Oinsá atu uza broxura Liafuan Diʼak Husi Maromak
Broxura foun neʼebé bele ajuda ita atu vizita fali ema no hahú estudu Bíblia
1. Saida mak ita simu iha reuniaun boot ba loron tolu ho títulu “Proteje bá ó-nia Laran” neʼebé bele ajuda ita atu vizita fali ema no hahú estudu Bíblia?
1 Iha reuniaun boot ba loron tolu ho títulu “Proteje bá ó-nia Laran”, ita hotu kontente hodi simu broxura foun neʼebé bele ajuda ita atu vizita fali ema no hahú estudu Bíblia. Broxura Liafuan Diʼak Husi Maromak sei troka ho broxura Saida maka Maromak Hakarak ita atu Halo? Tanba lisaun sira iha broxura foun neʼe badak deʼit hanesan ho broxura Maromak Hakarak, ida-neʼe sei ajuda ita atu bele hahú kedas estuda Bíblia ho ema. Buat neʼebé la hanesan entre broxura rua neʼe mak broxura Maromak Hakarak koʼalia kona-ba buat neʼebé ema kristaun tenke halo, no dala ruma susar ba estudante foun atu simu. Maibé, broxura foun neʼe koʼalia liuliu kona-ba liafuan diʼak husi Bíblia.—Apos 15:35, MF.
2. Tanbasá mak ita-nia organizasaun halo broxura Liafuan Diʼak?
2 Tanbasá mak ita-nia organizasaun halo broxura neʼe? Tanba irmaun-irmán barak iha mundu tomak husu livru neʼebé halo ho simples neʼebé bele dada ema ba lia-loos no loke dalan atu estuda livru Bíblia Hanorin, neʼebé baibain ita uza atu estuda Bíblia ho ema. Dala ruma, ema ladún hakarak atu estuda livru neʼebé mahar, maibé sira sei hakarak estuda Bíblia hodi uza broxura. Liután neʼe, fasil deʼit atu tradús broxura ba língua barak.
3. Oinsá mak broxura neʼe la hanesan ho livru seluk neʼebé ita uza atu estuda ho ema?
3 Halo oinsá: Ita-nia livru barak neʼebé ita uza atu estuda ho ema, halo hodi ema bele lee rasik no aprende lia-loos maski ema ida la ajuda. Maibé broxura foun neʼe la hanesan. Broxura neʼe halo hodi uza atu halaʼo estudu Bíblia maibé presiza ema atu esplika. Tan neʼe, kuandu ita fahe broxura neʼe ba ema, diʼak se ita lee no koʼalia hamutuk ho nia parágrafu ida ka rua. Tanba parágrafu sira badak deʼit, ita bele koʼalia hamutuk ho uma-naʼin iha fatin neʼebé deʼit, inklui mós iha serbisu-fatin. Maski diʼak atu komesa iha lisaun 1, maibé ita mós bele komesa estuda ho ema lisaun naran deʼit iha broxura neʼe.
4. Oinsá mak broxura neʼe ajuda ita atu hanorin ema husi Bíblia rasik?
4 Iha ita-nia livru barak, resposta ba pergunta sira bele hetan iha parágrafu laran. Maibé, iha broxura neʼe, resposta sira bele hetan iha Bíblia laran. Ema barak hakarak aprende husi Bíblia duké aprende husi ita-nia livru sira. Tan neʼe, iha broxura neʼe ladún temi liafuan husi eskritura sira iha parágrafu laran. Eskritura sira tenke lee husi Bíblia rasik. Ida-neʼe sei ajuda estudante atu rekoñese katak buat neʼebé nia aprende mai husi Maromak.—Isa 54:13.
5. Tanbasá mak importante atu prepara didiʼak antes estuda ho ema?
5 Broxura neʼe la esplika eskritura hotu. Tanbasá? Tanba broxura neʼe halo hodi book estudante atu husu pergunta no fó oportunidade ba mestre ka mestra atu uza matenek hodi hanorin. Tan neʼe, importante tebes atu prepara didiʼak lisaun ida-idak antes estuda ho ema. Maibé kuidadu atu labele koʼalia barak. Maski ita gosta atu esplika eskritura sira, maibé baibain ita hetan rezultadu diʼak liu se ita konvida estudante atu fó sai ninia hanoin kona-ba eskritura neʼe. Hodi uza pergunta ho matenek, ita bele ajuda estudante atu hanoin rasik kona-ba eskritura ida-idak katak sá.—Apos 17:2.
6. Oinsá mak ita bele uza broxura neʼe (a) kuandu ema ladún fiar kona-ba Maromak no Bíblia? (b) kuandu haklaken husi uma ba uma? (c) atu hahú kedas estuda Bíblia ho ema? (d) kuandu vizita fali ema?
6 Hanesan ita-nia livru seluk neʼebé ita uza atu estuda ho ema, ita bele fahe broxura neʼe iha tempu naran deʼit, maski livru seluk mak sei fahe ba fulan neʼe. Haklaken-naʼin barak sei hakarak uza broxura neʼe atu hahú kedas estuda Bíblia ho ema. Liután neʼe, hanesan temi ona iha reuniaun boot, livru neʼe ‘sei ajuda duni ita atu vizita fali ema!’—Haree kaixa iha pájina 11-13.
7. Oinsá mak ita bele uza broxura neʼe hodi halaʼo estudu Bíblia?
7 Oinsá atu halaʼo estudu Bíblia: Ita bele komesa koʼalia ho uma-naʼin hodi lee pergunta sira ho númeru neʼebé hakerek ho letra metan. Tuirmai, lee parágrafu no eskritura sira neʼebé hakerek ho haliʼis. Uza pergunta ho matenek atu ajuda uma-naʼin komprende kona-ba eskritura sira. No antes atu muda ba parte tuirmai, husu fali pergunta neʼebé hakerek ho letra metan atu hatene se uma-naʼin komprende ona ka lae. Ba dala balu, karik diʼak atu koʼalia hamutuk ho uma-naʼin kona-ba pergunta ida deʼit. No neineik-neineik, karik ita bele koʼalia hamutuk kona-ba pergunta rua ka lisaun tomak.
8. Kuandu ita atu koʼalia kona-ba eskritura sira, diʼak liu atu dehan saida? Tanbasá?
8 Liuliu eskritura sira iha parágrafu neʼebé hakerek “lee” mak eskritura neʼebé fó resposta ba pergunta neʼebé hakerek ho letra metan. Kuandu ita atu koʼalia kona-ba eskritura hirak-neʼe, diʼak atu labele dehan: “Apóstolu Paulo hakerek” ka “Haree toʼok saida mak Jeremias fó-hatene nanis”. Tanba se ita halo nuneʼe, karik uma-naʼin sei hanoin katak ita lee ema nia liafuan deʼit. Entaun diʼak liu atu dehan: “Maromak nia Liafuan hatete” ka “Haree toʼok saida Bíblia fó-hatene nanis”.
9. Durante estudu, ita tenke lee eskritura hotu neʼebé temi iha parágrafu ka lae?
9 Ita tenke lee eskritura hotu neʼebé temi iha parágrafu ka lee deʼit eskritura neʼebé hakerek “lee”? Ida-neʼe depende ba situasaun. Tuir loloos, eskritura hotu neʼebé temi iha parágrafu mak importante, no iha informasaun diʼak neʼebé ita bele uza atu koʼalia hamutuk ho uma-naʼin. Maibé iha situasaun balu, karik estudante la iha tempu, ladún iha interese, ka ladún hatene lee. Se nuneʼe, diʼak liu atu lee deʼit eskritura sira neʼebé hakerek “lee”.
10. Bainhira mak ita bele komesa uza livru Bíblia Hanorin?
10 Bainhira mak ita komesa uza livru Bíblia Hanorin: Kuandu ita estuda ona lisaun balu ho uma-naʼin no halo ida-neʼe semana-semana, ita bele deside se ita hakarak komesa atu uza livru Bíblia Hanorin atu estuda ka kontinua uza broxura Liafuan Diʼak toʼo hotu. Haklaken-naʼin ida-idak mak deside rasik bainhira atu komesa uza livru Bíblia Hanorin atu estuda. Kuandu ita komesa uza livru Bíblia Hanorin, ita tenke hahú iha kapítulu primeiru ka lae? La iha ukun-fuan kona-ba neʼe. Ema ida-idak nia situasaun la hanesan. Maibé, tanba livru Bíblia Hanorin iha informasaun liután, estudante sei hetan buat diʼak hodi estuda fali informasaun neʼebé hanesan.
11. Tanbasá mak ita hakarak uza broxura foun neʼe?
11 Tanba ema barak iha mundu neʼe hasoru susar oioin, ita iha oportunidade espesiál atu hatoʼo liafuan diʼak ba sira. Liafuan diʼak neʼe mak Maromak nia Governu ukun daudauk ona no lakleur tan sei lori mundu foun mai neʼebé sei iha justisa ba nafatin! (Mt 24:14; 2 Ped. 3:13) Ita bele fiar katak ema barak neʼebé rona liafuan diʼak neʼe sei konkorda ho buat neʼebé Bíblia hatete: “Furak duni ba ain sira neʼebé lori liafuan diʼak iha foho sira, neʼebé haklaken kona-ba dame, neʼebé lori liafuan diʼak kona-ba buat neʼebé diʼak liu, neʼebé haklaken kona-ba salvasaun, no neʼebé dehan ba Sião: ‘Ó-nia Maromak sai ona liurai.’” (Isa 52:7) Entaun, mai ita uza broxura neʼe atu lori liafuan diʼak husi Maromak ba ema neʼebé hamrook kona-ba justisa!
[Dezeñu iha pájina 11]
Kuandu ema ladún fiar kona-ba Maromak no Bíblia:
● Iha fatin balu, haklaken-naʼin sira hasoru ema neʼebé lakohi koʼalia kona-ba “Maromak” no “Bíblia”. Se nuneʼe, kuandu ita vizita sira ba dala primeiru, diʼak atu koʼalia deʼit kona-ba buat neʼebé kona sira-nia moris loroloron nian. Porezemplu, tanbasá mak presiza governu neʼebé diʼak, iha neʼebé mak bele hetan matadalan neʼebé diʼak ba família, no saida mak sei akontese iha futuru. Karik ita bele komesa koʼalia kona-ba broxura Liafuan Diʼak, depois ita koʼalia ona ho uma-naʼin ba dala balu kona-ba razaun sira neʼebé hatudu katak Maromak iha duni no tanbasá mak ita bele fiar ba Bíblia.
[Dezeñu iha pájina 12]
Kuandu haklaken husi uma ba uma:
● “Haʼu mai vizita ita atu hatudu oinsá mak ita bele hatene buat neʼebé Maromak hakarak halo ba ema hotu iha futuru. Tuir Ita-nia hanoin, loron ida Maromak sei halakon ema nia terus hotu ka lae? [Hein ba resposta.] Broxura neʼe ajuda ita atu hatene saida mak Bíblia nia resposta ba pergunta neʼe. [Husik uma-naʼin kaer broxura neʼe no lee parágrafu primeiru iha lisaun 1, no mós lee Jeremias 29:11.] Husi buat neʼebé ita foin lee, Maromak hakarak fó futuru neʼebé diʼak mai ita ka lae? [Hein ba resposta.] Se Ita hakarak, haʼu bele fó broxura neʼe ba Ita. Iha loron seluk, ita bele koʼalia hamutuk fali kona-ba parágrafu segundu atu buka Bíblia nia resposta ba pergunta neʼe: ‘Oinsá mak Maromak sei halakon buat hotu neʼebé halo ema terus?’” Se ita haree katak uma-naʼin iha tempu, ita bele lee no koʼalia hamutuk kona-ba parágrafu segundu no eskritura tolu iha parágrafu neʼe. Tuirmai, halo planu atu vizita fali nia hodi bele koʼalia hamutuk kona-ba pergunta segundu husi lisaun neʼe.
● “Ema barak halo orasaun ba Maromak, liuliu kuandu sira iha problema. Dala ruma Ita mós halo orasaun ka lae? [Hein ba resposta.] Tuir Ita-nia hanoin, Maromak rona ba orasaun hotu ka lae? [Hein ba resposta.] Broxura neʼe hatudu oinsá mak ita bele hetan Bíblia nia resposta ba pergunta neʼe. [Husik uma-naʼin kaer broxura neʼe no koʼalia hamutuk kona-ba parágrafu primeiru iha lisaun 12, no lee eskritura sira neʼebé hakerek “lee”.] Hodi hatene katak Maromak rona ba ita-nia orasaun, neʼe halo duni ita kontente, loos ka lae? Maibé atu ita bele halo orasaun tuir Maromak nia hakarak, ita presiza hatene didiʼak kona-ba Maromak. [Loke ba lisaun 2 no lee pergunta sira neʼebé hakerek ho letra metan.] Se Ita hakarak, haʼu bele fó broxura neʼe ba Ita, no iha tempu seluk ita bele lee Bíblia nia resposta ba pergunta hirak-neʼe.”
● “Ema barak laran-susar kona-ba buat aat barak neʼebé akontese iha mundu neʼe. Tuir Ita-nia hanoin, situasaun iha mundu neʼe sei sai diʼak ka lae? [Hein ba resposta.] Ema barak kontente atu hatene katak Bíblia iha liafuan diʼak neʼebé bele fó esperansa mai ita. Pergunta hirak-neʼe mak pergunta balu neʼebé Bíblia fó resposta.” Fó broxura ba uma-naʼin no husu nia atu hili pergunta iha broxura neʼe nia kotuk, ida-neʼebé mak nia hakarak liu atu hetan resposta. Tuirmai loke ba lisaun neʼe, no hatudu oinsá atu halaʼo estudu Bíblia. Halo planu atu vizita fali nia no koʼalia hamutuk kona-ba pergunta tuirmai iha lisaun neʼe.
[Dezeñu iha pájina 13]
Uza atu hahú kedas estudu Bíblia:
● “Haʼu mai vizita Ita atu koʼalia kona-ba kursu foun atu bele estuda Bíblia. Broxura neʼe iha lisaun 15 neʼebé hatudu Bíblia nia resposta ba pergunta sira neʼebé importante. [Hatudu ba uma-naʼin broxura nia oin no kotuk.] Ita koko ona atu komprende Bíblia nia liafuan ka lae? [Hein ba resposta.] Haree toʼok oinsá fasil deʼit atu estuda lisaun sira iha broxura neʼe. [Koʼalia hamutuk ho uma-naʼin kona-ba parágrafu primeiru husi pergunta 3 iha lisaun 3, no lee Apokalipse 21:4, 5. Se uma-naʼin iha tempu, bele koʼalia hamutuk kona-ba parágrafu tuirmai no eskritura sira neʼebé hakerek “lee”.] Se Ita hakarak, haʼu bele fó broxura neʼe ba Ita. Haʼu hakarak anima Ita atu koko estuda Bíblia maski dala ida deʼit, no se Ita gosta, Ita bele kontinua. Iha loron seluk, ita bele koʼalia hamutuk kona-ba lisaun primeiru. Hanesan ita bele haree, lisaun neʼe iha pájina ida deʼit.”
[Dezeñu iha pájina 13]
Uza kuandu vizita fali ema:
● “Haʼu kontente atu hasoru fali Ita. Haʼu lori broxura neʼebé fó sai Bíblia nia resposta ba pergunta barak neʼebé importante. [Husik uma-naʼin kaer broxura neʼe no husu nia atu haree broxura nia kotuk.] Husi pergunta hirak-neʼe, ida-neʼebé mak Ita hakarak liu atu hetan resposta? [Hein ba resposta. Tuirmai, loke ba lisaun neʼebé nia hili.] Haree toʼok oinsá ita bele uza broxura neʼe atu hetan Bíblia nia resposta.” Hatudu ba uma-naʼin oinsá atu halaʼo estudu Bíblia hodi koʼalia hamutuk kona-ba parágrafu ida ka rua no eskritura sira neʼebé hakerek “lee”. Hodi halo nuneʼe, ita komesa ona estudu Bíblia. Fó broxura neʼe ba uma-naʼin, no halo planu atu vizita fali nia. Depois koʼalia tiha ho uma-naʼin lisaun neʼebé nia hili, ita bele husu nia atu hili fali lisaun seluk ka bele hahú iha lisaun primeiru.