Uza informasaun neʼebé ita simu

BÍBLIA kompara kongregasaun ho ema nia isin-lolon. Parte ida-idak mak importante maibé “parte ida-idak iha knaar neʼebé la hanesan”. Nuneʼe, ita presiza hakaʼas an atu kumpre knaar sira neʼebé ita simu. Neʼe inklui mós kuandu ita hatoʼo diskursu. Ita labele hanoin katak informasaun balu husi tópiku neʼebé ita simu mak ladún importante hodi hili fali informasaun seluk neʼebé ita gosta liu. (Roma 12:4-8) Atan laran-metin no matenek mak iha responsabilidade atu fó ai-han “iha tempu loloos”. (Mateus 24:45) Kuandu ita prepara diskursu hodi tuir matadalan neʼebé ita simu ona, ita hatudu katak ita agradese ba arranju neʼe. No ida-neʼe ajuda kongregasaun atu laʼo ho didiʼak.

Informasaun saida mak ita sei uza. Kuandu ita simu knaar atu hatoʼo diskursu iha eskola, ita presiza prepara deʼit tópiku neʼe duké koʼalia fali buat seluk. Dala barak, ita simu informasaun atu uza iha ita-nia diskursu. Maibé se la iha, ita bele buka informasaun rasik. Nuʼudar ita prepara diskursu, ita presiza tuir deʼit tópiku neʼebé ita simu ona. No kuandu hili informasaun, hanoin kona-ba sé mak ita-nia rona-naʼin.

Estuda didiʼak ita-nia informasaun, no hanoin kona-ba eskritura sira. Depois neʼe, hanoin kona-ba oinsá ita bele uza informasaun neʼe atu ajuda rona-naʼin. Hili pontu rua ka tolu husi ita-nia informasaun hodi sai nuʼudar pontu importante ba diskursu. Hili mós eskritura sira neʼebé ita hakarak lee no esplika.

Informasaun hira mak ita tenke fó sai? Neʼe depende ba pontu hira mak ita bele esplika ho didiʼak. Se ita koko atu fó sai buat barak, ida-neʼe sei halo susar atu hanorin iha dalan neʼebé diʼak. Dala ruma, informasaun balu la liga ho ita-nia objetivu, entaun uza deʼit buat neʼebé sei ajuda ita atu kumpre objetivu neʼe. Husi informasaun hotu neʼebé ita simu, koko atu uza buat neʼebé diʼak liu ba rona-naʼin. Objetivu husi lisaun neʼe mak hatoʼo diskursu hodi uza informasaun neʼebé ita simu, neʼe laʼós katak ita presiza temi pontu hotu husi informasaun neʼe.

Ita-nia knaar laʼós deʼit atu konta fali informasaun neʼebé ita simu. Ita presiza esplika pontu sira no fó ai-knanoik no ezemplu sira. Se ita aumenta ideia seluk, koko atu uza ideia sira-neʼe atu apoia pontu importante sira husi ita-nia diskursu. Labele uza ideia seluk atu troka fali ita-nia informasaun.

Irmaun sira neʼebé kumpre kritériu atu hanorin iha kongregasaun dala ruma hetan knaar atu hatoʼo diskursu iha Reuniaun Serbisu nian. Sira komprende katak sira tenke uza informasaun ba knaar neʼe, no labele troka ho buat seluk. No mós, irmaun sira neʼebé hatoʼo diskursu públiku simu nota badak atu halo tuir. Maski irmaun sira lalika uza buat hotu, maibé iha nota neʼe hatudu sai pontu importante sira, ideia no eskritura neʼebé apoia pontu sira-neʼe. Se ita aprende oinsá atu hanorin hodi uza didiʼak informasaun neʼebé ita simu, neʼe sei aumenta ita-nia esperiénsia ba diskursu seluk.

Lisaun neʼe mós bele ajuda ita atu hanorin ho didiʼak kuandu estuda ho ema. Lisaun neʼe hanorin ita atu tau atensaun deʼit ba tópiku neʼebé ita estuda, duké koʼalia fali buat seluk neʼebé la kona ita-nia informasaun. Maski nuneʼe, ita presiza tetu didiʼak tanba dala ruma ita tenke esplika informasaun seluk tuir estudante nia presiza.