Gajmañaaʼ marataráʼa májánʼ: Atasngájma xú káʼnii miʼnigajmaa Biblia índo̱ najmaa libro Enseña

Ndíjkha rí gíʼdoo wéñuʼ numuu. Mbaʼin xa̱bu̱ tséyáá ndiéjunʼ ñajunʼ índo̱ nuʼthúún rí xáxtumiin rí miʼsngúún ga̱jma̱a̱ numuu Biblia. Mbáa nundxa̱ʼwa̱míjna̱ rí munigajmaa mba̱yu̱ʼ wéñuʼ o mani̱ndxu̱ún bi̱ nutaraʼa numuu Jeobá. Ikha jngó, raʼkháa i̱ndó muʼthúún rí muʼsngúún, gíʼmaa musngajmúún xú káʼnii eʼnilú. Gusngajmúún dí ra̱mingíjyúuʼ miʼnigajmaa Biblia, numuu rí ikhaa nañambá wéñuʼ. Xájyulú má mba̱yu̱ʼ ga̱jma̱a̱ ma̱ndoo muʼni náa má riejuun xa̱bu̱.

Xú káʼnii gúʼni:

Índo̱ gámbáʼ raratháán tsáa ni̱ndxa̱ʼ, atraxi̱i̱ xa̱bu̱ á mu naxmiéjunʼ xú gáxtáa nda̱wa̱á.
Aratháán dí rígi̱ nindxu̱u̱ mbáa rí naʼni maxmiéjúnʼ mbaʼin xa̱bu̱. Ikhú, atasngájmáá índice rí na̱ʼkha̱ náa libro Enseña. Aratháán dí i̱yi̱i̱ʼ rígi̱ ra̱mingíjyúuʼ e̱ʼkha̱ raʼthí rí nambáyulúʼ makru̱ʼu̱lú dí eʼsngáa náa Biblia rí xú makuwá nda̱wa̱á ga̱jma̱a̱ i̱ʼwáʼ rí e̱ʼkha̱ raʼthí ikhí. Nda̱wa̱á, atraxi̱i̱ náa capítulo phú enigu̱ʼ mbaʼyoo itháan.
Araxná mbóo libro ga̱jma̱a̱ atasngájmáá capítulo rí ikhaa niraʼwíí. Aratháán rí náa capítulo rúʼko̱ gáxti̱ʼña̱a̱ graxe̱ rí tima náa tsu̱du̱u̱ timbá kutriga̱.
Atraxi̱i̱ xa̱bu̱ á mu nanigu̱ʼ maguxnuu timbá kutriga̱. Ikhú atani̱i̱ graxe̱ rí kaʼyoo kutriga̱ ga̱jma̱a̱ gu̱ya̱a̱ nájmáanʼ xú káʼnii extiʼña̱a̱. Atraxnuu texto ma̱ngaa arathá xú kaʼnii embánii ga̱jma̱a̱ rí e̱ʼkha̱ raʼthí ikhí. Atasngájmáá xú kaʼnii nitaníʼ rí nariʼña̱a̱ graxe̱ náa libro rí jchá ikháánʼ.
Anújngaʼ náa imbo̱o̱ kutriga̱. Mú rí xúgi̱ atanda̱ʼa̱a̱ xa̱bu̱ rí magíʼ mariʼña̱a̱ graxe̱ xó má ekro̱ʼo̱o̱ ikhaa.
Aratháán rí májánʼ niʼni xa̱bu̱ ga̱jma̱a̱ atríyaʼ awan mu mambáʼ ratayáá ga̱jma̱ʼ capítulo rúʼko̱ imbo̱o̱ mbiʼi.
Á mu rí nandoo matani, atani rí xa̱bu̱ mbaʼyoo video Xú káʼnii nindxu̱u̱ rí miʼsngáa ga̱jma̱a̱ numuu Biblia rá. Dí rígá náa ináa jw.org/jw-tln.

Atagíʼ matani rígi̱ rí mbá gu̱nʼ:

Aratakháñii Jeobá rí maʼni tsajkurámuʼ tsiakii rí natani mu matagíʼdi̱i̱ marasngáa ga̱jma̱a̱ numuu Biblia (Filip. 2:13).
Índo̱ gárataráʼa, atagíʼ matani maski ajndu mbá miʼtsú mu matasnga̱jmá xú káʼnii eʼnigajmaa Biblia índo̱ najmaa libro Enseña o atasngájma video Xú káʼnii nindxu̱u̱ rí miʼsngáa ga̱jma̱a̱ numuu Biblia rá.