Ysraýyllar sözünde durmady

Ýehowa Musa bilen ýene gepleşip: «Gel, daga çyk. Daşyň ýüzüne tabşyryklarymy ýazyp berjek» diýdi. Musa daga çykdy. Ol dagda 40 gije-gündiz boldy. Ýehowa tabşyryklaryny iki sany dörtburç daşa ýazyp berdi.

Musa henizem dagdady. Adamlar Musa indi gelmez öýtdüler. Olar Haruna: «Bize ýol görkezer ýaly hudaý ýasap ber» diýdiler. Harun: «Baryň, altynlaryňyzy getiriň» diýdi. Olar altynlaryny getirip berdiler. Harun olary otda eredip, göle ýasady. Ysraýyllar göläniň daşynda aýlanyp, baýramçylyk bellediler. Olar: «Ine, bizi Müsürden çykaran Hudaýymyz» diýdiler. Olar dogry etdimi? Ýok, ysraýyllar Ýehowa: «Biziň Hudaýymyz sen. Diňe saňa gulak asarys» diýipdiler. Ýöne olar sözünde durmady.

Ýehowa ysraýyllaryň gölä sežde edýändigini görüp durdy. Şonuň üçin Musa: «Çalt aşak düş. Halk maňa gulak asanok, olar gölä Hudaý diýýärler» diýdi. Musa derrew daşlary alyp, aşak düşdi.

Musa ýetip gelýärkä, aýdym-sazyň sesini eşidýär. Baryp görse, ysraýyllar göläniň daşynda tans edip, aýdym aýdýardy. Musanyň gahary gelip, elindäki daşlary zyňyp goýberdi. Daşlar bölek-bölek boldy. Ol göläni hem döwdi. Göle çym-pytrak boldy. Musa Haruna: «Halka näme üçin gulak asdyň?» diýdi. Harun: «Musa, gaharlanma! Halkyň erbetdigini bilýäň-ä. Olar göle ýasap ber diýdi. Menem altynlaryny otda eredip, göle ýasadym» diýdi. Ýöne Harun göle ýasamaly däldi. Soň Musa ýene daga çykdy. Ol: «Ýehowa, adamlary bagyşla» diýip ýalbardy.

Ýehowa özüne gulak asmak isleýän adamlary bagyşlady. Ysraýyllar näme üçin Musa gulak asmalydy? Musany kim ýolbaşçy belledi?