நாங்களோ விசுவாசிக்கிறவர்கள்

இந்தியாவில் பைபிள் படிப்பு மூலம் விசுவாசத்தைக் கட்டுதல்

வடக்கே கம்பீரமான, “வெள்ளி மகுடம்” சூடி நிற்கும் இமயத்திலிருந்து தெற்கே நீலக்கம்பளம்போல பரந்து விரிந்து கிடக்கும் இந்து மகா சமுத்திரம் வரையாக இந்தியா நில அமைப்பிலும் மத நம்பிக்கைகளிலும் வேற்றுமைகள் பல கொண்ட நாடு. நூறு கோடிக்கும் மேற்பட்ட மக்கள்தொகை கொண்ட இந்நாட்டில் இந்துக்கள் 83 சதவீதமும் முஸ்லீம்கள் 11 சதவீதமும் வாழ்கின்றனர். மீதமுள்ளவர்கள் முக்கியமாக பெயர் கிறிஸ்தவர்கள், சீக்கியர்கள், புத்த மதத்தினர், ஜைன மதத்தினர் ஆவர். அனைவருக்கும் இந்நாட்டில் மத சுதந்திரம் உண்டு. “இந்தியர்களின் வாழ்க்கையில் மதத்துக்கு முக்கிய பங்குண்டு” என்பதாக தி உவர்ல்ட் புக் என்ஸைக்ளோப்பீடியா கூறுகிறது.

இந்தியாவில் கிறிஸ்தவ மத நம்பிக்கைகளுக்கு ஏற்ப வாழும் யெகோவாவின் சாட்சிகள் 21,200-க்கும் மேற்பட்டவர்கள் ஆவர். உலகின் மற்ற பாகங்களிலுள்ள அவர்களுடைய ஆவிக்குரிய தோழர்களைப் போலவே, இந்தியாவிலுள்ள சாட்சிகளும் கடவுளுடைய வார்த்தையாகிய பரிசுத்த பைபிளில் விசுவாசம் வைக்க தங்கள் அயலாருக்கு உதவிசெய்வதை ஒரு பாக்கியமாக கருதுகின்றனர். (2 தீமோத்தேயு 3:16, 17) தென்னிந்தியாவிலுள்ள சென்னை மாநகரத்தில் ஒரு குடும்பம் எவ்வாறு பைபிள் சத்தியத்தை அறிந்துகொண்டது என்பதை பாருங்கள்.

யெகோவாவின் சாட்சிகள் இந்தக் குடும்பத்தோடு தொடர்பு கொள்வதற்கு முன்பாக இவர்கள் கத்தோலிக்க கரிஸ்மாட்டிக் இயக்கங்களில் மிகவும் சுறுசுறுப்பாக ஈடுபட்டு வந்தார்கள். அப்போது தரிசனங்களைக் கண்டதாகவும், அந்நிய பாஷைகளைப் பேசியதாகவும், வியாதியஸ்தர்களைக் குணப்படுத்தியதாகவும் சொன்னார்கள். அவர்கள் சர்ச்சிலும் சமுதாயத்திலும் மிகவும் பிரபலமாக இருந்தார்கள். இந்தக் குடும்பத்திலுள்ள சிலரை மக்கள் “சாமி” என்றும்கூட குறிப்பிட்டு பேசினர். இதன் பொருள் “ஆண்டவர்” என்பதாகும். ஒரு நாள் ஒரு சாட்சி இந்தக் குடும்பத்தைச் சந்தித்தார். அவர் பைபிளிலிருந்து, பொதுவாக நம்பப்படுவது போல இயேசு சர்வவல்லமையுள்ள கடவுள் இல்லை, அவர் கடவுளுடைய குமாரனே என்பதை எடுத்துக் காண்பித்தார். கடவுளுடைய பெயர் யெகோவா என்பதையும் இந்தப் பூமியை ஒரு அழகான பரதீஸாக மாற்றுவதுதான் யெகோவாவின் நோக்கம் என்பதையும் சாட்சி அவர்களுக்கு எடுத்துச் சொன்னார்.—சங்கீதம் 83:17; லூக்கா 23:43; யோவான் 3:16.

கடவுளுடைய வார்த்தையின்மீது மதிப்பு வைத்திருந்ததாலும், அவர்கள் கேட்டது அவர்களுக்குப் பிரியமாயிருந்ததாலும் இந்தக் குடும்பத்தினர் யெகோவாவின் சாட்சிகளோடு தவறாமல் பைபிளைப் படிக்க ஒப்புக்கொண்டனர். சர்ச்சில் இவர்களுக்கு அறிமுகமானவர்கள் இவர்களைப் பரிகாசம் செய்ய ஆரம்பித்தனர். ஆனாலும் பைபிள் படிப்பைத் தொடருவதில் இந்தக் குடும்பத்தினர் உறுதியாக இருந்தனர். அவர்கள் அதிகமான விஷயங்களைக் கற்றுக்கொண்டார்கள்; அதில் அவர்களுக்கு உறுதியான விசுவாசம் வந்தபோது பொய் மத பழக்கங்களை விட்டுவிட்டார்கள். இன்று இந்தக் குடும்பத்தில் மூன்றுபேர் ஆர்வமுள்ள, முழுக்காட்டப்பட்ட சாட்சிகளாக இருக்கின்றனர். அவர்களில், தாய் முடிந்தபோதெல்லாம் துணைப் பயனியராக சேவித்து வருகிறார்கள்.

உடல் ஊனம் பாரா விசுவாசம்

பஞ்சாபில் ஒரு கிராமத்தில் வாழ்ந்துவருகிறார் சுந்தர் லால் என்ற இளம் மனிதர். கடவுளுடைய ராஜ்யத்தின் நற்செய்தியை மற்றவர்களுக்குச் சொல்வதற்கு இவருக்கு அதிகமாக விசுவாசமும் தைரியமும் தேவைப்பட்டது. (மத்தேயு 24:14) ஏனென்றால் அவருடைய குடும்பமும் கிராம மக்களும் செய்துவந்த பலதெய்வ வழிபாட்டை விட்டுவிட்டு அவர் உண்மையான கடவுளாகிய யெகோவாவை வணங்கினார். வருத்தத்திற்குரிய விஷயமென்னவென்றால் இவருக்கு இரண்டு கால்களும் இல்லை.

1992 வரையாக சுந்தர் லால் சகஜமான வாழ்க்கைதான் வாழ்ந்துவந்தார். ஒரு மருத்துவரிடம் உதவியாளராக இவர் வேலை பார்த்துவந்தார். குடும்பத்தோடு சேர்ந்து தங்கள் குரு சொன்னபடி பல்வேறு தெய்வங்களை வழிபட்டுவந்தார். பின்பு ஒரு நாள் இரவு இரயில் பாதையைக் கடக்கும்போது கீழே விழுந்துவிட்டார். இரயில் இவர் மீது ஏறினது. இரண்டு கால்களும் துண்டாயின. உயிர் பிழைத்துக்கொண்டாலும் அவருடைய உலகம் சுக்குநூறாக உடைந்து நொறுங்கிவிட்டது. சுந்தர் லால் மிகவும் விரக்தியடைந்தார். தற்கொலை செய்துகொள்ளலாமா என்று நினைத்தார். அவருடைய குடும்பத்தார் அவருக்கு ஆதரவாகத்தான் இருந்தார்கள். ஆனால் இவர் எதிர்காலம் இருண்டுபோனது.

அதன்பின்பு ஒரு நாள் யெகோவாவின் சாட்சிகளில் ஒருவர் சுந்தர் லாலைச் சந்தித்தார்; கடவுள் இந்தப் பூமியை மகிழ்ச்சி நிரம்பிய ஒரு பரதீஸாக மாற்றப்போவதாகவும் தம்மை நேசித்து தமக்குப் பயப்படுகிறவர்களுக்கு பரிபூரண ஆரோக்கியத்தைத் தரப்போவதாகவும் அவர் வாக்கு கொடுத்திருப்பதாக பைபிளிலிருந்து காட்டினார். சுந்தர் லால் பைபிளைப் படிப்பதற்கு ஒப்புக்கொண்டார். ஒரு வருட காலமாக ஊக்கத்துடன் படித்தார். கிறிஸ்தவ கூட்டங்களுக்கு வரும்படி அவரை அழைத்தார்கள். ஒரு நண்பரோடு சைக்கிளில் பின்பக்கத்தில் இவர் அமர்ந்து சென்றார். அந்தப் பயணம் அவருக்கு கஷ்டமாக இருந்தபோதிலும் நல்ல பலன் கிடைத்தது. பைபிளில் உள்ள கடவுளின் வாக்கை நம்பி அதன் போதனைக்கு இசைய வாழ்ந்து வந்தவர்களின் கூட்டத்தில் அநேகரைப் பார்த்தபோது, தனிப்பட்ட விதத்தில் அவர் பைபிளில் படித்த விஷயங்கள் இன்னும் நன்றாக மனதில் பதிந்துவிட்டன.

சுந்தர் லால் அக்கம்பக்கத்தில் இருந்தவர்களுக்கு நற்செய்தியைச் சொல்ல ஆரம்பித்தார். 1995-ல் அவர் முழுக்காட்டப்பட்டார். எங்காவது போகவேண்டுமென்றால் ஊர்ந்து ஊர்ந்துதான் போக வேண்டும். அவருடைய கிராமத்தில் முதன்முதலாக வீட்டுக்கு வீடு ஊழியத்தையும் ஊர்ந்துதான் செய்தார். ஆனால் இப்பொழுது அவருடைய ஆவிக்குரிய சகோதரர்கள் மூன்று சக்கர வண்டியை அவருக்கு பரிசளித்திருக்கின்றனர். இந்த வண்டியைக் கையினால் பெடல் செய்து ஓட்ட முடியும். இந்த மூன்று சக்கர சைக்கிள் இருப்பதால் அவர் யாருடைய உதவியுமில்லாமல் சபை கூட்டங்களுக்கு 12 கிலோமீட்டர் தூரம் இதில் போய்வருகிறார். கொட்டும் மழையானாலும் சரி, 43 டிகிரி செல்சியஸுக்கும் அதிகமான சுட்டுப் பொசுக்கும் வெயிலானாலும்சரி, அவர் தானாகவே சைக்கிளை ஓட்டிச்செல்கிறார்.

கூட்டங்களுக்குச் செல்வதோடுகூட, உண்மையான கடவுளாகிய யெகோவாவை விசுவாசிப்பதில் உதவியை நாடும் மக்களுடன் அநேக பைபிள் படிப்புகளை நடத்துகிறார். இவரோடு பைபிளைப் படித்த ஏழு பேர் இப்போது முழுக்காட்டப்பட்டிருக்கின்றனர், இவர் சந்தித்த இன்னும் மூன்று பேர் மற்ற சாட்சிகளோடு பைபிளைப் படித்து இப்போது முழுக்காட்டப்பட்டிருக்கிறார்கள்.

பைபிளின் பிரகாரம் “விசுவாசம் எல்லாரிடத்திலுமில்லை.” (2 தெசலோனிக்கேயர் 3:2) ஆனால் ‘நித்தியஜீவனைப் பெறுவதற்கு சரியான மனச்சாய்வுடையோர்’ தவறாமல் கடவுளுடைய வார்த்தையைப் படித்தால் உறுதியான விசுவாசத்தை வளர்த்துக்கொள்வர். (அப்போஸ்தலர் 13:48, NW) இப்படிப்பட்ட படிப்பினால் அதிசயமான எதிர்கால நம்பிக்கையில் கண்கள் பிரகாசிக்கும். இந்தியாவில் அதிகமதிகமான ஆட்கள் இந்த அதிசயமான எதிர்காலத்தில் தங்கள் விசுவாசத்தை வளர்த்துவருகிறார்கள்.

[பக்கம் 30-ன் தேசப்படம்]

(முழு வடிவத்திலுள்ள படத்திற்கு புத்தகத்தைப் பார்க்கவும்)

ஆப்கானிஸ்தான்

பாகிஸ்தான்

நேப்பாளம்

பூட்டான்

சீனா

வங்காள தேசம்

மியன்மார்

லாவோஸ்

தாய்லாந்து

வியட்நாம்

கம்போடியா

இலங்கை

இந்தியா

[படத்திற்கான நன்றி]

Mountain High Maps® Copyright © 1997 Digital Wisdom, Inc.