Kutangaza Habari Njema—Kwa Trakti na Vikaratasi vya Mwaliko
1 “Nilitembea nikampita bibi mmoja ambaye alinipatia trakti ya Biblia,” mwanamume mmoja akaandikia Sosaiti. “Ilisomeka, ‘Uzima Katika Ulimwengu Mpya Wenye Amani.’ Nilikuwa na huzuni kabla ya kuisoma, lakini baadaye nilichangamka sana na nikawa na amani.” Mwanamume huyo alitaka habari zaidi naye akaandika ili aipate, akieleza hivi: “Ninatazamia kwa hamu sana kutoka kwenu kile kitabu, ‘Unaweza Kuishi Milele Katika Paradiso Duniani.’”
2 Kweli kweli, hamu ya kiroho ya wengi ambao sasa wanasifu Yehova, ilichochewa na trakti pamoja na ujumbe wa Biblia ambao umechapwa nyuma ya vikaratasi vyetu vya mwaliko. Je, wewe unatumia trakti na vikaratasi vya mwaliko katika huduma yako? Wengi wanafanya hivyo. Katika Brooklyn pekee, trakti Ulimwengu Mpya Wenye Amani zaidi ya milioni 122 zimechapwa, pamoja na nakala zapata milioni 250 za trakti nyingine tatu, Sababu Kwa Nini Wewe Unaweza Kuitumaini Biblia, Mashahidi wa Yehova Wanaamini Nini? na Kuna Tumaini Gani kwa Wapendwa Waliokufa? Trakti zaidi ya 325,000 zilipelekewa makundi katika Afrika Mashariki mwaka jana.
3 Haitupasi kamwe kuzikadiria kidogo nguvu za Neno la Mungu kama linavyoelezwa katika jumbe hizi fupi. (Ebr. 4:12; linganisha Zekaria 4:10; Yakobo 3:4, 5.) Shahidi mmoja kutoka Arizona aliandika: “Mimi nilisoma trakti nyingi kutoka kwa Sosaiti na hatimaye nikajifunza kweli.” Alieleza: “Katika ulimwengu huu wa haraka-haraka, mara nyingi watu hawataki kutumia wakati mwingi kusoma, lakini trakti ni ndefu vya kutosha kuwa na ujumbe wenye maana lakini si ndefu sana kuwageuzia mbali watu hata kabla hawajazitazama.”
4 Kwa sababu mbalimbali, mara nyingi watu wanasita kuchukua fasihi kutoka kwetu. Lakini wengi wanastarehe kukubali trakti tu. Mwangalizi mmoja wa mzunguko alieleza kwamba yeye ana kifuko cha plastiki naye huonyesha trakti akimruhusu mwenye nyumba achague ile anayopenda. “Trakti namba moja inayochaguliwa,” aandika, “ni Mashahidi wa Yehova Wanaamini Nini?”
KATIKA ZIARA YA KWANZA
5 Baadhi ya wahubiri huona kwamba kutoa trakti au kikaratasi cha mwaliko ni njia yenye mafanikio ya kuanza mazungumzo. Kwa kutoa moja, mwenye nyumba ambaye anasita kufungua mlango huenda akashawishwa kufanya hivyo. Kuonyesha ratiba ya mikutano inayoelezewa katika kikaratasi cha mwaliko kwaweza kufungua njia ya mazungumzo juu ya kazi na kusudi letu. Makundi yaweza kuagiza vikaratasi vya mwaliko vikionyesha ratiba ya mikutano.
6 Ikiwa kwa wazi mwenye nyumba ana shughuli au ana dhiki, huenda trakti ikawa ndiyo tu inayohitajiwa. Mwanamke mmoja alifarijiwa sana na ile trakti juu ya tumaini kwa wafu kwamba aliiandikia Sosaiti apate habari zaidi. Wakati hamna mtu nyumbani, trakti yaweza kuachiwa mwenye nyumba mahali isipoweza kuonekana na wapitaji.
KATIKA ZIARA ZA KURUDIA
7 Ukirudi mahali kiasi fulani cha kupendezwa kilionyeshwa wakati uliopita, waweza kusema: “Hujambo, [Toa jina]. Kwa kweli ninafurahi sana kukupata nyumbani. Tulipokutana mara ya mwisho, nilivutiwa kwa sababu ya wewe kuchukua wakati kuzungumza juu ya Biblia. Nina habari zaidi ambayo nafikiri huenda ikakupendeza. Inapatikana katika trakti hii, Uzima Katika Ulimwengu Mpya Wenye Amani. Ukikumbuka, wakati uliopita tuliongea juu ya ahadi ya Biblia ya amani ya kweli na yenye kudumu kwa ajili ya ainabinadamu. Hata hivyo, kwa kuwa wengi hufikiria tu juu ya mbinguni wakati wanaposoma ahadi hizo, angalia kwamba Zaburi 37:29 huonyesha baraka hizi zitatukia hapa duniani. [Soma andiko, ukionyesha mwenye nyumba lilipo katika trakti.] Je, hiyo haisikiki kuwa yenye kupendeza? [Zungumzia mafungu kadhaa.] Kuna maandiko zaidi yenye kutia moyo katika trakti hii, nawe utayaona kuwa yenye kufurahisha vilevile. Nijapo wakati ujao, labda twaweza kusoma baadhi yayo pamoja kama vile tumefanya leo.”
8 Kwa kweli, trakti na vikaratasi vyetu vya mwaliko ni zawadi kutoka kwa Yehova. Sisi na tuitumie kwa ustadi misaada hii tutekelezapo huduma yenye mafanikio kwa sifa yake na baraka zetu za milele.—Mit. 22:29.