Halo tuir ezemplu neʼebé Jesus hatudu tiha ona
1. Ezemplu saida mak Jesus hatudu tiha ona mai ita?
1 Kuandu ita hola parte iha serbisu atu halo dixípulu, ita tenke hanoin-hetan katak ita-nia ezemplu no hahalok bele book ema neʼebé haree ita. Jesus hanorin ema ho liafuan no hahalok. Ema neʼebé haree Jesus bele hatene katak nia badinas, iha domin ba ema seluk, hakaʼas an atu halo santu ninia Aman nia naran, no laran-metin atu halo tuir ninia Aman nia hakarak.—1 Ped 2:21.
2. Iha dalan saida mak ita-nia ezemplu bele book ema neʼebé serbisu hamutuk ho ita iha serbisu haklaken?
2 Kuandu haklaken uma ba uma: Hanesan ho Jesus, ita-nia ezemplu mós bele book ita-nia maluk neʼebé haklaken hamutuk ho ita. Kuandu haklaken-naʼin sira neʼebé foun no ladún iha esperiénsia haree ita-nia badinas iha serbisu haklaken, ida-neʼe sei book sira atu hanoin kleʼan kona-ba sira-nia serbisu rasik. No mós kuandu sira haree katak ita haksolok no iha interese ba ema neʼebé ita hasoru iha serbisu haklaken, ida-neʼe halo sira hanoin katak importante atu sira mós hatudu hahalok sira-neʼe. No mós se sira haree oinsá ita uza Bíblia ho diʼak, halo vizita fali, no halaʼo estudu Bíblia, ida-neʼe sei book sira atu halo tuir ita-nia ezemplu.
3. Oinsá mak ita bele hanorin estudante ho ita-nia ezemplu? No sira sei aprende saida?
3 Kuandu halaʼo estudu Bíblia: Ita-nia estudante Bíblia nian sei haree liuliu ita-nia hahalok duké buat neʼebé ita koʼalia. Porezemplu, karik ita esplika ba nia katak importante atu prepara, lee eskritura sira neʼebé temi, no riska resposta, sira sei haree ita mós halo hanesan neʼe ka lae. (Rom 2:21) Se ita halaʼo estudu nafatin hodi tuir tempu neʼebé ita promete hamutuk ona, karik estudante mós sei la hanoin atu falta estudu hodi halo buat seluk fali. Sira mós sei haree katak ita tau serbisu haklaken uluk liu iha ita-nia moris no mós katak ita iha fiar neʼebé metin. Dala barak, mestre neʼebé halo tuir duni Kristu nia ezemplu hotu, ninia estudante mós bele sai nuʼudar haklaken-naʼin neʼebé badinas no diʼak.
4. Kuandu ita tuir reuniaun beibeik, ema seluk neʼebé haree ita sei aprende saida?
4 Kuandu tuir reuniaun: Ema hotu neʼebé tama ona iha kongregasaun kristaun hola parte atu hanorin ema seluk liuhusi sira-nia hahalok no ezemplu. Ema foun neʼebé komesa daudauk atu tuir reuniaun sei hetan benefísiu husi ezemplu diʼak neʼebé sira haree iha kongregasaun laran. Sira sei haree domin neʼebé ema hatudu ba malu, unidade, hatais no hahalok neʼebé diʼak. (Salmo 133:1) Sira mós sei haree ita-nia badinas hodi tuir reuniaun sira no rona komentáriu neʼebé hatudu sai ita-nia fiar. Porezemplu, mane ida neʼebé tuir ita-nia reuniaun haree oinsá mak labarik-feto kiʼikoan ida loke no lee eskritura hotu neʼebé temi iha diskursu. Tanba labarik neʼe nia hahalok diʼak, mane neʼe husu atu estuda Bíblia.
5. Tansá mak ita nunka atu hanoin katak hatudu ezemplu mak ladún importante?
5 Eskritura fó laran-manas mai ita atu halo tuir ita-nia maluk nia ezemplu neʼebé diʼak. (Flp 3:17; Ebr 13:7) Tan neʼe, se ita halo tuir didiʼak ezemplu neʼebé Kristu hatudu tiha ona, ema seluk sei haree no ida-neʼe sei book sira atu halo buat neʼebé diʼak. Hodi hanoin-hetan buat sira-neʼe, mai ita kontinua hakaʼas an atu halo tuir liafuan neʼebé hakerek iha 1 Timoteo 4:16, neʼebé dehan: “Tau matan didiʼak ba buat neʼebé ó halo no hanorin.”