Dumisha Jicho Lako Likiwa Rahisi
1 Katika mahubiri yake ya Mlimani, Yesu alivutia uangalifu kwenye uvutano mkubwa ambao jicho la mfano linaweza kuwa nao juu ya maisha yetu yote. Alisema: “Ikiwa jicho lako ni rahisi, mwili wako wote utakuwa mwangavu; lakini ikiwa jicho lako ni bovu, mwili wako wote utakuwa wenye giza.” (Mt. 6:22, 23) Jicho rahisi ni lile ambalo linakazia kwenye mradi mmoja—kufanya mapenzi ya Mungu—halikengeushwi na mahangaiko yasiyo ya lazima kuhusu vitu vya kimwili. (Mt. 6:19-21, 24-33) Ni nini kinachoweza kutusaidia ili tuendelee kuwa na jicho rahisi?
2 Kukuza Kutosheka: Mtu kushughulikia inavyofaa mahitaji ya washiriki wa nyumba yake ni wajibu wa Kimaandiko. (1 Tim. 5:8) Lakini hilo halimaanishi kwamba tujiingize katika utafutaji usio na mwisho wa vitu vya kisasa vilivyo bora zaidi. (Met. 27:20; 30:8, 9) Badala yake, Maandiko yanatuhimiza kutosheka na “chakula na kitu cha kujifunika,” yakiwa ndiyo mambo ya lazima maishani. (1 Tim. 6:8; Ebr. 13:5, 6) Kusikiliza shauri hili kunaweza kutusaidia kuendelea kuwa na jicho linalokazia mambo yanayofaa.
3 Ni jambo la hekima tuepuke kujitwika mizigo ya madeni na ya vitu vya kimwili visivyo vya lazima au ufuatiaji wa mambo fulani unaotuchukua wakati na uangalifu mwingi. (1 Tim. 6:9, 10) Tunawezaje kufanya hivyo? Unapofikiria kutenda jambo fulani, tafakari jambo hilo kwa uzito katika sala na ukadirie kwa unyofu ikiwa litaingilia mambo ya kiroho. Azimia kutanguliza mambo ya kiroho katika maisha yako.—Flp. 1:10; 4:6, 7.
4 Fanya Maisha Yako Yawe Mepesi: Msaada mwingine ili kupinga uvutano wa vitu vya kimwili ni kutafuta njia za kurahisisha mtindo wa maisha yetu. Ndugu mmoja aliyeona kwamba familia yake ingejitosheleza bila kuwa na vitu vya kimwili vingi alisema: “Sasa ninaweza kufanya mengi katika kutaniko ili kutumikia ndugu zangu. Niko hakika kwamba Yehova anabariki watumishi wake wote wanapotanguliza ibada ya kweli kuliko mapendezi yao ya kibinafsi.” Je, unaweza kufurahia baraka nyingi kwa kurahisisha mtindo wa maisha yako?
5 Jitihada yenye kuendelea inahitajiwa ili kupinga uvutano wa Shetani, ulimwengu wake wa kupenda vitu vya kimwili, na pia mwili wetu usiokamilika. Kuliko kuruhusu macho yaende huku na huku, acheni tuyafanye yakazie kufanya mapenzi ya Mungu na tumaini letu lenye thamani la uzima wa milele.—Met. 4:25; 2 Kor. 4:18.
[Maulizo ya Funzo]
1. Inamaanisha nini kuwa na jicho rahisi, na kwa nini hilo ni jambo la maana?
2. Neno la Mungu linatutia moyo tuwe na maoni gani kuhusu vitu vya kimwili?
3. Ni nini kinachoweza kutusadia tuepuke mizigo tunayojitwika wenyewe?
4. Kwa nini tunapaswa kutafuta njia za kurahisisha mtindo wa maisha yetu?
5. Kwa nini jitihada yenye kuendelea inahitajiwa ili kuwa na jicho letu likiwa rahisi?