Walubéala anepo Jeobá

1. ¿Piri we natéami niraa iné echi pagótami jipi rawé?

JIPI rawé ata iné japi wikabé pagótami we natéami niraa iné aboi jitra. Japi riká, nee echi internet jiti jarecho riwimea japi echi noká alí japi we natéami ju. Nalí pe kuabi pagótami ju japi walubéala ané Jeobá. Jenaʼí binelíwami inepo piri aniwáami ju walubéala anea Jeobá alí chúsiá echi riká ti nokisáré. Ayénachó binepo chúriká ti omeri walubéala anea Jeobá alí chúriká echi binoy ma mulipi walubéala anema binoy riwalá.

¿PIRI ANIWÁAMI JU WALUBÉALA ANEA JEOBÁ?

2. ¿Chúriká Jeobá néwariwélitili japi walubéala ju? (Ayénachó iné echi dibujo).

² Echoná Biblia, echi raʼíchali walubéala aniwáami ju japi isimí japi bilé ne walubéala nima. Japalí echi israelitas niyúbitami nili echoná Egipto jonsa, Jeobá ko néwariwélitili japi echi ko ne walubéala ju. Natabo jepuná: millones echi israelitas napawika jawi japoná wilí echi kawí Sinaí riwéami, kipumia japi Jeobá anema. Bilé waʼlú nolí noleri echi kawí, we noké echi weʼé alí echoná kawí jonsa waʼlú molí machina, ayénachó we niʼwía wilí, we riʼoa alí we jiwérami ané japi riká ko bilé awá (Éx. 19:16-18; 24:17; Sal. 68:8). Echi jitra, a keʼré japi echi israelitas wabé majali inea japi chúriká Jeobá néwariwélitili japi walubéala ju.

3. ¿Piri aniwáami ju walubéala anea Jeobá?

³ ¿Alí tamujé ru? ¿Ati omero nokayá japi Jeobá walubéala nima? Ayena. ¿Chúriká? Bilé namuti japi ta omeri nokayá ko ju, ruyea jarecho pagótami japi Jeobá we jiwérami ju alí olá we semati cualidades. Bilecho namuti ko ju aniyá japi suwaba echi namuti aʼláala japi ta omeri nokayá ko ju echi Jeobá jiwérala jitra (Is. 26:12). Bilé japi echi riká isili ko nili echi silíami David. Japalí echi ko raʼíchili Jeobá yúa japoná napawili suwaba echi israelitas, jéanili: “Mujé, oh Jeobá, ne walubéala ju, we jiwérami, we baʼóami alí we natéami, jiti suwaba japi ikí nirú ripá rewegachi alí jenaʼí wichimóbachi mujé níwala ju”. Japalí ma sunili raʼichia Jeobá yúa, “sinéami echoná congregación walubéala aneli Jeobá” (1 Crón. 29:11, 20).

4. ¿Chúriká Jesús walubéala aneli Jeobá?

⁴ Japalí Jesús iyénili jenaʼí Wichimóbachi, echi ko walubéala aneli echi Onolá suwinárika niraa. Japi riká, echi ko sinibí aniyé japi echi isié echi milagros echi Jeobá jiwérala jitra (Mar. 5:18-20). Ayénachó walubéala aneli Jeobá japi riká echi raʼíchili alí japi riká isíami nili jarecho yúa. Siné kaachi, Jesús ko bineria asali echoná sinagoga alí ayénachó echoná asali bilé mukí japi ma 18 bamíali jonsa risoa olárami nili bilé demonio jitra. Echi mukí we rimúrami iyenie echi demonio jitra alí ke omerie wachía iyenia. ¡Echi ko we risoa nilie! Japalí Jesús ineli echi namuti, we natimali alí simárika jéaneli: “¡Mukí, mami galá ku saʼwárami ju! Mami ketasi waminabi echirigá nayúami níima”. Miná ko, sikata chapili echi matochi alí echi mukí “ku wachili. Aʼlí binói chótali waminabi wabé walubéraga aneya Riosi” (Luc. 13:10-13). Jiti echi mukí ku saʼwili alí ma ke risoa nili echi namuti jitra, walubéala aneli Jeobá; alí tamujé ayénachó, ati olá wiká namuti japi jitra walubéala anepo Jeobá.

¿CHÚSIÁ TI WALUBÉALA ANÉ JEOBÁ?

5. ¿Chúsiá ta riwiwi Jeobá?

⁵ Ati walubéala ané Jeobá jiti ta we riwiwi echi. A nirú wiká namuti japi ta jitra riwiwi Jeobá. Japi riká, echi ko suwaba omériami ju (Sal. 96:4-7). Echi namuti japi echi niwali néwariwéliti japi we machíami ju. Echi ko isili japi ta pirélipo alí tamó iyali suwaba japi ta newalé (Apoc. 4:11). Echi ko ke siné tamó riwé (Apoc. 15:4). Suwaba japi echi isimí sinibí we aʼlá ju alí sinibí isimí japi riká ma anili (Jos. 23:14). Jiti la echi profeta Jeremías anili japi ke wesi nirú japi riká Jeobá (Jer. 10:6, 7). A bichíwali ju japi nirú wiká namuti japi ta jitra riwiwi tamujé Onolá Jeobá. Nalí tamujé ko ke bi riwíwisaré, ayénachó ti we galésaré.

6. ¿Chúsiá ti we galé Jeobá?

⁶ Ati walubéala ané Jeobá jiti ta we galé ne sulachí jonsa. Jeobá ko olá wiká semati cualidades japi isimí japi ta we galepo echi. Japi riká, echi ko we natimáami ju alí we galéami (Sal. 103:13; Is. 49:15). Japalí ti risoa nili, echi ko ayénachó we risoa nili (Zac. 2:8). Ayénachó tamó iʼwiri jiti ta echi mulíwipo alí echi amígowala nipo (Sal. 25:14; Hech. 17:27). Echi ko ke niráami ju alí iʼwiri echi japi we risóati ju (Sal. 113:6, 7). Suwaba echi namuti jitra ati walubéala anénali Jeobá, bilé Onorúami japi we simá isíami ju (Sal. 86:12).

7. ¿Piri ti omeri nokayá walubéala anemia Jeobá?

⁷ Ati walubéala ané Jeobá jiti ta nakí japi echi pagótami machimea echi jitra. Wiká pagótami ke aʼlá nata Onorúami jitra. ¿Chúsiá? Jiti Satanás ikaleka raʼicha echi jitra alí echi pagótami bichiwi japi echi aní (2 Cor. 4:4). Echi ko isili japi bichíwima japi Jeobá we chati ju, japi ke natéami niraa iné echi pagótami alí japi echi iyiri ju jiti nirúlima wiká chati namuti jenaʼí Wichimóbachi. Nalí tamujé a machí chu iyiri ju echi bichíwali alí ti omeri iʼwiria echi pagótami jiti machimea chúriká ju Onorúami, alí echi riká walubéala anepo echi (Is. 43:10). Ma binepo jaré versículos japi uchuwi echoná Salmo 96, japi raʼicha japi ta walubéala anésaré Jeobá. Binea jepuná namuti tamó iʼwírima jiti machiboa chúriká walubéala anepo Jeobá.

¿CHÚRIKÁ TI OMERI WALUBÉALA ANEA JEOBÁ?

8. ¿Chúriká ti omeri walubéala anea Jeobá? (Salmo 96:1-3).

⁸ (Leeri Salmo 96:1-3). Ati omeri walubéala anea Jeobá echi namuti jitra japi ta aní echi jitra. Jepuná versículos ané echi Onorúami siérvowala japi wikaránima Jeobá, simárika raʼichama echi riwalá jitra, nawésima echi raʼíchali aʼláala omáana Wichimóbachi alí japi Jeobá walubéala ju. Suwaba jepuná namuti ju japi riká ti walubéala anepo tamujé Onolá Jeobá. Echi judíos nijéwami alí echi cristianos bachá siglo piréami, iʼwérili nokali nimía echi Onorúami riwalá japalí aʼlá raʼíchili Onorúami jitra alí echi aʼláala namuti japi isili Jeobá echi jitra (Dan. 3:16-18; Hech. 4:29). ¿Chúriká ti omeri nokayá japi riká echi?

9, 10. ¿Piri mi biné japi isili Angelina? (Ayénachó iné echi foto).

⁹ Ma inepo chúriká isili bilé hermana Estados Unidos bitéami, Angelina riwéami.a Echi ko ke majaka raʼíchili Jeobá jitra japoná echi nocha. Jiti kulí nawali nochamia echoná, echi ko bayérami nili jarecho compañeros yúa japi ayénachó kulí sili, jiti ruyema jaré namuti echi jitra jiti jarecho echi machimea. Jiti la Angelina ko nátili riwírimia jaré fotos japoná echi machina we kanilia japi riká testigo Jeobá. Nalí be, bilecho compañero japi bachá raʼíchili, anili japi ochérili japi riká testigo Jeobá alí chotásili kawélika raʼichia echi jitra japi bichiwi echi Testigos. Angelina ko jéaní: “We ni majaki japalí ni kipuki echi. Nalí ni nátiki: ‘¿Achi ni riwema japi bilé ikaleka raʼichama Jeobá jitra, o achi ni nimima Jeobá?ʼ”.

¹⁰ Japalí echi compañero sunili raʼichia, Angelina ko sapú raʼíchili Jeobá yúa ke weli raʼíchika. Miná ko simárika niraa jéaneli echi compañero: “Japi riká mujé, nijé ayénachó ochériki japi riká testigo Jeobá, alí ani bijí testigo Jeobá ju”. Tákoré we jilí nili, Angelina ko kilí nili. Bachá, echi ko riwírili jaré fotos we semati japoná echi machina we kanílika isiá jaré namuti japi noká echi testigo Jeobá alí miná ko we aʼlá nátika ruyeli japi echi bichiwi (1 Ped. 3:15). Japalí ma sunili raʼichia, echi compañero ma ku kilí nili alí ayénachó anili japi echi ko newalá jaré namuti we baʼóami japi ikili japalí testigo Jeobá nili. Angelina ko aní: “Ata we simárika raʼichásaré Jeobá jitra. ¡Echi ko we natéami ju!”. Alí tamujé ayénachó we natéami niraa iné walubéala anea Jeobá, ayénachó japalí jarecho cha riká raʼicha echi jitra.

11. ¿Chúriká noká chabé jonsa echi japi Onorúami nijéwami ju japi aní Salmo 96:8?

¹¹ (Leeri Salmo 96:8). Ati omeri walubéala anea Jeobá echi namuti jitra japi ta olá. Echi japi Onorúami nijéwami ju, chabé jonsa echi riká noká (Prov. 3:9). Japi riká, echi israelitas nijili winomí alí namuti we natéami jiti echi templo niwárami nima alí sinibí aʼlárika wilimea (2 Rey. 12:4, 5; 1 Crón. 29:3-9). Ayénachó jaré Jesús najátowala néeli echi namuti japi olali iʼwírimia Jesús alí echi apóstoles (Luc. 8:1-3). Alí echi cristianos bachá siglo piréami ayénachó iʼwírili echi hermanos japi newaleli (Hech. 11:27-29). Jipi rawé tamujé ayénachó omeri walubéala anea Jeobá echi winomí jitra japi ta nijí.

12. ¿Chúriká ti walubéala ané Jeobá echi winomí jitra japi ta nijí? (Ayénachó iné echi foto).

¹² Ma inepo bilé namuti japi ikili japi néwariwéliti chúriká ti walubéala ané Jeobá echi winomí jitra japi ta nijí. Bamíali 2020, wiká millones pagótami we lochea pireili jiti wilí nili japi ke ukuli echoná Zimbabue. Echi riká cho ikili bilé hermana Prisca riwéami. Nalí tákoré ke ukuyé, echi ko ke riweli simiyá nawisasia sinibí miércoles alí viernes, ayénachó japalí echi pagótami wasará echi níwala wasá. Echi pagótami echoná mulipi piréami kawélika raʼichie echi jitra jiti echi ko nawesia iyenie alí ke ko nochia, alí jériká anéi: “¡Mujé ko locheka mukumea!”. Nalí echi ko je ku anéi: “Jeobá ke siné riwé echi japi nijéwami ju”. Miná ko, echi donaciones jitra japi ta nijí, echi organización júali koʼwáami. Jaré echoná mulipi piréami ke mayeli japi echi hermana iʼwíritami nili alí aneli: “Onorúami ke siné mi riweli. Ati che machinali echi jitra”. Alí kichao pagótami chotásili simíaya echoná napawíliwachi.

13. Japi riká aní Salmo 96:9, ¿piri ta nokisáré jiti walubéala anepo Jeobá?

¹³ (Leeri Salmo 96:9). Ati omeri walubéala anea Jeobá echi namuti jitra japi ta noká. Chabé, echi sacerdotes we aʼlá úbika moʼisá riweili japalí nochie echoná tabernáculo alí echoná templo (Éx. 40:30-32). Tamujé ayénachó ata iʼwérili noká jiti we biʼwíami nipo, nalí wabé natéami ko ju japi ke nokiboa echi namuti chati japi Onorúami kichí (Sal. 24:3, 4; 1 Ped. 1:15, 16). Ata iʼwérili nokisáré jiti ke nokiboa echi chati namuti, alí jiti natabo alí nokiboa japi riká Jeobá, japi we simá isíami ju (Col. 3:9, 10). Echi Onorúami iʼwírila jitra, echi pagótami japi wabé cha nokáami ju, ayénachó omeri riwea echi riká nokayá alí aʼlá nokáami niya.

14. ¿Piri mi biné Jack jitra? (Ayénachó iné echi foto).

¹⁴ Binepo japi ikili bilé rijoi Jack riwéami, japi anérami nili echi Demonio jiti we aparúami nili alí nikóami. Jiti isili namuti we chati, miʼlirúami nima riweili. Nalí kecho bijí séachi echalí rawé japalí miʼlirúami nima, echi ko chotásili binea echi Biblia bilé hermano yúa japi nawayé echoná cárcel. Tákoré wiká chati namuti isíami nili, echi ko riweli echi riká isiá alí miná ko pakoli japi riká testigo Jeobá. Jiti echi ko ma we aʼláala nili, jaré echoná cárcel tibúami nalali japalí Jack miʼlirúami nima. Bilé echoná cárcel nuláami jéanili: “Chabé, Jack ko wabé chati nili sinéami yúa japi jenaʼí cárcel muchuwi, nalí jipi ko we aʼláala ju”. Ma simírisa bilé tarali japalí Jack miʼlirúami nili, echi hermanos japi sinibí tarali simíaye echoná cárcel niwamia echi napawíliwami, ineli bilé rijoi japi ke siné simiyé echoná. ¿Chúsiá simili echalí rawé? Jiti echi ko ineli japi Jack we aʼláala nílili alí che machinalie piri isísaré jiti nijéwima Jeobá. Jepuná néwariwéliti japi echi namuti jitra japi ta noká, ati omeri walubéala anea Jeobá (1 Ped. 2:12).

¿CHÚRIKÁ JEOBÁ MA MULIPI WALUBÉALA ANEMA BINOY RIWALÁ?

15. ¿Chúriká Jeobá ma mulipi walubéala anema binoy riwalá? (Salmo 96:10-13).

¹⁵ (Leeri Salmo 96:10-13). Echi Salmo 96 suní ruyea japi Jeobá ju bilé Silíami japi wachíniga niraa oyeri. Alí, ¿chúriká Jeobá ma mulipi walubéala anema binoy riwalá? Japalí ma oyérisa jenaʼí Wichimóbachi. Ma mulipi echi ko suwábima echi Walúala Babilonia jiti isili japi cha riká raʼichárami nima echi riwalá jitra (Apoc. 17:5, 16; 19:1, 2). Jaré pagótami japi inema japi echi religiones ke bichíwali suwábitami ju, a keʼré japi nijéwinalima Jeobá tamujé yúa. Miná ko, echoná Armagedón, Jeobá ko suwábima suwaba japi Satanás níwala ju. Echi ko suwábima sinéami japi we kichí echi alí japi cha riká raʼicha echi jitra, nalí niyúbima echi japi nijéwami ju, japi we galé echi alí japi we kanila walubéala ané binoy riwalá (Mar. 8:38; 2 Tes. 1:6-10). Ma simírisa echi mili bamíali japalí nulasa Cristo alí japalí ma suwábitami nisa echi Satanás, echalí nima japalí Jeobá isima japi ma ke siné cha riká raʼichárami nima echi binoy riwalá jitra (Apoc. 20:7-10). Echalí ne sinéami pagótami jenaʼí Wichimóbachi piréami, aʼlá machimea japi Jeobá ne walubéala ju (Hab. 2:14).

16. ¿Piri mi isínali? (Ayénachó iné echi dibujo).

¹⁶ ¡We simá riwélima japalí sinéami pagótami walubéala anema echi Jeobá riwalá! Japalí ti chéami buwé japi echi riká ikimea, ati iʼwérili nokisáré sinibí walubéala anea Jeobá. Jiti sinibí newalabo japi we natéami ju nokayá jepuná, echi Japi Aʼlá Niseri nátili japi Salmo 96:8 nima echi texto japi ta néepo echi bamíali 2025: “Walubéala anesi Jeobá echi riwalá jitra japi we natéami ju”.