Lá maʼngulú mu̱ʼni̱ gámbáa guerra ga̱jma̱a̱ dí nuxmijná xa̱bu̱ ráʼ.

NDUYÁʼ XÓO MAJMÚÚN MÁJÁNʼ MBÚJKHA̱A̱

Rí nandún muni̱: Nandún dí xa̱bu̱ makuwá itháan májánʼ. Dí xúgíinʼ xa̱bu̱ maguáʼdáá mbújkha̱a̱ mu xúʼko̱ ní xárígá itháan xkujndu.

Ndíjkha tséʼngu̱u̱n gúni̱ xá.: Xa̱bu̱ ñajunʼ ndayóo dí muriʼkhu̱u̱ xóo majmúún mbújkha̱a̱. Nákha tsiguʼ 2022 náa xúgíʼ numbaaʼ nijmún mbá 34,100 millones de dólares mu muni̱ dí marigá tsímáá. Mú mbújkha̱a̱ rígi̱ na̱nguá mba̱a̱ numuu dí itháan mba̱a̱ mbújkha̱a̱ ejkha̱ náa soldados.

“Ra̱ʼkhá tháán mba̱a̱ mbújkha̱a̱ ejmuxu mu mumbáñún bi̱ numíniiʼ náa narígá xkujndu, raʼkháa mu marigá dí tsímáá” (António Guterres, secretario general de las Naciones Unidas).

Dí naʼthí náa Biblia: Xa̱bu̱ ñajunʼ bi̱ kúwá náa numbaaʼ ma̱ndoo mumbañún xa̱bu̱ ngíníi, mú xáʼngu̱u̱n gúni̱ gámbáa tsingíná (Deuteronomio 15:11; Mateo 26:11).

NANDÚN MAMBANÚN MU MARIGÁ DÍ TSÍMÁÁ

Rí nandún muni̱: Nandún dí mambanún mu ni xárígá xkujndu ga̱jma̱a̱ dí gúraʼwíí muni̱ mambáñún mbá najmiin.

Ndíjkha tséʼngu̱u̱n gúni̱ xá.: Mbáa ga̱jma̱a̱ numuu dí tikhuun tsíñún gunimbáníí ga̱jma̱a̱ tsénigu̱u̱nʼ dí nambánúún muni̱. Ma̱ngaa rí nambánúún muni̱ dí marigá tsímáá tségájnu májánʼ numuu dí tséʼngu̱u̱n gúni̱ mbáníí.

“Rí nambánúún muni̱ tségájnu májánʼ. Nguáná índo̱ a̱jma̱ xuajin nambánúún dí xúni̱ guerra rúʼko̱ naʼni dí marigá itháan xkujndu” (Raymond Smith, American Diplomacy).

Dí naʼthí náa Biblia: Xúgíinʼ gíʼmaa munimbáníí consejo rígi̱ “Atayáʼ dí tsímáá” (Salmo 34:14). Mú mbaʼin ‹nuniñu̱u̱nʼ eʼwíinʼ› ga̱jma̱a̱ ‹nuniu̱u̱n dí ra̱májánʼ bi̱ nambájxu̱u̱n gajmiún› ma̱ngaa ‹tsémbánún mu makuwá tsímáá› (2 Timoteo 3:​1-4). Ga̱jma̱a̱ numuu dí xígi̱ kaʼnii xtáa rarígá, xa̱bu̱ ñajunʼ tséʼngu̱u̱n gúni̱ gámbáa xkujndu maski ajndu ikhiin nandún muni̱.

NAMBÁNÚÚN MU MUNI̱ GÁMBÁA AJUA̱Nʼ O MU NI XÁRÍGÁ MBAʼA

Rí nandún muni̱: Xa̱bu̱ ñajunʼ kúwá ruyáʼ xóo muni̱ gámbáa ajua̱nʼ mú itháan má nandún muni̱ gámbáa ajua̱nʼ dí migamíi magudíin mbaʼin xa̱bu̱.

Ndíjkha tséʼngu̱u̱n gúni̱ xá.: Kúwá xa̱bu̱ ñajunʼ bi̱ tsíñún gúni̱ gámbáa ajua̱nʼ dí guáʼdáá numuu dí naku̱mu̱ún dí ni xáguáʼdáá numún ga̱jma̱a̱ dí ni xarigá dí mambáñún muni̱ kawumíjna̱. Maski ajndu muni̱ gámbáa ajua̱nʼ mú xa̱bu̱ xániñaaʼ ruxmijná.

“Mbaʼin xa̱bu̱ ñajunʼ na̱nguá ninimbaníí dí nixudami̱jná muni̱ gámbáa ajua̱nʼ nda̱wa̱á dí nijngoo tsiguʼ 1991. Índo̱ nimbánuu nitamíjná dí ni xúxmijná mu ni xárígá gamíi ga̱jma̱a̱ dí mambajxíín mu xúʼko̱ nda̱wa̱á náa xúgíʼ numbaaʼ marigá tsímáá ga̱jma̱a̱ makuwáanʼ májánʼ” (Securing Our Common Future: An Agenda for Disarmament [Asegurar nuestro futuro común: una agenda para el desarme]).

Dí naʼthí náa Biblia: Xa̱bu̱ gíʼmaa dí muniñaaʼ ajua̱nʼ xóo muʼthá “muni̱i̱ arado espada ndrígu̱ún” (Isaías 2:4). Mú rígi̱ xáyambáá numuu dí náa a̱jkiu̱ún xa̱bu̱ gíwánʼ muni̱ dí ra̱májánʼ (Mateo 15:19).

NURUWAMÍJNA̱ XA̱BU̱ ÑAJUNʼ MU MUNI̱ DÍ XÁRÍGÁ GUERRA

Rí nandún muni̱: Xa̱bu̱ ñajunʼ nambánúún dí mumbayumíjná índo̱ mbáa xa̱bu̱ sia̱nʼ nandoo maxmína̱ʼ gajmíi̱n. Ikhiin naku̱mu̱ún dí á mu nuruwamíjna̱ xa̱bu̱ sia̱nʼ mamiñún numuu dí á mu xúʼko̱ gáʼgá, mbaʼyóoʼ dí maxmína̱ʼ gajmíi̱n mbaʼin soldados.

Ndíjkha tséʼngu̱u̱n gúni̱ xá.: Xa̱bu̱ ñajunʼ nuruwamíjna̱ mu mumbayumíjná índo̱ mbáa xa̱bu̱ sia̱nʼ nandoo maxmína̱ʼ gajmíi̱n, mú rúʼko̱ tséʼni marigá tsímáá. Xa̱bu̱ ñajunʼ tsénimbáníí ajngún, ní má tsémbánúún xóo gúmbáyúmíjná náa xa̱bu̱ sia̱nʼ.

“Maski ajndu Sociedad de Naciones ga̱jma̱a̱ Naciones Unidas ninimíjna̱ dí mumbañún xa̱bu̱ mu mambájxu̱u̱n, mú rígi̱ tséyambáá numuu dí narígá má xúʼko̱ guerra” (Encyclopedia Britannica).

Dí naʼthí náa Biblia: Májánʼ má nindxu̱u̱ dí xa̱bu̱ nuruwamíjna̱ mu mumbayumíjná. Mú nimbáa xa̱bu̱ ñajunʼ ni má organización dí rígá náa numbaaʼ rígi̱ xáʼngo̱o̱ gáʼni dí marigá tsímáá ni má xáʼngo̱o̱ gáʼni dí xarigá gamíi (Eclesiastés 4:12). “Xáku̱ma̱a̱ʼ xtañún xa̱bu̱ bi̱ guáʼdáá numún, ikhiin mangiin nindxu̱ún xa̱bu̱ numbaaʼ, raguáʼdáá tsiaki̱i̱ mu muni̱ kríña̱a̱nʼ. Ikhiin mangiin makhañún, maʼni̱i̱ yujndaʼ ga̱jma̱a̱ mbiʼi má rúʼko̱ mambáa dí nandún muni̱” (Salmo 146:​3, 4, Traducción del Nuevo Mundo).