Kampeni ya Pekee ya Kugawa Broshua Mpya
1 Watu wengi leo ni wenye kutaabishwa na hali za ulimwenguni, lakini ni wachache tu ndio wanaoelewa kwa nini ulimwengu unapatikana katika hali hizo, wakati ujao utakuwaje, na kile wanachopaswa kufanya ili kuokoka wakati wa hukumu inayokuja. (Eze. 9:4) Ili kuwasaidia watambue maana ya nyakati zetu, kampeni ya pekee ya kugawa broshua mpya Endeleeni Kukesha! itaongozwa kutoka Siku ya Kwanza, Oktoba 18, mpaka Siku ya Yenga, Novemba 14.
2 Broshua hiyo inaweza kutolewa tunaposhiriki katika huduma ya nyumba kwa nyumba, tunapofanya ziara za kurudia, tunapotoa ushahidi wa vivi hivi, wa barabarani, au tunapohubiri katika eneo la biashara. Hata hivyo, broshua Endeleeni Kukesha! hazitagawanywa ovyoovyo. Badala ya hivyo, broshua zitatolewa tu wale wanaopendezwa kwelikweli na yale ambayo Biblia inasema kuhusu maana ya matukio ya ulimwenguni. Wale ambao hawapendezwi sana na ujumbe wanaweza kutolewa trakti.
3 Unaweza kuvuta uangalifu wa mtu kwa kusema:
◼“Watu wengi wanahangaishwa na matatizo mazito na matukio yenye kushtua yanayoenea leo. [Taja mfano unaojulikana kwenu.] Je, ulijua kwamba mambo kama hayo yalitabiriwa katika Biblia? [Acha mtu ajibu. Kisha soma andiko linalofaa mfano uliotajwa, kama vile Mathayo 24:3, 7, 8; Luka 21:7, 10, 11; au 2 Timotheo 3:1-5.] Biblia inafunua maana ya nyakati zetu na kile kinachongojea wanadamu wakati ujao. Je, ungependa kujua mengi zaidi? [Acha mtu ajibu. Mtolee broshua ikiwa anapendezwa kweli.] Broshua inatolewa bila malipo. Ikiwa unataka kufanya mchango kwa ajili ya kazi yetu ya ulimwenguni pote, tutafurahi kuukubali.”
4 Au unaweza kuona kwamba utoaji huu ni wenye matokeo:
◼“Watu wengi leo wanataabishwa na matukio yenye kushtua au kufiwa na mtu katika hali ya kikatili. Wengine wanajiuliza kwa nini Mungu hachukuwi hatua ili kuzuia mambo kama hayo. Biblia inatuhakikishia kwamba Mungu atatenda karibuni ili kutuliza mateso ya wanadamu. Ona baraka ambazo Mungu ataletea wanadamu. [Soma Zaburi 37:10, 11.] Je, ungependa kujua mengi zaidi?” Malizia kama inavyoonyeshwa hapo juu.
5 Jaribu kuchukua jina na anwani ya kila mtu anayekubali broshua, na panga kumrudilia ili kusitawisha kupendezwa huko. Mapendekezo kuhusu jinsi ya kufanya hivyo yatatolewa katika Huduma Yetu ya Ufalme, toleo la Novemba 2004. Ikiwa mtu anaonyesha kupendezwa sana wakati wa ziara ya kwanza, unaweza kuanza mara moja funzo la Biblia kwa kutumia broshua Endeleeni Kukesha! au kichapo kingine, kama vile broshua Anataka.
6 Nakala za broshua mpya zitapatikana baada ya Mkutano wa Utumishi ambamo makala hii itazungumziwa. Inapendekezwa kwamba wahubiri na mapainia wachukue tu kwanza nakala watakazohitaji kutolea watu siku chache za kwanza za kampeni. Yehova na abariki utendaji huo wa pekee kwa sifa yake na kwa faida ya wenye mioyo minyofu mahali pote.—Zab. 90:17.