Oinsá atu treinu haklaken-naʼin foun
1. Oinsá mak Ita sente kuandu dala primeiru Ita haklaken husi uma ba uma?
1 Ita hanoin-hetan ka lae, dala primeiru neʼebé Ita haklaken husi uma ba uma? Karik Ita sente taʼuk tebes. Se Ita laʼo ho irmaun ka irmán neʼebé hanorin Bíblia ba Ita ka haklaken-naʼin seluk, Ita sente kontente tebes hetan apoia husi sira. Agora Ita iha ona esperiénsia, tan neʼe Ita mak bele ajuda no treinu haklaken-naʼin foun sira.
2. Saida deʼit mak haklaken-naʼin foun sira presiza aprende?
2 Haklaken-naʼin foun sira presiza aprende oinsá mak atu komesa koʼalia ho ema neʼebé sira foin hasoru, uza Bíblia, halo vizita fali, komesa estudu Bíblia, no kontinua halaʼo estudu. Sira mós presiza aprende oinsá atu haklaken iha dalan oioin, hanesan iha estrada no iha loja. Ita bele ajuda sira atu hola parte iha haklaken hanesan neʼe liuhusi ita-nia liafuan no ezemplu.
3. Oinsá mak Ita bele ajuda haklaken-naʼin foun liuhusi Ita-nia ezemplu?
3 Hatudu ezemplu: Jesus hanorin ninia dixípulu sira oinsá atu haklaken liuhusi ninia ezemplu rasik. (Lc 8:1; 1 Ped 2:21) Kuandu Ita arranja atu haklaken hamutuk ho haklaken-naʼin foun, prepara atu haklaken iha dalan neʼebé simples atu nia bele halo tuir. Karik Ita bele halo tuir matadalan iha ita-nia livru sira. Hatete ba nia katak Ita mak halo uluk uma ida ka rua atu nuneʼe nia bele rona buat neʼebé ita hatete. Durante Ita laʼo iha dalan ba uma seluk, Ita bele husu ninia hanoin kona-ba dalan neʼebé Ita haklaken. Ida-neʼe sei ajuda haklaken-naʼin foun atu hafolin serbisu hamutuk ho maluk seluk, no nia mós bele sai prontu atu simu Ita-nia ideia.
4. Oinsá mak ita bele ajuda haklaken-naʼin foun depois nia koʼalia ho uma-naʼin?
4 Fó ideia: Jesus mós hanorin ninia dixípulu sira liuhusi ninia liafuan. (Mt 10:5-14) Ita mós bele ajuda haklaken-naʼin foun hodi halo nuneʼe. Kuandu nia mak koʼalia ho uma-naʼin, rona didiʼak. Depois, maski Ita haree pontu balu neʼebé ladún diʼak, Ita ho laran gaba nia hodi temi pontu balu neʼebé nia halo ho diʼak. Kuandu Ita hakarak fó ideia kona-ba oinsá atu hadiʼa dalan neʼebé nia haklaken, diʼak atu hein se nia repete fali ida-neʼe. Karik nia halo ida-neʼe tan deʼit nia sente taʼuk ka seidauk toman. Hanoin-hetan mós katak ita hotu nia matenek la hanesan, no mós la sala atu haklaken iha dalan neʼebé la hanesan.—1 Kor 12:4-7.
5. Ita bele hatete saida kuandu ita fó ideia ba haklaken-naʼin foun?
5 Dala ruma haklaken-naʼin foun husu Ita-nia hanoin. Maibé se nia la husu, Ita bele halo buat ruma atu ajuda nia. Oinsá? Haklaken-naʼin balu neʼebé iha esperiénsia ona husu: “Haʼu bele hatete buat ida ka lae?” ka “Ita sente oinsá?” Ita mós bele hatete: “Kuandu haʼu foin komesa haklaken, haʼu sente susar atu . . . , maibé haʼu aprende diʼak atu . . .” Dala ruma diʼak mós atu loke livru Bertukar Pikiran hamutuk. Atu la halo nia laran-kiʼik, diʼak liu ita koʼalia buat ida deʼit.
6. Oinsá mak ita bele aplika liafuan “besi halo kroʼat besi” iha serbisu haklaken?
6 Besi halo kroʼat besi: Maski Timóteo iha esperiénsia barak ona, apóstolu Paulo fó laran-manas ba nia atu kontinua hakaʼas an atu hanorin ema no laʼo ba oin. (1 Tim 4:13, 15) Ita mós hanesan, maski Ita kleur ona nuʼudar haklaken-naʼin, Ita kontinua nafatin atu haklaken iha dalan neʼebé diʼak liután. Aprende husi maluk neʼebé Ita haklaken hamutuk, inklui mós maluk neʼebé ladún iha esperiénsia barak hanesan Ita. No ajuda Ita-nia maluk ho laran-diʼak, liuliu sira neʼebé foun, atu aumenta sira-nia esperiénsia hodi haklaken lia-foun diʼak.—Prov 27:17.