Koʼalia husi laran

HANOIN toʼok ita atu hatoʼo diskursu ida. Ita hakaʼas an ona atu hili informasaun neʼebé kapás no prepara ona ida-neʼe hodi tau informasaun tuituir malu ho loloos. Ita mós hakaʼas an atu hatoʼo diskursu ho moos. Maibé ita-nia diskursu sei la ajuda rona-naʼin se sira rona deʼit ba parte balu tanba sira-nia neon halai ba fatin seluk, loos ka lae? Se sira la bele tau atensaun ba ita, ita-nia diskursu la bele kona sira-nia laran.

Tanbasá mak bele sai hanesan neʼe? Karik tanba razaun oioin, maibé dala barak razaun mak diskursu-naʼin la hatoʼo ninia diskursu husi laran. Neʼe katak diskursu-naʼin haree beibeik ba ninia nota, ka dalan neʼebé nia koʼalia laʼós hanesan baibain. Problema neʼe mosu tanba dalan neʼebé nia prepara ninia diskursu.

Se ita hakerek tiha liafuan hotu ba ita-nia diskursu, depois mak troka fali ba nota badak, ita sei sente susar atu hatoʼo ita-nia diskursu husi laran. Tanbasá? Neʼe tanba ita hili tiha ona liafuan hotu neʼebé ita atu uza. Maski ita uza nota badak neʼe bainhira ita hatoʼo ita-nia diskursu, maibé ita sei koko atu hanoin-hetan liafuan sira neʼebé uza kuandu ita foin hakerek. Baibain, kuandu ema hakerek informasaun ruma, sira uza liafuan neʼebé la hanesan ho dalan neʼebé ema koʼalia ba malu. Se ita prepara hanesan neʼe, ita-nia liafuan sei la rona hanesan baibain.

Duké hakerek liafuan hotu, koko atu halo buat sira tuirmai neʼe: (1) Hili tópiku ida no pontu importante sira neʼebé ita sei uza atu esplika tópiku neʼe. Karik pontu rua mak toʼo ona ba diskursu neʼebé badak. Ba diskursu neʼebé naruk, karik ita bele uza pontu haat ka lima. (2) Iha pontu ida-idak nia okos, hakerek eskritura sira neʼebé ita hakarak uza, no mós ai-knanoik no razaun sira neʼebé apoia ita-nia tópiku. (3) Hanoin kona-ba liafuan saida mak ita sei uza atu hahú ita-nia diskursu. Karik ita bele hakerek fraze ida ka rua. Ikusmai, prepara oinsá ita sei ramata ita-nia diskursu.

Maski importante atu treinu ita-nia diskursu, maibé lalika lee fila-fila hodi dekór hotu. Atu bele koʼalia husi laran, kuandu ita prepara, koko atu hanoin liu kona-ba ideia sira, laʼós liafuan ida-idak. Hanoin kona-ba ideia sira toʼo ita komprende didiʼak oinsá ideia ida liga ho ideia seluk. Ida-neʼe sei la susar se ita prepara ona ita-nia diskursu hodi tau informasaun tuituir malu ho loloos. Nuneʼe kuandu ita hatoʼo ita-nia diskursu, ita bele esplika ideia sira-neʼe hodi koʼalia husi laran.

Hanoin kona-ba tanbasá mak diʼak atu koʼalia husi laran. Se ita koʼalia husi laran, ida-neʼe halo fasil ba ema atu simu buat neʼebé ita hatoʼo. Ita-nia diskursu sei sai moris no ita-nia rona-naʼin sei gosta rona ita.

Se ita koʼalia iha dalan hanesan neʼe, ita bele hateke nafatin ba rona-naʼin. Sira bele haree katak ita hatene didiʼak informasaun neʼebé ita koʼalia, no katak ita fiar duni ida-neʼe tanba ita la lee liafuan ida-idak husi ita-nia nota. Ita sei koʼalia ho laran-diʼak hanesan ita koʼalia ho belun ida, no rona-naʼin sira sei sente katak ita koʼalia duni ba sira.

Ita mós hakarak koʼalia husi laran tanba se ita lee deʼit liafuan hotu neʼebé ita hakerek ona, neʼe halo susar ba ita atu bele troka ita-nia diskursu tuir situasaun neʼebé mosu. Maibé se ita uza nota badak, ita bele troka ka aumenta informasaun uitoan hodi hadiʼa liután ita-nia diskursu. Porezemplu, hanoin toʼok katak iha loron neʼebé ita sei hatoʼo ita-nia diskursu, karik ita rona notísias foun neʼebé kona duni ita-nia diskursu. Diʼak atu temi kona-ba ida-neʼe, loos ka lae? Ka, bainhira ita hatoʼo daudaun ita-nia diskursu, ita haree katak iha labarik barak neʼebé rona. Diʼak atu hadiʼa uitoan ita-nia ai-knanoik sira hodi bele ajuda sira komprende oinsá informasaun neʼe bele kona sira-nia moris.

Diʼak mós atu koʼalia husi laran tanba ida-neʼe sei ajuda ita nuʼudar diskursu-naʼin. Porezemplu, se ita haree katak rona-naʼin gosta rona ba buat neʼebé ita hatete, ita mós sai laran-manas liután. Karik ita sei hakarak esplika liután kona-ba ideia ruma ka repete pontu ruma hodi halo klaru liután. Se ita haree katak rona-naʼin sira ladún tau atensaun ba ita, ita bele hadiʼa dalan neʼebé ita koʼalia hodi ajuda sira atu see tilun ba ita. Selae, karik ita sei koʼalia deʼit ba anin tanba rona-naʼin la tau atensaun ba ita.

Buat neʼebé ita presiza kuidadu. Iha buat balu neʼebé ita presiza kuidadu bainhira ita hatoʼo ita-nia diskursu hodi koʼalia husi laran. Se ita aumenta informasaun barak liu nuʼudar ita koʼalia, karik ita sei liu oras. Buat neʼebé bele ajuda mak hakerek iha ita-nia nota kona-ba minutu hira mak ita sei uza ba parte ida-idak iha ita-nia diskursu. No hakaʼas an atu tuir minutu sira-neʼe.

Ita mós presiza kuidadu atu la fiar an demais. Liuliu ema neʼebé iha esperiénsia barak mak presiza kuidadu kona-ba neʼe. Ema balu neʼebé toman ona atu koʼalia iha ema nia oin, sira sente fasil deʼit atu prepara lalais sira-nia diskursu. Maibé importante atu hatudu haraik-an no la haluha katak ita hatoʼo informasaun husi Jeová, ita-nia Mestre Boot Liu Hotu. Se ita hanoin kona-ba neʼe, ita sei badinas atu prepara ita-nia knaar sira no halo orasaun hodi husu Maromak nia ajuda.—Isaías (Yesaya) 30:20; Roma 12:6-8.

Ema barak sente taʼuk kona-ba hatoʼo diskursu hodi koʼalia husi laran tanba sente katak sira sei haluha buat neʼebé sira hakarak atu koʼalia. Maibé keta husik ida-neʼe hanetik ita atu laʼo ba oin hodi sai diskursu-naʼin neʼebé diʼak. Prepara didiʼak no husu Maromak Jeová nia ajuda liuhusi ninia espíritu.—João 14:26.

Ema balu hanoin katak, se sira hakerek liafuan ida-idak, sira-nia diskursu sei sai furak liu tanba sira hili ona liafuan neʼebé kapás. Maibé tuir loloos, koʼalia husi laran mak diʼak liu. Baibain, se ita hatoʼo informasaun hodi uza liafuan neʼebé fasil ba ema atu komprende no uza fraze sira neʼebé la naruk demais, neʼe sei halo rona-naʼin tau atensaun liután. Se ita prepara didiʼak, ita sei uza liafuan neʼebé diʼak, laʼós tanba ita dekór liafuan, maibé tanba ita komprende ita-nia informasaun. No se ita sai toman atu koʼalia iha dalan neʼebé diʼak loroloron, ida-neʼe sei ajuda ita bainhira ita hatoʼo diskursu husi plataforma.

Oinsá atu uza nota. Nuʼudar ita hetan esperiénsia barak liután, karik ita presiza hakerek liafuan balu deʼit ba pontu importante ida-idak. Ita bele hakerek ita-nia nota neʼe, no mós eskritura neʼebé ita hakarak atu uza iha surat-tahan ida hodi bele haree lalais. Kuandu ita bá haklaken, baibain ita bele hanoin deʼit kona-ba liafuan balu atu koʼalia. Se ita halo ona riset ba ita-nia vizita fali, karik ita sei tau nota iha Bíblia laran. Ka ita bele uza informasaun husi “Tópiku sira kona-ba Bíblia” ka informasaun neʼebé bele hetan husi livru Bertukar Pikiran mengenai Ayat-Ayat Alkitab.

Se ita hetan knaar atu hatoʼo diskursu balu iha reuniaun durante semana ida nia laran, no mós atu hatoʼo diskursu públiku, karik ita sei presiza informasaun barak iha ita-nia nota. Tanbasá? Tanba ida-neʼe bele ajuda ita atu hanoin fali informasaun neʼebé ita sei koʼalia antes ita hatoʼo ita-nia parte. Maibé ita presiza kuidadu atu la haree beibeik ba ita-nia nota bainhira ita hatoʼo diskursu, tanba ida-neʼe sei halo susar atu koʼalia husi laran. Se ita presiza hakerek informasaun barak iha ita-nia nota, ita bele halo marka ruma ka riska liafuan sira neʼebé importante liu, hodi ita bele haree lalais.

Kuandu ema ida neʼebé iha esperiénsia ona hatoʼo diskursu ida, diʼak se nia koʼalia husi laran. Maibé iha situasaun balu, diʼak mós atu lee informasaun husi surat-tahan ka dekór liafuan ruma. Porezemplu, kuandu hahú no ramata ita-nia diskursu, importante atu haree ba rona-naʼin no uza liafuan neʼebé iha kbiit atu kona sira-nia laran. Iha situasaun hanesan neʼe, ita bele dekór fraze balu. No se ita hakarak atu konta faktu ruma, ema ida nia liafuan, númeru sira ka eskritura sira, ita bele lee deʼit husi surat-tahan.

Kuandu ema seluk husu kona-ba ita-nia fiar. Dala ruma, ema husu ita derrepente deʼit kona-ba ita-nia fiar no ita seidauk prepara nanis atu hatán oinsá. Ida-neʼe bele akontese kuandu ita bá haklaken no ema ida husu pergunta ruma. Ita mós bele hasoru situasaun neʼe bainhira ita hamutuk ho ita-nia família, iha serbisu-fatin no iha eskola. Ema-boot husi governu mós bele husu ita kona-ba ita-nia fiar no dalan neʼebé ita halaʼo ita-nia moris. Bíblia hatete: “Sai prontu nafatin atu defende imi-nia fiar iha ema hotu nia oin hodi esplika ba sira neʼebé husu kona-ba imi-nia esperansa, maibé halo ida-neʼe ho laran-maus no respeitu.”—1 Pedro 3:15.

Lee toʼok Apóstolu 4:19, 20 no haree oinsá Pedro no João hatán ba amlulik boot iha tribunál Sinédriu nian. Ho fraze rua deʼit, sira esplika ho momoos kona-ba sira-nia desizaun. Sira hanoin kona-ba rona-naʼin sira no hili liafuan neʼebé loos tuir situasaun neʼe. Tempu balu liutiha neʼe, ema duun matak Estevão no lori nia ba tribunál neʼe. Estevão la prepara nanis maibé nia fó resposta husi laran neʼebé hatudu ninia fiar-metin. Ita bele lee kona-ba neʼe iha Apóstolu 7:2-53. Oinsá mak Estevão hatoʼo ninia liafuan? Nia konta ema judeu nia istória tuituir malu. No kuandu nia hetan oportunidade neʼebé diʼak, nia esplika katak nasaun Izraél kontra Maromak. Atu ramata, nia dehan katak ema iha Sinédriu mós hatudu hahalok hanesan sira tanba sira oho Maromak nia Oan.

Se ema husu kona-ba ita-nia fiar no ita la iha tempu atu prepara nanis, saida mak ita bele halo hodi hatán ho diʼak? Ita bele banati-tuir Neemias neʼebé halo orasaun iha ninia laran antes nia fó resposta ba Liurai Artaxerxes. (Neemias 2:4) Depois, prepara iha ita-nia neon informasaun saida mak ita bele koʼalia. Ita bele halo nuneʼe hodi tuir hakat sira tuirmai neʼe: (1) Hili pontu ida ka rua neʼebé ita atu koʼalia (ita bele hili pontu ruma husi livru Bertukar Pikiran mengenai Ayat-Ayat Alkitab). (2) Hanoin kona-ba eskritura sira neʼebé diʼak atu uza hodi apoia pontu sira-neʼe. (3) Hanoin kona-ba oinsá atu hahú koʼalia iha dalan neʼebé diʼak hodi rona-naʼin sei gosta atu rona. Depois neʼe mak bele komesa koʼalia.

Se ita laran-nakdedar, ita sei hanoin-hetan hakat sira-neʼe ka lae? Jesus hatete ba ninia dixípulu sira: “Keta laran-taridu kona-ba oinsá no saida mak imi sei koʼalia, tanba sei haraik ba imi iha oras neʼebá buat neʼebé imi atu koʼalia. Basá laʼós imi rasik deʼit mak sei koʼalia, maibé imi-nia Aman nia espíritu mak koʼalia liuhusi imi.” (Mateus 10:19, 20) Ida-neʼe la dehan katak Maromak sei halo milagre hodi fó ba ita “kbiit atu koʼalia ho matenek” hanesan nia fó ba ema kristaun sira iha apóstolu sira-nia tempu. (1 Korinto 12:8) Maibé se ita aproveita buat hotu neʼebé Jeová fó atu hanorin ita liuhusi kongregasaun kristaun, ninia espíritu santu sei ajuda ita atu hanoin-hetan informasaun sira iha tempu neʼebé ita presiza.—Isaías (Yesaya) 50:4.

Sin, se ita hatoʼo diskursu hodi koʼalia husi laran, ida-neʼe sei halo ita-nia diskursu sai kapás. Se ita sai toman atu halo ida-neʼe kuandu ita hatoʼo diskursu, ita sei sente fasil atu hatán ba pergunta sira neʼebé karik ema husu ba ita derrepente deʼit. Entaun, hakaʼas an atu koʼalia husi laran duké lee deʼit husi ita-nia nota, hodi nuneʼe ita bele hetan rezultadu diʼak liután iha serbisu haklaken. No mós, se ita hetan knaar atu hatoʼo diskursu, rona-naʼin sei tau atensaun ba ita, no informasaun neʼebé ita hatoʼo sei kona sira-nia laran.