Eɓa zi taãbu zitso zia suku ?

DJAWABU LA I LABIBLU

« Mungu [...] atso vangua kula tsozi la matso yao, na i hufa ka itso ka tsena ; wala yeda, wala keme, wala utungu » (Mivenuliyo 21:3, 4, Tafaswiri ya dunia mpia).

IYO INA MANA TRINI NA WAWE ?

Wahadi unu usi hu va :

i yakini amba Mungu tsi ɗe a tsongao taãbu zaho (Yakoɓu 1:13),

u mutrulidziyo wa ujua amba Mungu waye u sikitiha wakati u taãbihao (Zakariya 2:8),

i tama ya kweli amba piya zi taãbu zitso zia (Zaɓur 37:9-11).

RITSO JUA RI AMINI IYO I LABIBLU I RONGOAO ?

Ewa, ha ushashi, vwa mana mbili :

• Mungu u yenga zi taãbu na u udhuluma. Ngalia hali Jehovah Mungu aka, wakati umati wahe wako taãbishiwa ha upeu swafi hale oho. I Labiblu isi rongoa amba, waye « ako wa voreha, wakati wako sikitiha harimwa upeu » (Mahakimu 2:18, Tafaswiri ya dunia mpia).

  Mungu ka si vwamoja ata hata, na wawo wa fanyiao wanyawe upeu. Mufano, i Labiblu isi rongoa amba « watru wa ulao wanyawe ɓure ɓure tu », Mungu u « tukiwa » na wawo (Nyasia 6:16, 17, Tafaswiri ya dunia mpia).

• Mungu asi shahiliha na kula mutru ɓaina ya wasi. Kula mutru asi jua « shikodzo yahe na utungu wahe », ɓe Jehovah asi zi jua wajau ! (2 Tarehi 6:29, 30, Tafaswiri ya dunia mpia).

  Jehovah atso toa zi taãbu za kula mutru, ha u rumia Ufalume wahe (Matiyo 6:9, 10). Ha u lindra, waye u trulidza ha mahaba, wawo wa mu zunguhao ha kweli (Mavingizi Risala 17:27 ; 2 Makorintiyo 1:3, 4).