“Ilikuwa Zawadi Bora Niliyowahi Kupokea”

Binti mwenye umri wa miaka 13 alihisi hivyo baada ya kupokea zawadi ya mnyama anayempenda. Mwanamke fulani ambaye ni mfanyabiashara mwenye mafanikio alisema kwamba zawadi ya kompyuta aliyopewa na baba yake alipokuwa shule ya sekondari, ilibadili maisha yake. Mwanamume aliyeoa hivi karibuni anahisi kwamba kadi aliyotengenezewa na mke wake walipotimiza mwaka mmoja wa ndoa, ilikuwa zawadi bora aliyowahi kupokea.

Kila mwaka, watu hutumia muda na jitihada nyingi wakitafuta zawadi “bora” ya kumpatia rafiki au mtu wa ukoo katika matukio ya pekee. Na wengi wao wangependa kusikia maneno kama yale yaliyo kwenye kichwa cha makala hii. Namna gani wewe? Je, ungependa kupokea au kutoa zawadi ambayo itathaminiwa?

Tarajio hilo linapendeza sana, kwa sababu ya jinsi linavyofanya mtoaji na mpokeaji wahisi. Haishangazi kwamba Biblia inasema: “Kuna furaha zaidi katika kutoa kuliko ilivyo katika kupokea.” (Matendo 20:35) Bila shaka, tutapata furaha zaidi ikiwa zawadi tunayotoa inathaminiwa na yule tunayempatia.

Hivyo basi, unapotoa zawadi, unaweza kufanya nini ili wewe na yule anayeipokea mpate furaha zaidi? Na ingawa si rahisi kutoa zawadi “bora,” unaweza kufanya nini ili zawadi yako ithaminiwe?