Uza ita-nia livru sira ho didiʼak

Jesus dehan: “Imi simu la selu, fó mós hodi la hein atu ema selu imi.” (Mt 10:8) Ita halo tuir matadalan neʼe hodi la husu osan ba Bíblia no livru sira. (2Ko 2:17) Livru sira-neʼe koʼalia kona-ba lia-loos sira neʼebé folin boot husi Maromak nia Liafuan. Presiza osan barak no ema nia hakaʼas-an atu haruka livru sira-neʼe ba kongregasaun sira iha mundu tomak. Tan neʼe, diʼak ita foti deʼit buat neʼebé ita presiza.

Uza matenek bainhira fahe livru sira ba ema, maski halaʼo haklaken públiku. (Mt 7:6) Duké fó deʼit ita-nia livru sira ba ema neʼebé laʼo liu, hakaʼas an atu koʼalia ho sira no buka-hatene sira loloos interese ka lae. Bainhira koʼalia hela ho ema, haree toʼok se ita bele hatán “sin” ba pergunta ida ka liu husi kaixa. Se ita la bele hatene ema neʼe interese ka lae, karik diʼak liu fó tratu deʼit ba nia. Maibé se nia husu revista ida, ka ita-nia livru seluk ida, ita kontente atu fó ba nia.​—Prv 3:27, 28.