¿Tachiri ʼnáta mué ikimea pe aʹkinana?

NAPU ANÍ ALUÉ BIBLIA

“Onorúgame ʼsímala alué ralámuli sewélila bujea, ʼlige ʼma tabilé suwimeli ju, ʼlige ʼma tabilé ʼwesi nalámala resí níliga, napugiti ʼma tabilé nerúlimempá seweli, ʼma ʼwe seʼwináriga nímala” (Apocalipsis 21:4, El Nuevo Testamento en el idioma ralámuli de la Tarahumara Baja del municipio de Guazapares).

CHURIGÁ GUʼÍRIMALA RAMUÉ MACHIBOA

Ramué nerúlimala ʼwe aʼlá nóchali ʼlige ʼwe ganíliga mochisi (Isaías 65:21-23).

Ramué tabilé ʼwe sewékame mochisi ʼlige tabilé nayúmala (Isaías 25:8; 33:24).

Ramué bejtélachi nabí rawé ʼwe ganíliga napuíka abiena suwábaga ralámuli ʼwe galé ʼyuga (Salmo 37:11, 29).

¿RAMUÉ IKIRU BIJCHIGA NAPU ANÍ ALUÉ BIBLIA?

Abe, jena ruwimela ye oká tábiri:

• Onorúgame walú aʼwalí nígame ju aní newámala suwábaga. Alué Biblia aní napu Onorúgame biʼlepi “Walubéala aʼwalí nígame ju”, boʼné aʼwalí tabilé suwí (Revelación 15:3, Traducción del Nuevo Mundo). Napuʼlige Onorúgame anile newámala ʼwe aʼlá jena gawichí ramué ikiru bijchigi alekeri Onorúgame ikiru newá. Alué Biblia aní: “Onorúgame níriká suwábaga tabilé nóchali kame ju” (Mateo 19:26).

• Onorúgame aní ʼwe najkí newá suwábaga. Alué Biblia aní Onorúgame ʼwe najkí alué ralámuli ʼma mukule ku ajáname ʼko (Job 14:14, 15).

  Abéchigó aní napu Esusi ka, alué Onorúgame Ranala, saʼwale alué ralámuli nayume. ¿Chonigá newale? Alué boʼné najkile (Marcos 1:40, 41). Suwábaga tábiri Esusi newale ju api boʼné onola najkí apirigá guʼíro suwábaga ralómeli api seweka mochí (Juan 5:19).

  Alekeri ramué bijchigi Jeobá ʼlige Esusi alué najkí ramué ʼwe ganíliga ejperémala (Salmo 72:12-14; 145:16; 2 Pedro 3:9).