ኣብ ኣገልግሎት ክእለትካ ኣመሓይሽ—ንእተቘጥዐ ብዓል ቤት ብኸመይ ከም እትምልሰሉ

ኣገዳሲ ዝዀነ ስለምንታይ እዩ፦ ብዙሓት ኣብ ኣገልግሎት እንረኽቦም ሰባት ብትሕትና እዮም ዚቕበሉና። እንተ ዀነ ግና፡ የሱስ ገሊኦም ከም ዚጸልኡና ተነብዩ ነይሩ እዩ። (ዮሃ. 17:14) ሓደ ብዓል ቤት እንተ ተቘጢዑና እምበኣር ኬገርመና የብሉን። ከምዚ ኼጋጥም ከሎ፡ ነቲ እንውክሎ የሆዋ ብዜሐጕሶ መገዲ ኽንምልስ ኢና እንደሊ። (ሮሜ 12:17-21፣ 1 ጴጥ. 3:15) ከምኡ ምግባርና ነቲ ዅነታት ከም ዘይጋደድ ኪገብሮ ይኽእል እዩ። ብዘይካዚ፡ ነቲ ብዓል ቤትን ንኻልኦት ተዓዘብትን ምስክርነት ዚህብ ኣብ ርእሲ ምዃኑ፡ ካልእ መዓልቲ ናይ የሆዋ መሰኻኽር ኪበጽሕዎም ከለዉ፡ ንኺሰምዑ ኺድረኹ እዮም።—2 ቈረ. 6:3።

እንታይ ክትገብር ኣሎካ፧

ህዱእን ሰናይን ጠባይ ዓቅብ። ከምኡ ምግባርካ፡ ነቲ ዅነታት ኬህድኦ ይኽእል እዩ። እቲ ብዓል ቤት ብኣኻ ኸም ዝሓረቐ ጌርካ ኣይትሕሰብ። (መክ. 7:9) እቲ ብዓል ቤት እተቘጥዐ፡ ብምኽንያት ውልቃዊ ጸገማቱ ወይ ከኣ ኣብ ዘይምሹእ ግዜ ስለ ዝበጻሕካዮ ኪኸውን ይኽእል እዩ። ዋላ እውን በቲ መልእኽትና እንተ ሓረቐ፡ ስለ እተታለለ ኪኸውን ይኽእል እዩ።—2 ቈረ. 4:4።
ልኡምን ጸጋ ዝመልኦን ቃላት ጌርካ መልስ። (ምሳ. 15:1) ካብ ድቃስ ኣተንሲእካዮ፡ ወይ ካብ ዕዮኡ ኣቋሪጽካዮ ዲኻ፧ ንዕዮ ስብከትና ይቕሬታ ኽንሓትት ዘየድልየና እኳ እንተ ዀነ፡ ኣብ ዘይምሹእ ግዜ ስለ ዝኸድካዮ ብትሕትና ይቕሬታ ኽትሓትት ትኽእል ኢኻ። ብምኽንያት እቲ ብዛዕባና ዝሰምዖ ሓቅነት ዘይብሉ በላበለው ድዩ ሓሪቑ፧ ከምኡ እንተ ደኣ ዀይኑ፡ ከምዚ ኽትብል ትኽእል ኢኻ፦ “ስለምንታይ ከም ዝሓረቕካ ይርድኣኒ እዩ። እንተዀነ ግና፡ እቲ ብዛዕባና ዝሰማዕካዮ ሓቅነት ዘለዎ ኣይመስለንን። ብዛዕባኡ ኽገልጸልካዶ፧” ንገለ ኻብቲ እንኣምነሉ፡ ምናልባት ንኸም ውገዳን ደምን ብዚምልከት ድዩ ዚቃወሞ፧ ከምዚ ኽትብል ትኽእል ኢኻ፦ “ይርድኣኒ እዩ። ካልኦት እውን ከምዚ ናትካ ሓሳባት ኣለዎም። ኣብ ምንታይ ተመርኲስና ኸምኡ ኸም እንብል ካብ መጽሓፍ ቅዱስዶ ኸርእየካ፧”
እቲ ሰብ ኣመና እንተ ነዲሩ ግና፡ ክንምልሰሉ ኣብ ክንዲ እንፍትን ሓዲግናዮ እንተ ኸድና ዝሓሸ እዩ። ካልእ ግዜ ናይ የሆዋ መሰኻኽር ኪመጽዎ ኸም ዘይደሊ እንተ ሓቢሩ፡ ድሌቱ ኸም እተኽብረሉ ኸተረጋግጸሉ ትኽእል ኢኻ።

ኣብዛ ወርሒ እዚኣ፡ ነዚ ፈትኖ፦

ኣብ ኣምልኾ ስድራ ቤትካ፡ ነዚ ተለማመደሉ።
ምስ ሓደ እተቘጥዐ ብዓል ቤት ምስ ተፈላለኹም፡ ብኸመይ እንተ ትምልሰሉ ኔርካ ዝሓሸ ኪኸውን ከም ዚኽእል ምስ መገላግልትኻ ተመያየጥ።