Haklaken ho aten-brani iha ema nia serbisu-fatin
1. Tanbasá mak ita lalika laran-tun se ita sente moe atu haklaken iha ema nia serbisu-fatin?
1 Dala ruma, ita sente moe uitoan atu haklaken ba ema iha sira-nia serbisu-fatin ka lae? Se nuneʼe, ita la lalika laran-tun. Maski apóstolu Paulo mak haklaken-naʼin neʼebé brani no la taʼuk, maibé nia mós presiza atu hatudu “aten-barani” hodi bele haklaken. (1 Tes 2:2) Mai ita koʼalia kona-ba buat tolu neʼebé baibain halo ita dada an atu haklaken iha ema nia serbisu-fatin, no saida mak bele ajuda ita atu haklaken nafatin ho aten-brani.
2. Tansá mak ita lalika hanoin katak ita sei halo serbisu-naʼin sira hirus?
2 Se haʼu atrapalla serbisu-naʼin, sira sei hirus haʼu ka lae? Baibain, serbisu-naʼin sira presiza atende ema neʼebé tama-sai iha sira-nia serbisu-fatin, tan neʼe sira hatene katak ema sei atrapalla sira. Kuandu ita tama iha sira-nia serbisu-fatin, sira hatudu respeitu tanba sira hanoin ita mak kliente ida. Hodi hatais iha dalan neʼebé moos no kabeer, koʼalia ho respeitu, oin-midar no hasé ema, neʼe bele book sira atu hakarak rona ba ita.
3. Saida mak ita bele halo atu ita la halo kliente sira seluk hirus?
3 Haʼu presiza haklaken ba serbisu-naʼin iha kliente sira seluk nia oin ka lae? Se bele, hili tempu atu haklaken kuandu serbisu-fatin seidauk iha ema barak, porezemplu kuandu sira foin tama serbisu. Antes ita atu haklaken ba serbisu-naʼin, diʼak atu hein toʼo sira mesak no ladún okupadu. Diʼak mós atu koʼalia liafuan neʼebé badak deʼit.
4. Saida mak ita bele hatete kuandu ita haklaken iha ema nia serbisu-fatin?
4 Haʼu presiza koʼalia saida? Se iha serbisu-naʼin barak, diʼak atu koʼalia uluk ba patraun. Ita bele hatete: “Tanba ema barak serbisu, susar atu hetan sira iha uma, nuneʼe ami vizita Ita-Boot iha Ita-nia serbisu-fatin. Haʼu hatene Ita-Boot serbisu hela, tan neʼe haʼu hakarak koʼalia badak deʼit.” Se patraun ka serbisu-naʼin la husu kona-ba kontribuisaun ba ita-nia livru sira, diʼak atu ita lalika temi kona-ba neʼe, hodi nuneʼe sira la hanoin sala katak ita atu faʼan buat ruma ba sira. Karik ita bele husu lisensa husi patraun atu koʼalia lalais ba serbisu-naʼin seluk. Se nia fó lisensa ba ita, ita bele repete ita-nia liafuan neʼebé ita koʼalia ba patraun. Se serbisu-naʼin okupadu, karik ita bele fó deʼit tratu ba nia. Ka, ita bele fó revista ka tratu balu atu sira bele tau iha fatin neʼebé baibain serbisu-naʼin sira deskansa.
5. Ita iha razaun diʼak saida atu haklaken iha ema nia serbisu-fatin ho aten-brani?
5 Jesus no Paulo haklaken ho aten-brani iha ema nia serbisu-fatin. Entaun, ita mós bele halo hanesan neʼe. (Mt 4:18-21; 9:9; Apos 17:17) Ita bele husu Maromak Jeová atu ajuda ita haklaken ho aten-brani. (Apos 4:29) Haklaken iha ema nia serbisu-fatin, la hanesan ho haklaken uma ba uma, tanba iha serbisu-fatin ita sempre hetan ema. Entaun, mai ita koko haklaken iha dalan hanesan neʼe, neʼebé bele mós lori rezultadu diʼak.