Matta
5 Isa märekäni görüp, dagyň eteginde oturdy, şägirtleri hem ýanyna geldi. 2 Şonda Isa olara öwredip başlady:
3 «Hudaý barada bilim almagyň wajypdygyna düşünýän adamlar* bagtlydyr+, sebäbi gökdäki Patyşalyk olaryňkydyr.
4 Hasrat çekýän adamlar bagtlydyr, sebäbi olara göwünlik berler+.
5 Pesgöwünli*+ adamlar bagtlydyr, sebäbi olar ýeri miras alarlar+.
6 Adalatyň dikelmegini isleýänler bagtlydyr+, sebäbi olar arzuwyna ýeterler*+.
7 Rehimli adamlar bagtlydyr+, sebäbi olara rehim ediler.
8 Ýüregi päk adamlar bagtlydyr+, sebäbi olar Hudaýy görerler.
9 Parahatlyk döredýän adamlar bagtlydyr+, sebäbi olara Hudaýyň ogullary diýerler.
10 Dogruçyllyk üçin yzarlanýan adamlar bagtlydyr+, sebäbi gökdäki Patyşalyk olaryňkydyr.
11 Meniň adym üçin size sögenlerinde+, yzarlanlarynda+, her hili ýalan we erbet sözleri aýdanlarynda bagtlysyňyz+. 12 Şatlanyň, begeniň+, sebäbi gökdäki sylagyňyz+ uludyr. Sizden öň ýaşan pygamberler-de şeýle yzarlandylar+.
13 Siz ýeriň duzy+. Eger duz tagamyny ýitirse, ony ýene-de nädip tagamly edip bolar? Ol hiç zada ýaramaz+, ony aýak astyna zyňaýmaly bolar.
14 Siz dünýäniň yşygy+. Dagyň üstünde gurlan şäheri gizläp bolmaz. 15 Adamlar çyrany ýakyp, sebediň aşagynda däl-de, şemdanyň üstünde goýýarlar. Şonda ol öýdäkileriň hemmesine yşyk berýär+. 16 Siziň hem yşygyňyz adamlara şeýle nur saçsyn+ welin, ýagşy işleriňizi+ görüp, gökdäki Ataňyzy şöhratlandyrsynlar+.
17 Men Töwrady ýa-da Pygamberler kitabyny bozmaga gelendirin öýtmäň. Men bozmaga däl, olary berjaý etmäge geldim+. 18 Size hakykaty aýdýaryn, asman we ýer geçip gitse-de, Töwradyň ýekeje harpy, ýekeje nokady-da* bozulmaz, ählisi berjaý bolar+. 19 Kim iň kiçi tabşyryklaryň birini bozup, muny başgalara-da öwretse, gökdäki Patyşalyga girmäge mynasyp däldir. Emma olary berjaý edýän we başgalara-da öwredýän adam gökdäki Patyşalyga girmäge mynasypdyr. 20 Şuny bilip goýuň: eger siz kanunçylardan-da, fariseýlerden-de dogruçyl bolmasaňyz+, gökdäki Patyşalyga girip bilmersiňiz+.
21 Gadymy döwürde ýaşan adamlaryň şeýle diýenini eşidensiňiz: „Adam öldürme+. Kim adam öldürse, kazyýetde jogap berer“+. 22 Emma men size diýýärin, doganyna gaharlanýan+ adam kazyýetde jogap berer. Biri erbet söz aýdyp, doganynyň göwnüne degse, Ýokary kazyýetde jogap berer. Biri doganyna: „Sen akmak!“ diýse, Jähennem* oduna zyňlar+.
23 Gurbanlyk ojagyna* gurbanlygyňy* alyp barýarkaň+, doganyň senden öýkelidigi ýadyňa düşse, 24 gurbanlygyňy gurbanlyk ojagynyň ýanynda goý-da, gidip, ilki doganyň bilen ýaraş+. Soňra gurbanlygyňy ber.
25 Dawagäriň bilen ýüze çykan meseläňi kazyýete ýetmänkäň derrew çöz. Ýogsam ol seni kazyýetde günäkär edäýmesin. Şonda kazy seni garawula tabşyrar, garawul bolsa türmä basar+. 26 Saňa hakykaty aýdýaryn, soňkuja teňňäňi* berýänçäň, ol ýerden çykmarsyň.
27 Siz: „Zyna etme“+ diýlenini eşidensiňiz. 28 Emma men size diýýärin, bir aýala azgyn höwes bilen seredýän adam+ ýüreginde eýýäm zyna edendir+. 29 Eger sag gözüň günä etdirýän* bolsa, oýup taşla+. Bütin bedeniň Jähenneme* zyňlandan, bir gözüň ýok bolany gowudyr+. 30 Eger sag eliň günä etdirýän* bolsa, kesip taşla+. Bütin bedeniň Jähenneme* zyňlandan, bir eliň ýok bolany gowudyr+.
31 Siz: „Aýrylyşýan adam aýalynyň talak hatyny bersin“+ diýlenini-de eşidensiňiz. 32 Emma men size diýýärin, aýaly bilen zynadan* başga sebäbe görä aýrylyşýan adam aýalynyň zyna etmegine sebäp bolýandyr. Aýrylyşan aýala öýlenen hem zyna edýändir+.
33 Gadymy döwürde ýaşan adamlaryň şeýle diýenini-de eşidensiňiz: „Biderek ýere ant içme+. Eger ant içen bolsaň, Ýehowanyň* öňünde berjaý et“+. 34 Emma men size diýýärin, asla ant içmäň+, gökden hem ant içmäň, sebäbi gök Hudaýyň tagtydyr. 35 Ýerden hem ant içmäň, sebäbi ýer Hudaýyň aýagynyň basgançagydyr+. Iýerusalimden hem ant içmäň, sebäbi ol beýik Patyşanyň şäheridir+. 36 Öz başyňyzdan hem ant içmäň, sebäbi saçyňyzyň ýekeje taryny ak ýa-da gara edip bilmersiňiz. 37 Goý, siziň „hawa“ diýeniňiz „hawa“, „ýok“ diýeniňiz „ýok“ bolsun+. Bulardan artygy Şeýtandandyr*+.
38 Siz: „Göz ýerine göz, diş ýerine diş“ diýlenini eşidensiňiz+. 39 Emma men size diýýärin, ýamanlyk edýäne garşylyk görkezme. Biri sag ýaňagyňa ursa, oňa çep ýaňagyňy hem tut+. 40 Eger biri kazyýetiň üsti bilen köýnegiňi aljak bolsa, donuňy-da ber+. 41 Eger ygtyýarly adam bir çakrym* ýol ýöremegi talap etse, onuň bilen iki çakrym ýol ýöre. 42 Kömek sorana kömek et, karz sorandan ýüzüňi sowma+.
43 Siz: „Ýakynyňy* söý+, duşmanyňy ýigren“ diýlenini eşidensiňiz. 44 Emma men size diýýärin, duşmanlaryňyzy söýüň+, sizi yzarlaýanlar üçin doga-dileg ediň+. 45 Şonda gökdäki Ataňyzyň perzendi bolarsyňyz+. Sebäbi ol Güni hem erbetleriň, hem ýagşylaryň üstünden dogurýar, ýagmyry hem dogrularyň, hem egrileriň üstünden ýagdyrýar+. 46 Eger siz özüňizi söýýänleri söýseňiz, başgalardan näme tapawudyňyz bar?+ Salgytçylar hem şeýle etmeýärmi? 47 Eger diňe doganyňyz bilen salamlaşýan bolsaňyz, näme artykmaç zat edýäňiz? Başga halklar hem şeýle etmeýärmi? 48 Gökdäki Ataňyzyň kämil bolşy ýaly, siz-de kämil boluň+.