya kuboresha usomaji wetu, jinsi ya kuanzisha mazungumzo, kuwa wasemaji wazuri, na pia jinsi ya kuhubiri na kufundisha. Mazoezi hayo yanatolewa kupitia hotuba, mazungumzo, maonyesho, na video. Mazoezi hayo yanatusaidia kupata uzoefu wa kushiriki ujumbe wa Biblia na wengine na kuongoza mafunzo ya Biblia na watu wanaopendezwa. Wote wanaohudhuria mikutano hii wananufaika kutokana na mazoezi hayo. Isitoshe, mikutano yetu inaimarisha imani yetu kwa Mungu na upendo wetu kwake na kwa waabudu wenzetu.
Mkutano wa mwisho juma. Mkutano huu wenye sehemu mbili huanza kwa hotuba inayotegemea Biblia ambayo imekusudiwa kwa ajili ya watu wote. Sehemu ya pili ya mkutano huo ni mazungumzo yanayotia ndani maswali na majibu ya makala iliyochapishwa kwenye toleo la funzo la gazeti la Mnara wa Mlinzi.a Makala hizo hufafanua habari mbalimbali za Biblia na kanuni zinazoweza kutusaidia katika huduma yetu na katika maisha yetu ya kila siku.

Makusanyiko ya eneo na ya mzunguko. Makutaniko mengi huhudhuria makusanyiko matatu makubwa ambayo tunafanya kila mwaka. Matukio hayo yenye shangwe hukazia fikira ujumbe hususa wa Biblia na yanatia ndani hotuba, maonyesho, mahojiano, na video. Kama tu ilivyo na mikutano yetu ya kutaniko, makusanyiko ya eneo na ya mzunguko yanatusaidia kupata ujuzi zaidi wa Biblia na kuwa wahubiri bora wa habari njema. Watu wote wanakaribishwa kuhudhuria na hakuna sadaka zinazokusanywa.

Shule za Biblia za Mashahidi wa Yehova

Baadhi ya Mashahidi wa Yehova hualikwa kuhudhuria shule mbalimbali za Biblia ili wapate mazoezi zaidi. Shule hizo ni zipi? Zinatimiza kusudi gani na zinafanyika kwa muda gani? Ni nani wanaoweza kuhudhuria shule hizo?

Shule ya Utumishi wa Painia

Kusudi: Kuwazoeza watumishi wa wakati wote wanaoitwa mapainiab kuhubiri na kufundisha kwa njia nzuri zaidi. Mtaala wa shule hiyo unatia ndani mazungumzo darasani, maigizo, hotuba, na vipindi vya mazoezi.
Muda: Siku sita.
Wanaohudhuria: Wale ambao wametumikia wakiwa mapainia wa kawaida kwa angalau mwaka mmoja wanaalikwa kuhudhuria. Mapainia ambao wametumikia kwa muda mrefu na ambao hawajahudhuria shule hiyo ndani ya miaka mitano iliyopita wanaweza kualikwa kuhudhuria tena.

Shule ya Waeneza-Injili wa Ufalme

Kusudi: Kuwapa watumishi wa wakati wote wenye uzoefu mazoezi ya pekee. Wanafunzi huboresha stadi zao za kuhubiri na kufundisha, na wanajifunza Biblia kwa kina. Wahitimu wengi wa shule hiyo hupata mgawo wa kwenda kwenye maeneo yenye uhitaji mkubwa wa waeneza-injili.
Muda: Miezi miwili.
Wanaohudhuria: Mapainia wanaweza kuomba kuhudhuria ikiwa wanatimiza vigezo fulani na ikiwa hali zao zinawaruhusu kutumikia mahali popote penye uhitaji.

Shule ya Wazee wa Kutaniko

Kusudi: Kuwasaidia wazee wa kutaniko kushughulikia majukumu yao kutanikoni kama vile, kufundisha, kufanya ziara za uchungaji, na kuimarisha upendo wao kwa Mungu na kwa waabudu wenzao.—1 Petro 5:2, 3.
Muda: Siku tano.
Wanaohudhuria: Wazee wapya waliowekwa rasmi na pia wazee wa kutaniko wenye uzoefu ambao hawajahudhuria shule hiyo ndani ya miaka mitano iliyopita wanaalikwa kuhudhuria.

Shule ya Waangalizi wa Mzunguko na Wake Zao

Kusudi: Kuwazoeza watumishi wa wakati wote wanaosafiri wanaoitwa waangalizi wa mzunguko,c kutimiza majukumu yao kwa njia bora zaidi. (1 Timotheo 5:17) Mtaala wa shule hiyo unawasaidia wazee hawa Wakristo na wake zao kupata ufahamu zaidi wa Maandiko.
Muda: Mwezi mmoja.
Wanaohudhuria: Waangalizi wapya wa mzunguko pamoja na wake zao wanaalikwa kuhudhuria shule hiyo baada ya mwaka mmoja katika mgawo wao. Baada ya kuhudhuria kwa mara ya kwanza, wao hualikwa tena kuhudhuria shule hiyo baada ya kila miaka mitano hivi.

Shule ya Huduma ya Ufalme

Kusudi: Kuwasaidia wazee wa kutaniko na watumishi wa hudumad kutimiza majukumu yao kutanikoni kwa kuzingatia hali na uhitaji uliopo wakati huo. (2 Timotheo 3:1) Shule hiyo hufanywa kila baada ya miaka kadhaa.
Muda: Siku moja au zaidi.
Wanaohudhuria: Waangalizi wa mzunguko, wazee wa kutaniko, na watumishi wa huduma.

Shule ya Utumishi wa Betheli

Kusudi: Kuwasaidia Wanabethelie kufaulu katika kazi yao na kuimarisha upendo wao kwa Mungu na kwa Wanabetheli wenzao.
Muda: Siku tano na nusu.
Wanaohudhuria: Wanabetheli wapya wanaalikwa kuhudhuria. Wanabetheli ambao wametumikia kwa muda mrefu na hawajahudhuria shule hiyo ndani ya miaka mitano iliyopita wanaweza kualikwa kuhudhuria tena.

Shule ya Gileadi

Kusudi: Kuwasaidia wanafunzi wasitawishe upendo wenye kina kwa Neno la Mungu na kutumia mambo wanayojifunza. (1 Wathesalonike 2:13) Wanaume na wanawake wakomavu kiroho wanaohudhuria shule hiyo ya Gileadi ni msaada mkubwa katika tengenezo la Yehova na katika kazi ya ulimwenguni pote ya kutoa elimu ya Biblia. Wahitimu wa shule hiyo wanaweza kupewa mgawo shambani au kwenye ofisi ya tawi katika nchi yao au nchi ya kigeni.
Muda: Miezi mitano.
Wanaohudhuria: Ofisi za tawi huwaalika baadhi ya watumishi wa wakati wote kujaza ombi la kuhudhuria. Shule hiyo hufanywa Marekani katika Kituo cha Elimu cha Watchtower huko Patterson, New York.

Shule ya Washiriki wa Halmashauri ya Tawi na Wake Zao

Kusudi: Kuwazoeza Washiriki wa Halmashauri ya Tawif kusimamia kazi zinazofanywa katika ofisi ya tawi na utendaji wa kiroho wa Mashahidi wa Yehova katika nchi zilizo chini ya usimamizi wa ofisi hiyo ya tawi.
Muda: Miezi miwili.
Wanaohudhuria: Makao Makuu ya Mashahidi wa Yehova huwaalika baadhi ya Washiriki wa Halmashauri ya Tawi na wake zao kuhudhuria shule hii ambayo hufanywa katika Kituo cha Elimu cha Watchtower huko Patterson, New York.

Mazoezi ambayo Mashahidi hupata yanategemea nini?

Biblia ndio msingi wa mazoezi ambayo Mashahidi wa Yehova hupata. Tunaamini kwamba Biblia imeongozwa na roho ya Mungu na inatoa ushauri bora kwa ajili ya kila sehemu ya maisha ya Kikristo.—2 Timotheo 3:16, 17.

Je, Mashahidi wa Yehova wanahitaji kulipia mazoezi hayo?

La. Mazoezi hayo yanapatikana bila malipo. Utendaji wa Mashahidi wa Yehova unategemezwa kwa michango ya hiari.—2 Wakorintho 9:7.

a Biblia na vifaa vya kujifunzia Biblia, kutia ndani video, vinapatikana katika tovuti yetu ya jw.org.

b Painia ni Shahidi aliyebatizwa—mwanamume au mwanamke—ambaye ni mfano mzuri, anayejitolea kutumia idadi hususa ya saa kila mwezi kuhubiri habari njema.

c Mwangalizi wa mzunguko ni mtumishi wa wakati wote anayetembelea kutaniko tofauti kila juma katika mzunguko wake. Yeye huwatia moyo ndugu na dada kupitia hotuba zinazotegemea Biblia na kwa kushirikiana nao katika huduma.

d Watumishi wa huduma hufanya kazi mbalimbali ili kuwasaidia ndugu na dada zao. Kwa kufanya hivyo, wanawawezesha wazee wa Kutaniko kupata muda zaidi wa kufundisha na kufanya ziara za uchungaji.

e Betheli ni ofisi za tawi za Mashahidi wa Yehova. Watumishi wa wakati wote wanaotumikia huko hutegemeza utendaji wa Mashahidi wa Yehova katika eneo la ofisi yao ya tawi.

f Halmashauri ya Tawi hufanyizwa na wanaume watatu au zaidi wenye sifa za kustahili kiroho.

Mashahidi wa Yehova wananufaikaje kutokana na mazoezi hayo?

“Mimi ni mwenye haya, hivyo, ilikuwa vigumu kwangu kuzungumza na watu nisiowafahamu kuhusu Biblia. Lakini mazoezi ambayo nimepata kwenye mikutano ya katikati ya juma yamenisaidia kuwa mwenye uhakika zaidi na kuwa mwalimu bora zaidi. Pia imekuwa rahisi zaidi kwangu kuzungumza na wengine kazini na kutanikoni.”—Natasha, Marekani.
“Kuhudhuria Shule ya Waeneza-Injili wa Ufalme kumenisaidia kusitawisha sifa za kimungu kama vile, upendo, subira, na fadhili. Ninahisi nimekuwa rafiki, jirani, na Mkristo bora zaidi. Shule hiyo imenifundisha jinsi ya kufanya utafiti wa habari mbalimbali za Biblia na jinsi ya kufafanua Neno la Mungu kwa njia inayogusa moyo.”—Stephen, Nigeria.
“Shule ya Wazee wa Kutaniko imenisaidia kusitawisha unyenyekevu ninaohitaji ili kutumikia nikiwa mzee. Hotuba zilizotolewa zilikazia umuhimu wa kuiga mfano wa Yesu.”—Luca, Italia.
“Shule ya Huduma ya Ufalme ilinionyesha umuhimu wa kuwa mwenye kufikika, mwenye fadhili, na mwenye urafiki ninaposhughulika na wengine. Nilijifunza kwamba ninapofanya mambo kwa ajili ya wengine, ninapaswa kuchochewa na upendo na si kufanya ili kutimiza wajibu tu.”—Samuel, Uingereza.
“Shule ya Gileadi ilitusaidia kujichunguza kwa kutumia Neno la Mungu ambalo ni kama kioo. (Yakobo 1:22-25) Tulitambua mabadiliko tuliyohitaji kufanya katika utu wetu na katika utumishi wetu kwa Yehova. Pia tulijifunza kuwafikiria wengine kuliko tunavyojifikiria na kuhakikisha kwamba mambo tunayosema au kufanya yanachochewa na upendo.”—Elnathan na Princess, Filipino.