¿Chieri nulá jena wijchimoba?

NAPU ANÍ ALUÉ BIBLIA

“Remónisika chaʼpigá ajtigó suwábaga ralámuli jena wijchimoba” (1 Juan 5:19, El Nuevo Testamento en el idioma ralámuli de la Tarahumara Baja del municipio de Guazapares).

“Alekeri Onorúgame júlale boʼné Inolá jeka wijchimoba napurigá mabuwa alué Remónisi” (1 Juan 3:8).

CHURIGÁ GUʼÍRIMALA RAMUÉ MACHIBOA

Machiboa chonigá ʼwe nerú cha nokame jena wijchimoba (Apocalipsis 12:12).

Machiboa chonigá ʼwe aʼlá nímala alué wijchimoba (1 Juan 2:17).

¿RAMUÉ IKIRU BIJCHIGA NAPU ANÍ ALUÉ BIBLIA?

Abe, jena ruwimela ye baikiá tábiri:

• Satanás nulá jípeko. Jeobá ʼma suwibámala alué nuleme Satanás. Alué ka rigá aní “ʼma uméri[mala] Remónisi” ʼlige bujema suwábaga alué tábiri chati napu newale (Hebreos 2:14).

• Onorúgame chapile alué Esusi napurigá waʼlula nuleme. Alué napu nulá jena wijchimoba ʼwe chátiri ju ʼlige ʼwe gunurume ju, Esusika ʼwe seʼwináriga ju. Onorúgameka aní ye ikimea napuʼlige Esusi nulámala: “Alué ka ʼwe naʼtemá napu ikí resí nili abéchigó alué napu tabilé tábiri nígame [...]. ʼLige suwibámala napu najkome ju ʼlige resí olá ujché jaré ralámuli” (Salmo 72:13, 14, Traducción del Nuevo Mundo).

• Onorúgame tabilé ʼyégame ju. Alué Biblia aní: “Onorúgameka tabilé siné ʼyégame ju” (Hebreos 6:18, TNM). Ramué ka ʼma machí napu Jeobá alarigá olama napu anile (Isaías 55:10, 11). Alué ka rigá aní napu olámala “alué waʼlula Remónisi rekábamia, alué napu nulá ajtí jena wijchimoba” (Juan 12:31).