Baraka Zinazotokana na
Huduma ya Painia
1 “Najua kwamba hakuna kazi nyingine ambayo ingeweza kuniletea utoshelezo unaotokana na kushiriki kweli na wengine,” alisema painia mmoja. Mwingine alisema: “Mwishoni mwa kila siku, usingizi wangu ni mtamu na moyo wangu umejawa shangwe.” Mapainia hao wanawakilisha ndugu na dada wa mahali pote ambao wameonja baraka zinazotokana na huduma ya painia.—Mez. 10:22.
2 Kusaidia wengine wapate ujuzi wa Neno la Mungu unaookoa uhai kunaleta kutosheka. (Mdo. 20:35; 1 Thes. 2:19, 20) “Inasisimua na kutia nguvu imani kuona jinsi Neno la Mungu lilivyo na nguvu katika kuchochea watu wafanye mabadiliko katika maisha yao,” akaandika painia mmoja wa muda mrefu. Ndiyo, kwa kujitoa ili kusaidia watu na kuongoza mafunzo ya Biblia, mapainia watafurahia baraka kama hizo.
3 Kutegemea Yehova: Kutegemea roho ya Mungu kila siku wanapotimiza huduma yao kunasaidia mapainia wasitawishe “matunda ya roho” na ni ulinzi kwao. (Gal. 5:16, 22, 23) Kwa kuongezea, kwa kuwa wanatumia Neno la Mungu kwa ukawaida, mara nyingi mapainia huwa mafundi katika kutumia Maandiko ili kutetea kweli na kutia wengine nguvu. (2 Tim. 2:15) Ndugu mmoja ambaye amekuwa painia kwa miaka mingi alieleza: “Kupainia kumenisaidia kujipatia ujuzi wa Biblia wenye kina, ujuzi ambao lazima nitumie ili kusaidia watu wapate kumjua Yehova na makusudi yake.” Ni jambo lenye kuthawabisha kama nini!
4 Mapainia wa kawaida wanapaswa pia kumtegemea Yehova katika njia nyingine nyingi. Imani yao inatiwa nguvu wanapoona jinsi anavyobariki jitihada zao za kutosheleza mahitaji yao ya kimwili. Ndugu mmoja mwenye umri wa miaka 72 ambaye amekuwa painia wa kawaida kwa miaka 55 alisema: “Yehova hakunisikitisha kamwe.” Zaidi ya hayo, kwa kufanya maisha yao kuwa mepesi, mapainia wanajilinda wasipatwe na mahangaiko mengi ya maisha. Je, jambo hilo linakuvutia?—Mt. 6:22; Ebr. 13:5, 6.
5 Kumkaribia Mungu: Uhusiano wetu pamoja na Yehova ndio urithi wa thamani zaidi. (Zab. 63:3) Tunaposhiriki kikamili katika huduma kwa sababu ya upendo kwa Yehova, uhusiano huo unakuwa wa karibu zaidi. (Yak. 4:8) Ndugu mmoja ambaye amekuwa painia kwa zaidi ya miaka 18 alisema: “Utumishi wa painia huturuhusu ‘kuonja tuone ya kwamba Yehova ni mwema,’ siku baada ya siku tukijenga uhusiano wenye nguvu hata zaidi pamoja na Muumba wetu.”—Zab. 34:8.
6 Zaidi ya kuwa na hali zinazohitajiwa, mapainia wanapaswa kuwa na imani yenye nguvu, upendo wa kweli kwa Mungu na kwa jirani, na utayari wa kujinyima. (Mt. 16:24; 17:20; 22:37-39) Hata hivyo, kama vile nyuso zenye furaha za mapainia zinavyoshuhudia, baraka zinazotokana na huduma ya painia zinapita mambo wanayojinyima. (Mal. 3:10) Si mapainia tu wanaopata baraka hizo, lakini familia zao na makutaniko yao pia yanafaidika sana na roho nzuri inayoonyeshwa na mapainia.—Flp. 4:23.
[Study Questions]
1, 2. Ni baraka gani zinazohusiana sana na huduma ya painia, na kwa nini?
3, 4. Upainia unafundishaje mtu kumtegemea Yehova, na hilo linasaidiaje mtu akomae kiroho?
5. Kupainia kunasaidiaje mtu amkaribie Yehova?
6. Mapainia wanapaswa kuwa na nini, na zaidi ya mapainia, ni nani wengine wanaofaidika?