Ita bele haklaken iha rai-nakaras ka lae?

1. Tuir livru ida, iha tempu saida mak apóstolu Paulo haklaken husi uma ba uma?

¹ Livru ida ho títulu Moris Loron-loron nian iha Tempu Bíblia (Daily Life in Bible Times) hatete katak apóstolu Paulo baibain halaʼo serbisu haklaken husi uma ba uma “husi tuku 4.00 lokraik toʼo kalan”. Ita ladún hatene se ida-neʼe mak Paulo nia programa, maibé ita hatene katak Paulo sempre prontu atu halo “buat hirak-neʼe hotu . . . tan evanjellu”. (1 Kor 9:19-23) Paulo presiza arranja didiʼak ninia tempu hodi nia bele haklaken husi uma ba uma iha tempu neʼebé ema barak iha sira-nia uma.

2. Tanbasá rai-nakaras mak tempu diʼak atu haklaken?

² Iha fatin barak, durante loron baileet, baibain haklaken-naʼin sira bá haklaken husi uma ba uma iha dadeer. Maibé iha Ita-nia área, dadeer mak tempu diʼak atu haklaken husi uma ba uma ka lae? Pioneiru ida fó-hatene kona-ba ninia haklaken-fatin hodi hatete: “Durante loron, susar tebes atu hetan ema iha sira-nia uma. Maibé iha lokraik toʼo nakukun ema barak iha uma.” Haklaken iha rai-nakaras fó oportunidade kapás atu bele haklaken liafuan diʼak ba ema. Iha tempu hanesan neʼe, baibain uma-naʼin sira kalma no kontente atu koʼalia ho ita. Se bele, katuas sira bele arranja grupu haklaken iha rai-nakaras.

3. Oinsá mak ita bele hatudu matenek kuandu ita haklaken iha rai-nakaras?

³ Uza Matenek: Ita presiza hatudu matenek kuandu ita haklaken iha rai-nakaras. Porezemplu, se ita haree katak uma-naʼin okupadu, karik tanba sira han hela, se nuneʼe diʼak atu ita vizita sira iha tempu seluk. Baibain, diʼak atu haklaken no vizita ema iha oras neʼebé seidauk nakukun, tanba se kalan liu, karik sira prepara ona atu toba. (2 Kor 6:3) Se iha área neʼebé perigu ba ita atu haklaken kuandu atu nakukun ona, diʼak atu haklaken iha loron deʼit.—Prov 22:3.

4. Ita hetan bensaun saida deʼit hodi haklaken iha rai-nakaras?

⁴ Bensaun sira: Se ita haklaken ba ema, ita kontente. No se ita haklaken ba ema barak, ita kontente liu tanba ita iha oportunidade barak liu atu ajuda ema “hetan maksoin no simu matenek kona-ba lia-loos”. (1 Tim 2:3, 4) Ita mós bele arranja ita-nia tempu hodi bele haklaken iha rai-nakaras ka lae?