Watoto Wanapoondoka Nyumbani

CHANGAMOTO

Wenzi wa ndoa hukabili changamoto kubwa zaidi watoto wanapokuwa watu wazima na kuondoka nyumbani. Nyumba inapokuwa haina watoto, wenzi wa ndoa huhisi kana kwamba hawafahamiani. Mshauri wa masuala ya familia M. Gary Neuman aliandika hivi: “Watu wengi ninaowashauri ni wale ambao hawajui jinsi ya kurudisha uhusiano wa karibu kati yao na wenzi wao wa ndoa. Watoto wanapoondoka, [wazazi] wanakuwa na mambo machache ya kusimuliana au kuzungumzia.”a

Je, kwa njia fulani mambo hayo yanafunua hali ilivyo katika ndoa yako? Ikiwa ndivyo, unaweza kuboresha mahusiano yenu. Kwanza kabisa, fikiria sababu ambazo huenda zimechangia hali ya kutokuwa na ukaribu kati yako na mwezi wako wa ndoa.

CHANZO CHA HALI HIYO

Kwa miaka mingi watoto walichukua nafasi ya kwanza. Wakiwa na nia nzuri kabisa, wazazi wengi hutanguliza mahitaji ya watoto kuliko mahitaji ya ndoa yao. Matokeo ni kwamba, wanazoea kutimiza majukumu yao ya kuwa baba na mama na hivyo kudhoofisha uhusiano wao wakiwa mume na mke, jambo ambalo huonekana wazi mara tu watoto wanapoondoka nyumbani. Mwanamke fulani aliyeolewa mwenye umri wa miaka 59 anasema hivi: “Watoto walipokuwepo, angalau tulifanya mambo pamoja.” Lakini anakiri kwamba, baada ya wototo kuondoka “kila mtu alianza kufuatilia mambo yake.” Wakati fulani hata alimwambia mume wake hivi: “Unaingilia mambo yangu.”

Baadhi ya wenzi wa ndoa hawajajiandaa kukabili hali hiyo mpya maishani. Kitabu Empty Nesting kinasema hivi: “Kwa wenzi wengi wa ndoa, hali hubadilika na kuwa kana kwamba wameingia katika ndoa mpya.” Kwa sababu wanahisi wana mambo machache sana ya kufanya pamoja, waume wengi na wake huamua kila mtu ajitenge na kufuatilia mambo yake, na hivyo badala ya kuwa wenzi wa ndoa wanakuwa tu kama watu wanaoishi nyumba moja.

Habari njema ni kwamba, unaweza kukwepa madhara hayo, na hata kufurahia maisha yenu mapya. Biblia inaweza kukusaidia. Acheni tuone jinsi inavyoweza kufanya hivyo.

MAMBO UNAYOWEZA KUFANYA

Azimia kukubali mabadiliko. Biblia inasema hivi kuhusu watoto ambao tayari ni watu wazima: “Mwanamume atamwacha baba yake na mama yake.” (Mwanzo 2:24) Mkiwa wazazi, lengo lenu lilikuwa kuwafundisha watoto na kuwasaidia wasitawishe ustadi ambao watahitaji kuutumia watakapokuwa watu wazima. Kwa msingi huo, kuondoka kwa watoto nyumbani ni jambo mnalopaswa kujivunia.—Kanuni ya Biblia: Marko 10:7.

Bila shaka, bado utaendelea kuwa mzazi kwa watoto wako. Hata hivyo, badala ya kuwa msimamizi wewe sasa ni mshauri. Uhusiano huo mpya unakuwezesha kudumisha ukaribu na watoto wako, na wakati huohuo kutanguliza mahitaji ya mwenzi wako wa ndoa.b—Kanuni ya Biblia: Mathayo 19:6.

Eleza hisia zako. Mweleze mwenzi wako jinsi mabadiliko hayo ya maisha yanavyokuathiri, na uwe tayari kusikiliza hisia zake pia. Jitahidi kuelewa na uwe mwenye subira. Huenda ikachukua muda kuimarisha uhusiano wenu kama mume na mke, lakini jitahada hizo zina matokeo mazuri.—Kanuni ya Biblia: 1 Wakorintho 13:4.

Tafuteni mambo mapya mnayoweza kufanya pamoja. Zungumzieni kuhusu malengo ambayo mngependa kutimiza pamoja au mambo ambayo mngependa kufurahia mkiwa wenzi wa ndoa. Kwa sababu ya kulea watoto, mmepata hekima nyingi ya jinsi ya kushughulika na maisha. Kwa nini msiitumie kuwasaidia wengine?—Kanuni ya Biblia: Ayubu 12:12.

Azimieni upya kuimarisha uhusiano wenu. Fikiria kuhusu sifa za mwenzi wako zilizokuvutia. Vilevile, fikirieni kuhusu historia yenu na changamoto mlizofanikiwa kushinda mkiwa pamoja. Hatimaye, mtaweza kufurahia maisha yenu mapya. Kwa kweli, kwa jitihada za pamoja sasa mna fursa ya kuboresha hali ya ndoa yenu na kurudisha upendo wenu wa mwanzoni.