Ema ida bele rezigna an husi Testemuña ba Jeová ka lae?

Bele. Ema bele rezigna an ho dalan rua:

• Husu rasik. Ema ida bele fó-hatene ho ibun ka hakerek karta katak nia lakohi tan sai Testemuña ba Jeová.

• Liuhusi hahalok. Ema ida bele hatudu katak nia lakohi tan sai Testemuña ba Jeová liuhusi buat neʼebé nia halo. (1 Pedro 5:9) Porezemplu, karik nia tama relijiaun seluk no hatudu katak nia hakarak sai parte ho relijiaun neʼe.​—1 João 2:19.

Oinsá se ema ida la haklaken ona ka la tuir tan reuniaun sira? Neʼe katak ema neʼe rezigna an ona ka lae?

Lae. Ema neʼebé rezigna an ka deside atu la ransu tan ho ami, la hanesan ho ema neʼebé sai fraku iha fiar. Bainhira ema ida ladún laʼo ba oin ka la halaʼo ona atividade adorasaun nian, neʼe la dehan katak ema neʼe husik ona ninia fiar, maibé karik nia laran-tun deʼit. Ba ema hanesan neʼe, ami koko atu fó konsola no apoia sira duké hasees an husi sira. (1 Tesalónika 5:14; Judas 22) Se ema ida husu ajuda, katuas kongregasaun sei ajuda ema neʼe atu hametin fali ninia relasaun ho Maromak.​—Galásia 6:1; 1 Pedro 5:1-3.

Maibé, katuas sira la iha direitu atu obriga ema ida nafatin sai Testemuña ba Jeová. Ema ida-idak mak halo desizaun rasik kona-ba ninia relijiaun. (Josué 24:15) Ami hakarak ema adora Maromak ho sira-nia hakarak rasik.​—Salmo 110:3; Mateus 22:37.